‘ರಂ. ಶ್ರೀ ಮುಗಳಿ ಚಿತ್ರಿಸಿದ ಪಂಪ ರನ್ನರು’ ಕೃತಿಯು ಹಿರಿಯ ವಿದ್ವಾಂಸ ಶ್ರೀನಿವಾಸ ಹಾವನೂರ ಅವರ ಸಂಪಾದಿತ ಗ್ರಂಥವಾಗಿದೆ. ಕೃತಿಗೆ ಪ್ರವೇಶಿಕೆಯನ್ನು ಬರೆದಿರುವ ಎಸ್. ವಿ ಸುಜಾತ ಅವರು, ‘ಪಂಪನ ದೇಸಿಯಾದ ಪುಲಿಗೆಯ ತಿರುಳನ್ನಡವು ಯಾವ ಪ್ರದೇಶಕ್ಕೆ ಸೇರಿದ್ದು ಎಂದು ವಿವೇಚಿಸುವಾಗ, ಆಧಾರವಾಗಿ ಉತ್ತರ ಕರ್ನಾಟಕದಲ್ಲಿ ಬಳಕೆಯಲ್ಲಿದ್ದ ಇಂದಿಗೂ ಬಳಕೆಯಲ್ಲಿರುವ ಹಾಗೂ ಮರಾಠಿ, ಪ್ರಾಕೃತ ಇತ್ಯಾದಿ ಸಮೀಪ ಭಾಷೆಗಳಲ್ಲಿ ದೊರೆಯುವ ಸಂವಾದೀ ಶಬ್ದಗಳನ್ನು ಮತ್ತು ಪ್ರಯೋಗಗಳನ್ನು ಉಲ್ಲೇಖಿಸುತ್ತಾರೆ. ಇದು ಅವರ ಸಂಶೋಧನಾ ಪ್ರಶ್ನೆಗೆ ನಿದರ್ಶನ. ಉತ್ತರ ಕರ್ನಾಟಕ ಪ್ರದೇಶದ ನಿಕಟ ಸಂಪರ್ಕವಿದ್ದ ಅವರ ಅಭಿಪ್ರಾಯಗಳಿಗೆ, ಆಧಾರಗಳಿಗೆ ಅಥೆಂಟಿಸಿಟಿ ಇದೆ ಎನ್ನುವುದನ್ನು ನೆನಪಿಡಬೇಕು ಎನ್ನುತ್ತಾರೆ
`ಪಂಪನ ದೃಷ್ಟಿಯಲ್ಲಿ ಭರತ - ಬಾಹುಬಲಿ' ಎಂಬ ಒಂದು ಚಿಕ್ಕ ಲೇಖನದಲ್ಲಿ ಬಾಹುಬಲಿಗೆ ಸೋತು ತಲೆತಗ್ಗಿಸಿ ನಿಂತ ಚಕ್ರವರ್ತಿ ಭರತನು ತನ್ನ ಕಂಬನಿಯ ಮೂಲಕ ಬಾಹುಬಲಿಯ ಪಾದ ಪೂಜೆ ಮಾಡುತ್ತಿರುವಂತೆ, ಬಾಹುಬಲಿಯು ತನ್ನ ಕಣ್ಣೀರಿನಿಂದ ಭರತನಿಗೆ ರಾಜ್ಯಾಭಿಷೇಕ ಮಾಡುತ್ತಿರುವನೋ ಎಂಬಂತೆ ತೋರಿತು ಎನ್ನುವ ಸನ್ನಿವೇಶದ ಗರ್ಭಿತಾರ್ಥವನ್ನು ಹೀಗೆ ವಿವೇಚಿಸಿದ್ದಾರೆ. `ಶಕ್ತಿಯಿಂದ ಕೂಡಿದ ಸಾತ್ವಿಕತೆ ಮನುಷ್ಯನ ಜೀವನವನ್ನು ತೇಜಸ್ವಿಯನ್ನಾಗಿಸುತ್ತದೆ. ನಿಜವಾದ ಗೆಲವನ್ನು ತರುತ್ತದೆ. ಕೇವಲ ಸಾತ್ವಿಕತೆ ದುರ್ಬಲತೆಗೆ ದಾರಿಮಾಡಿಕೊಡುವುದು, ಕೇವಲ ಶಕ್ತಿ ಪಾಶವೀ ಬಲಕ್ಕೆ ಕಣ್ಸನ್ನೆ ಮಾಡುವುದು, ಸಾತ್ವಿಕತೆ ಮತ್ತು ಶಕ್ತಿಗಳ ನಡುವಿನ ಸಮತೂಕವನ್ನು ಸಾಧಿಸುವುದೇ ಉತ್ತಮ ಸಂಸ್ಕೃತಿ, ಪಂಪನು ಚಿತ್ರಿಸಿದ ಭರತ - ಬಾಹುಬಲಿಯರ ಸಂದರ್ಭವು ಈ ಬಗೆಯಲ್ಲಿ ಆಧುನಿಕ ಜಗತ್ತಿಗೆ, ಅದೇಕೆ ಯಾವುದೇ ಕಾಲದ ಜನಕ್ಕೆ ಅಮರ ಸಂದೇಶವನ್ನು ನೀಡಿದೆ ಎಂಬುದನ್ನು ಇಲ್ಲಿ ವಿಶ್ಲೇಷಿಸಲಾಗಿದೆ.
ಪಾತ್ರ ಸೃಷ್ಟಿಯ ಬಗ್ಗೆ ಸುದೀರ್ಘವಾಗಿ ಚರ್ಚಿಸಿ ಭೀಮಸೇನನೇ ಹೇಗೆ ಮತ್ತು ಏಕೆ ಕಾವ್ಯದ ನಾಯಕನೆ೦ಬುದನ್ನು ನಿರೂಪಿಸಿದ್ದಾರೆ. ಗದಾಯುದ್ಧ ಹಾಗೂ ಇತರ ಕಾವ್ಯಗಳಲ್ಲಿ ಚಿತ್ರಿತನಾಗಿರುವ ದುರ್‍ಯೋಧನನ ವ್ಯಕ್ತಿತ್ವದ ಸಂಕೀರ್ಣತೆಯನ್ನು ಸರಳವಾಗಿ ಬಿಡಿಸಿ ತೋರಿಸಿದ್ದಾರೆ. ಪಾತ್ರಗಳ ವ್ಯಕ್ತಿತ್ವದ ವಿವಿಧ ಮುಖಗಳು ಹಾಗೂ ಸನ್ನಿವೇಶ ಚಿತ್ರಣಗಳ ಕಾಲ್ಪನಿಕ ಅಧ್ಯಯನಗಳ ರೀತಿ ಸಂಶೋಧಕರಿಗೆ ವಿಮರ್ಶಕರಿಗೆ ಮಾದರಿಯಾಗಿದೆ ಎಂದಿದ್ದಾರೆ.
ಕನ್ನಡ ಸಾಹಿತ್ಯಸಂಶೋಧನೆ ಮಾಡಲು ಮೊತ್ತಮೊದಲು ಕಂಪ್ಯೂಟರ್ ಬಳಸಿದವರು ಡಾ. ಶ್ರೀನಿವಾಸ ಹಾವನೂರರು (1928-2010). ಕನ್ನಡ ಸಾಹಿತ್ಯಕ್ಕೆ ಅವರ ಕೊಡುಗೆ ಅಪಾರವಾದುದು, ವೈವಿಧ್ಯಮಯವಾದುದು. ಸಣ್ಣ ಕಥೆ, ಲಲಿತ ಪ್ರಬಂಧ, ಜೀವನ ಚರಿತ್ರೆ, ಸಾಹಿತ್ಯ, ಸಂಸ್ಕೃತಿ, ಇತಿಹಾಸ ವಿಮರ್ಶೆ ಮೊದಲಾದ ಪ್ರಕಾರಗಳಲ್ಲಿ 60ಕ್ಕೂ ಮಿಕ್ಕಿ ಕೃತಿಗಳನ್ನು ಹೊರತಂದರು. ವಿದೇಶದಲ್ಲಿದ್ದ ಕನ್ನಡ ಸಾಹಿತ್ಯವನ್ನು ಮರಳಿ ತಾಯ್ನಾಡಿಗೆ ಕರೆತಂದರು. ಹೊಸಗನ್ನಡ ಅರುಣೋದಯದ ಸಾಹಿತ್ಯವನ್ನು ಮತ್ತೆ ತೆರೆದು ತೋರಿಸಿದರು, ಹಿಂದೆ ಮುಂಬಯಿಯ ಟಾಟಾ ಮೂಲಭೂತ ವಿಜ್ಞಾನ ಸಂಸ್ಥೆಯ ಗ್ರಂಥಪಾಲಕರಾಗಿದ್ದರು. ಮುಂದೆ ಮಂಗಳೂರು ಮತ್ತು ಮುಂಬಯಿ ವಿ.ವಿ.ಯ ಕನ್ನಡ ಅಧ್ಯಯನ ಸಂಸ್ಥೆಯ ಮುಖ್ಯಸ್ಥರಾದರು. ಆಮೇಲೆ ಪುಣೆಯಲ್ಲಿ ಮರಾಠಿ ಕನ್ನಡ ಸ್ನೇಹ ಸಂವರ್ಧನೆಯಲ್ಲಿ ಪಾತ್ರವಹಿಸಿದರು.. ಕೊನೆಗೆ ಕರ್ನಾಟಕ ಸರಕಾರದ ಸಮಗ್ರ ದಾಸ ಸಾಹಿತ್ಯ ಸಂಪಾದಕರಾಗಿ ೫೦ ಸಂಪುಟಗಳ ಪ್ರಕಟಣೆಯ ನೇತೃತ್ವ ವಹಿಸಿದರು. ಕನ್ನಡದ ನಾಡೋಜರೆಂದು ಹೆಸರಾದರು. ...
READ MORE
Concept & Creation 
©2024 Book Brahma Private Limited.
