ಸುನಾಮಿ ಸುತ್ತ

ಸುನಾಮಿ ಸುತ್ತ (2004ರ ಸುನಾಮಿ)-ಡಾ. ಎಂ. ವೆಂಕಟಸ್ವಾಮಿ ಅವರ ಕೃತಿ. ಭೂಮಿ ಸೃಷ್ಟಿಯಾಗಿದ್ದು 454 ಕೋಟಿ ವರ್ಷಗಳ ಆಸುಪಾಸು. ಅಂದಿನಿಂದ ಇಂದಿನವರೆಗೆ ಭೂಮಿಯ ಮೇಲೆ ಅನೇಕ ರೀತಿಯ ನೈಸರ್ಗಿಕ ವಿಪತ್ತುಗಳು ಘಟಿಸುತ್ತಾ ಬಂದಿವೆ. ಮುಖ್ಯವಾಗಿ ಭೂಕಂಪ-ಸುನಾಮಿ, ಜ್ವಾಲಾಮುಖಿ, ಚಂಡಮಾರುತ, ಬಿರುಗಾಳಿ, ಅತಿವೃಷ್ಠಿ ಅನಾವೃಷ್ಠಿ ಕಾಡ್ಗಿಚ್ಚು ಇತ್ಯಾದಿ. ಸಮುದ್ರ ತಳದಲ್ಲಿ ಭಾರಿ ಭೂಕಂಪನಗಳು ಘಟಿಸಿದರೆ ಸಮುದ್ರದಲ್ಲಿ ದೈತ್ಯ ಅಲೆಗಳು ಎದ್ದು ಸುನಾಮಿ ಸೃಷ್ಟಿಯಾಗುತ್ತದೆ. ಪೆಸಿಫಿಕ್ ಮಹಾಸಾಗರಕ್ಕೆ ಹೊಂದಿಕೊಂಡಿರುವ ದೇಶಗಳು ಮತ್ತು ದ್ವೀಪಗಳಿಗೆ ಸುನಾಮಿ ಹೊಸದಲ್ಲದಿದ್ದರೂ ಭಾರತಕ್ಕೆ ಹೊಸದು. ಭಾರತದ ಕಡಲಿಗೆ ಹಿಂದೆ ಒಂದೆರಡು ಸಲ ಸುನಾಮಿ ಅಪ್ಪಳಿಸಿದ್ದರೂ 2004ರಲ್ಲಿ ಹಿಂದೂ ಮಹಾಸಾಗರದಲ್ಲಿ ಸುಮಾತ್ರ ದ್ವೀಪದ ಹತ್ತಿರ ಸಂಭವಿಸಿದ ಸುನಾಮಿಯಷ್ಟು ಭೀಕರವಲ್ಲ. ಹಿಂದಿನ ದಿನಗಳಲ್ಲಿ ಕಡಲ ಪಕ್ಕದಲ್ಲಿ ಬದುಕುವ ಜನಸಂಖ್ಯೆ ತೀರಾ ಕಡಿಮೆ ಇತ್ತು. ಪ್ರಪಂಚದಾದ್ಯಂತ ಭಾರತವೂ ಸೇರಿ ತೃತೀಯ ಜಗತ್ತಿನ ದೇಶಗಳಲ್ಲಿ ಜನಸಂಖ್ಯೆ ಹೆಚ್ಚಾಗಿ ಸಾಗರಗಳ ಅಂಚಿನಿಂದ ಗಿರಿಶಿಖರಗಳವರೆಗೂ ಜನರು ನೆಲೆಸಿದ್ದಾರೆ.

2004ರಲ್ಲಿ ಸಂಭವಿಸಿದ ಸುನಾಮಿಯಲ್ಲಿ ಸಾವಿರಾರು ಜನರು ಪ್ರಾಣ ಕಳೆದುಕೊಂಡರು. ಈ ದುರಂತದಲ್ಲಿ ನಮ್ಮ ದೇಶದ ತಮಿಳುನಾಡು, ಕೇರಳ, ಪಾಂಡಿಚೇರಿ, ಆಂಧ್ರಪ್ರದೇಶ, ಅಂಡಮಾನ್-ನಿಕೋಬಾರ್ ಮಾಲ್ಡೀವ್ ದ್ವೀಪಗಳು ಹೆಚ್ಚು ಹಾನಿಗೆ ಒಳಗಾದವು. ಇಂಡೋನೇಷ್ಯಾ, ಮಲೇಷ್ಯಾ, ಸಿಂಗಾಪೂರ, ಥೈಲ್ಯಾಂಡ್ ಮತ್ತು ಶ್ರೀಲಂಕಾ ದೇಶಗಳು ಹೆಚ್ಚು ಹಾನಿಗೆ ಒಳಗಾದವು. ಈ ಸುನಾಮಿಯಿಂದ ಸತ್ತವರ ಒಟ್ಟು ಸಂಖ್ಯೆ 2,27,898. ಭಾರತದಲ್ಲಿ 14,000 ಜನ ಎನ್ನಲಾಗಿದೆ. ಸುಮಾತ್ರ ದ್ವೀಪದ ಹತ್ತಿರ ಉದ್ಭವಿಸಿದ ಸುನಾಮಿ 8,000 ಕಿ.ಮೀ.ಗಳ ದೂರದ ದಕ್ಷಿಣ ಆಫ್ರಿಕಾದ ಪೂರ್ವ ಕಡಲವರೆಗೂ ಧಾವಿಸಿತ್ತು.

ಈ ಕೃತಿಯಲ್ಲಿ ಸುನಾಮಿಯ ಸೃಷ್ಟಿ, ಸುನಾಮಿ ಎಂದರೇನು, ಭೂಮಿ, ಸುನಾಮಿ ಭೀಕರ ಚಿತ್ರಣ, ಸುನಾಮಿಯ ನಂತರ, ಕೆಲವು ವಿಶೇಷ ಅನುಭವಗಳು ಮತ್ತು ಹೇಳಿಕೆಗಳು, ಸುನಾಮಿ ಚರಿತ್ರೆ ಮತ್ತು ಕೆಲವು ಆಶ್ಚರ್ಯಸಂಗತಿಗಳು, ಪರಿಹಾರ ಮತ್ತು ಪುನರ್ವಸತಿ, ಸುನಾಮಿ ಮುನ್ನೆಚ್ಚರಿಕೆ ಈ ಅಧ್ಯಾಯಗಳು ಒಳಗೊಂಡಿವೆ.