ಇದು ನಿಜಕ್ಕೂ ಅರಿವಿನ ಪಯಣ. ಬಾಲಕಿ ನೇಹಾ ಭಾವಿ ಜಗತ್ತಿಗಾಗಿ ಅರಿವನ್ನು ಪಡೆಯುವ ತವಕ ಮೆಚ್ಚುವಂತದ್ದು. ಹೋದಲ್ಲೆಲ್ಲಾ ಆ ಸ್ಥಳಗಳ ಟಿಪ್ಪಣಿ ಮಾಡಿಕೊಂಡು, ಸಂಶಯ, ಕುತೂಹಲಗಳನ್ನು ಪಾಲಕರಿಂದ ಪರಿಹರಿಸಿಕೊಂಡು, ಇಂಟರ್‌ನೆಟ್‌ನಲ್ಲಿ ಹುಡುಕಾಡಿ ಮಾಹಿತಿ ಸಂಗ್ರಹಿಸಿದ್ದಾರೆ, ನನಗೆ ಈ ಪ್ರವಾಸ ಕಥನ ಓದುವಾಗ ಅಚ್ಚರಿಯುಂಟಾಯಿತು. ಕೇವಲ ಹನ್ನೆರಡು ವರ್ಷದ ಬಾಲಕಿ ನೇಹಾ ಒಂದು ಸ್ಥಳದ ಭೌಗೋಳಿಕ, ಐತಿಹಾಸಿಕ, ಪಾರಿಸಾರಿಕ, ಪೌರಾಣಿಕ ವಿಷಯಗಳನ್ನು ಸಂಗ್ರಹಿಸಿ ಓದುಗರಿಗೆ ಸಿನಿಮಾ ನೋಡಿದ ಅನುಭವವನ್ನು ನೀಡುತ್ತಾ ಸಾಗಿದ್ದಾರೆ. ಕರ್ನಾಟಕದ ಜಲಪಾತಗಳು, ಕೋಟೆಗಳು, ನಿಸರ್ಗಧಾಮಗಳು, ಐತಿಹಾಸಿಕ ಕೋಟೆ, ದೇವಾಲಯಗಳು, ಕರಾವಳಿಯ ಸಮುದ್ರತೀರಗಳು ಮೊದಲಾದವುಗಳನ್ನು ಸಂದರ್ಶಿಸುವುದರ ಜೊತೆಗೆ, ಫೋಟೋಗಳ ಸಂಗ್ರಹ, ಉಡುಗೆ ತೊಡುಗೆ, ಊಟ ಉಪಹಾರ, ಆಟ ಪಾಠ, ಹಿರಿಯರ ಎಚ್ಚರಿಕೆ, ಪ್ರವಾಸದಲ್ಲಿ ಅನುಭವಿಸಿದ ತೊಂದರೆಗಳನ್ನು ಕಣ್ಣಿಗೆ ಕಟ್ಟುವ ಹಾಗೆ ವಿವರಿಸಿದ್ದು ಅವಳ ಸಂಶೋಧನಾ ಪ್ರವೃತ್ತಿಯನ್ನು ತೋರಿಸುತ್ತದೆ. ‘ಬೆಳೆವ ಸಿರಿ ಮೊಳಕೆಯಲ್ಲಿ ನೋಡು’ ಎಂಬಂತೆ ನೇಹಾ ಭವಿಷ್ಯದಲ್ಲಿ ಉತ್ತಮ ಬರಹಗಾರ್ತಿಯಾಗುವಲ್ಲಿ ಸಂದೇಹವೇ ಇಲ್ಲ. ಆರನೇ ತರಗತಿಯಲ್ಲಿ ಓದುತ್ತಿರುವ ಕುಮಾರಿ ನೇಹಾ ಲಿಂಗರಾಜ ರಾಮಾಪೂರ ಅವರು ಶಿಕ್ಷಕರ ಕುಟುಂಬದಲ್ಲಿ ಜನಿಸಿದವರು. ತಂದೆ, ತಾಯಿ, ಅಜ್ಜ, ಅಮ್ಮ, ಮಾವ, ಅತ್ತೆಯವರೊಂದಿಗೆ ಕೌಟುಂಬಿಕ ಸಮಾರಂಭಗಳಿಗೆ ಬೇರೆ ಬೇರೆ ಊರುಗಳಿಗೆ ಹೋಗುವಾಗ ದಾರಿಯಲ್ಲಿ ಬರುವ ಪ್ರೇಕ್ಷಣೀಯ ಸ್ಥಳಗಳು, ದೇವಾಲಯಗಳು, ಐತಿಹಾಸಿಕ ಸ್ಥಳಗಳು, ಉದ್ಯಾನವನಗಳು, ಪ್ರದರ್ಶನಾಲಯಗಳು ಹೀಗೆ ಸಂದರ್ಶಿಸಿದ ಸ್ಥಳಗಳ ಹೊಸ ಹೊಸ ಅನುಭವಗಳನ್ನು ತುಂಬಾ ಸೊಗಸಾಗಿ ಈ ಕೃತಿಯಲ್ಲಿ ಚಿತ್ರಿಸಿದ್ದಾರೆ.
ಬಾಲ ಪ್ರತಿಭೆ ನೇಹಾ ರಾಮಾಪೂರ ಮೂಲತಃ ಹುಬ್ಬಳ್ಳಿಯವರು. ತಂದೆ - ಲಿಂಗರಾಜ ರಾಮಾಪೂರ. ಬಾಲ್ಯದಿಂದಲೇ ಕಥೆ ಕೇಳುತ್ತಾ ಸಾಹಿತ್ಯದಲ್ಲಿ ಆಸಕ್ತಿ ಬೆಳೆಸಿಕೊಂಡ ನೇಹಾ ನಾಲ್ಕನೇ ತರಗತಿಯಲ್ಲಿರುವಾಗಲೇ ಪುಸ್ತಕ ಬರೆದಿದ್ದಾರೆ. ಬಾಲ್ಯದಿಂದ ಅಜ್ಜಿಯಿಂದ ಕತೆ ಕೇಳುತ್ತಿದ್ದ ನೇಹಾ ಅಪ್ಪ ಅಮ್ಮನ ಮಾರ್ಗದರ್ಶನದಲ್ಲಿ ಸ್ವತಃ ಕತೆ ರಚಿಸಿದ್ದಾರೆ. ಈಕೆಯ ಕತೆಗಳು ಚಿಲಿಪಿಲಿ ಪ್ರಕಾಶನದ ಗುಬ್ಬಚ್ಚಿ ಗೂಡು ಮಕ್ಕಳ ದಿನಪತ್ರಿಕೆಯಲ್ಲಿ ಇನ್ನೂ ಕೆಲವು ಕತೆಗಳು ಅಜೀಂ ಪ್ರೇಮ್ ಜಿ ಫೌಂಡೇಶನ್ ನ ಶಾಲ್ನುಡಿ ಇ ಪತ್ರಿಕೆಯಲ್ಲಿ ಪ್ರಕಟವಾಗಿವೆ. ‘ಮ್ಯಾಜಿಕ್ ಪೆನ್ಸಿಲ್’ ಎಂಬ ಕತಾ ಸಂಕಲವನ್ನು ಪ್ರಕಟಿಸಿದ್ದಾರೆ. ...
READ MORE
Concept & Creation 
©2024 Book Brahma Private Limited.
