`ರತ್ನಗಳು’ ಭೂವಿಜ್ಞಾನಿ, ಲೇಖಕ ಟಿ.ಆರ್. ಅನಂತರಾಮು ಅವರ ಕೃತಿ. ಈ ಕೃತಿಯಲ್ಲಿ ರತ್ನಗಳ ಇತಿಹಾಸ, ನವರತ್ನಗಳ ಕಲ್ಪನೆ, ರತ್ನ ಪ್ರಪಂಚವನ್ನಾಳುತ್ತಿರುವ ಹಲವು ಪ್ರಶಸ್ತ ಮತ್ತು ಅರೆ ಪ್ರಶಸ್ತ ರತ್ನಗಳನ್ನು ಕುರಿತು ವಿವರಣೆಗಳಿವೆ. ವೈಜ್ಞಾನಿಕವಾಗಿ ರತ್ನಗಳನ್ನು ಕುರಿತು ಅರಿಯಲು ಬಯಸುವವರಿಗೆ ಇದೊಂದು ಆಕರ ಗ್ರಂಥ.
ರತ್ನಗಳ ಬಗ್ಗೆ ಪ್ರಾಚೀನ ಕಾಲದಿಂದಲೂ ಅನೇಕ ನಂಬಿಕೆಗಳು ಬೆಳೆದುಬಂದಿವೆ. ನವಗ್ರಹಕ್ಕೆ ಹೊಂದುವಂತೆ ನವರತ್ನಗಳನ್ನು ಗುರುತಿಸಿದ್ದಾರೆ. ಇವೆಲ್ಲ ಸಂಪ್ರದಾಯವಾಯಿತು. ಆದರೆ ರತ್ನಗಳ ನಿಜವಾದ ಗುಣ ಯಾವುದು, ಅವುಗಳಿಂದ ಶಿಲ್ಪ ಕಡೆಯುವ ಬಗೆ ಹೇಗೆ? ಅವುಗಳ ವಾಣಿಜ್ಯ ಉದ್ಯಮ ಹೇಗೆ ಸಾಗುತ್ತಿದೆ? ಇವೇ ಮುಂತಾದ ವೈಜ್ಞಾನಿಕ ಅಂಶಗಳನ್ನು `ರತ್ನಗಳು’ ಕೃತಿಯಲ್ಲಿ ಚರ್ಚಿಸಲಾಗಿದೆ.
ರತ್ನ ಪ್ರಪಂಚದಲ್ಲಿ ವಜ್ರ, ಮಾಣಿಕ್ಯ, ನೀಲ, ಪಚ್ಚೆ, ಪುಷ್ಯರಾಗ, ವೈಡೂರ್ಯ, ಗೋಮೇದಕ, ಹವಳ, ಮುತ್ತು ಇವಷ್ಟೇ ರತ್ನಗಳಲ್ಲ. ಸುಮಾರು 2000 ಬಗೆಯ ಖನಿಜಗಳನ್ನು ವಿಜ್ಞಾನಿಗಳು ಗುರುತಿಸಿದ್ದಾರೆ. ಇವುಗಳಲ್ಲಿ ಕನಿಷ್ಠ 100 ಖನಿಜಗಳು ರತ್ನಗಳಾಗಿ ಬಳಕೆಯಲ್ಲಿವೆ. ಶ್ರೀಲಂಕಾ, ಬರ್ಮ, ಪಾಕಿಸ್ತಾನ, ಬ್ರೆಜಿಲ್, ಭಾರತ – ರತ್ನ ಖನಿಜಗಳ ಉದ್ಯಮಕ್ಕೆ ಹಿಂದಿನಿಂದಲೂ ಹೆಸರುವಾಸಿ. ರತ್ನಗಳ ಬಳಕೆ ಹೆಚ್ಚಾದಂತೆ ಕೃತಕ ರತ್ನಗಳನ್ನೂ ಸೃಷ್ಟಿಸಿ ವಂಚಿಸುವ ದಾಂಧಲೆಯೂ ನಡೆಯುತ್ತಿದೆ. ಈ ಕೃತಿಯಲ್ಲಿ ಈ ಎಲ್ಲ ಸಂಗತಿಗಳನ್ನೂ ವೈಜ್ಞಾನಿಕವಾಗಿ ಓದುಗರ ಮುಂದೆ ತೆರೆದಿಡಲಾಗಿದೆ.
ಭೂ ವಿಜ್ಞಾನಿ, ಸಂಶೋಧಕ, ಅಂಕಣಕಾರ, ವಿಜ್ಞಾನ ಲೇಖಕ ಟಿ.ಆರ್. ಅನಂತರಾಮು ಅವರು ಜನಿಸಿದ್ದು 1949 ಆಗಸ್ಟ್ 3ರಂದು ತುಮಕೂರು ಜಿಲ್ಲೆ ಶಿರಾ ತಾಲ್ಲೂಕಿನ ತಾಳಗುಂದದಲ್ಲಿ.ತಾಳಗುಂದ ರಾಮಣ್ಣ ಅನಂತರಾಮು ಅವರ ಪೂರ್ಣ ಹೆಸರು. ಸಿರಾದ ಸರ್ಕಾರಿ ಮಾಧ್ಯಮಿಕ ಶಾಲೆಯಲ್ಲಿ ಮಾಧ್ಯಮಿಕ ಶಿಕ್ಷಣ ಪೂರ್ಣಗೊಳಿಸಿದ ಅವರು ಸಿರಾದ ಮುನಿಸಿಪಲ್ ಹೈಸ್ಕೂಲಿನಲ್ಲಿ ಪ್ರೌಢಶಿಕ್ಷಣ ಪೂರ್ಣಗೊಳಿಸಿದ್ದಾರೆ. ಆನಂತರ ತುಮಕೂರಿನ ಸರ್ಕಾರಿ ಕಾಲೇಜಿನಲ್ಲಿ ಪದವಿ, ಮೈಸೂರು ವಿಶ್ವವಿದ್ಯಾಲಯದಲ್ಲಿ ಎಂ.ಎನ್ಸಿ(ಜಿಯಾಲಜಿ) ಪದವಿ ಪಡೆದಿದ್ದಾರೆ. ಭೂ ವಿಜ್ಞಾನ ವಿಷಯದಲ್ಲಿ ಪದವಿ ಪಡೆದ ನಂತನ ಬೆಂಗಳೂರಿನ ಸರ್ಕಾರಿ ವಿಜ್ಞಾನ ಕಾಲೇಜಿನಲ್ಲಿ ಪ್ರಾಧ್ಯಾಪಕರಾಗಿ, ರಾಜ್ಯದ ನಾನಾ ಕಾಲೇಜುಗಳಲ್ಲಿ ಅಧ್ಯಾಪಕರಾಗಿ ಕೆಲಸ ಮಾಡಿದ್ದಾರೆ. ...
READ MORE
Concept & Creation 
©2025 Book Brahma Private Limited.
