ನ್ಯಾಯನಿಷ್ಠುರಿ

'ನ್ಯಾಯನಿಷ್ಠುರಿ’ ಆತ್ಮೀಯರ ಕಣ್ಣಲ್ಲಿ ಜಿ.ಎಚ್. ನಾಯಕ ಅವರ ಕುರಿತು ರಚಿಸಿದ ಸಂಸ್ಮರಣ ಗ್ರಂಥವಾಗಿದೆ. ಈ ಕೃತಿಯನ್ನು ಬಸವರಾಜು ಜಿ.ಪಿ ಅವರು ಸಂಪಾದಿಸಿದ್ದಾರೆ. ವಿಮರ್ಶಕರಾಗಿದ್ದ ಜಿ.ಎಚ್.ನಾಯಕರು ಇತ್ತೀಚೆಗೆ ನಮ್ಮನ್ನು ಅಗಲಿದ್ದಾರೆ. ನಾಯಕರ ಕುರಿತು ಅವರ ಒಡನಾಡಿಗಳು, ಆತ್ಮೀಯರು ಬರೆದಿರುವ ಬರಹಗಳನ್ನು ಹಿರಿಯರಾದ ಜಿ.ಪಿ.ಬಸವರಾಜು ಸಂಪಾದಿಸಿಕೊಟ್ಟಿದ್ದಾರೆ. ವ್ಯಕ್ತಿಯಾಗಿ ಮತ್ತು ವಿಮರ್ಶಕರಾಗಿ ನಾಯಕರನ್ನು ಹಲ ಬಗೆಯಲ್ಲಿ ಇಲ್ಲಿ ಗ್ರಹಿಸಲಾಗಿದೆ. ನಿರಂತರ ಅಧ್ಯಯನ, ಆಳವಾದ ಪಾಂಡಿತ್ಯ, ಸೂಕ್ಷ್ಮ ಸಂವೇದನೆ, ಖಚಿತ ಮತ್ತು ಸ್ಪಷ್ಟ ನಿಲುವು, ಅಪರೂಪದ ಒಳನೋಟಗಳು ನಾಯಕರ ವಿಮರ್ಶೆಗೆ ಘನತೆಯನ್ನು, ಗೌರವವನ್ನು ತಂದಿದ್ದವು. ನಾಯಕರ ಒಂದು ಮಾತಿಗಾಗಿ, ಅಭಿಪ್ರಾಯಕ್ಕಾಗಿ ಕಾತರಿಸುವ ಲೇಖಕರ, ಓದುಗರ ಸಮುದಾಯವೇ ಇತ್ತು ಎಂಬುದು ನಾಯಕರ ವಿಮರ್ಶೆಯ ಸ್ಥಾನವನ್ನು ಕೂಡ ಪರೋಕ್ಷವಾಗಿ ಸೂಚಿಸುತ್ತದೆ‌. 'ನ್ಯಾಯನಿಷ್ಠುರಿ' ಪುಸ್ತಕ ನಾಯಕರ ಕುರಿತಾಗಿ ಮತ್ತಷ್ಟು ಅಭಿಮಾನವನ್ನು ಹೆಚ್ಚಿಸುತ್ತದೆ; ಪ್ರಜ್ಞೆಯನ್ನು ವಿಸ್ತರಿಸುತ್ತದೆ.