ರೈತರೇ ಬದುಕಲು ಕಲಿಯಿರಿ

ರೈತರೇ ಬದುಕಲು ಕಲಿಯಿರಿ...!

ಈ ದೇಶದ ಬೆನ್ನೆಲುಬು ಎಂದು ಕರೆಯಿಸಿಕೊಳ್ಳುವ ರೈತ ನೈಸರ್ಗಿಕ ಕೃಷಿ ಅಥವಾ ದೇಸಿ ಕೃಷಿ ಪದ್ಧತಿಯಿಂದ ದೂರ ಉಳಿಯಲು ಕಾರಣ ಹಸಿರುಕ್ರಾಂತಿ. ಜೈವಿಕ ತಂತ್ರeನದ ಹೆಸರಿನಲ್ಲಿ ದೇಸಿ ಬೀಜಗಳಿಂದ ದೂರವಾಗಿದ್ದಾನೆ. ಕೃಷಿಯ ಹೆಸರಿನಲ್ಲಿ ಭೂಮಿಗೆ ವಿಷ ಉಣಿಸುತ್ತಿದ್ದಾನೆ. ಈ ಎಲ್ಲ ಪ್ರಯೋಗಗಳು ವಿಫಲವಾಗತೊಡಗಿದ್ದರಿಂದ ಈಗ ಆತ್ಮಹತ್ಯೆಗೆ ಶರಣಾಗತೊಡಗಿದ್ದಾನೆ. ಕೃಷಿ ಎಂದರೆ ಇದೇನಾ?

ಗಾಳಿ, ಚಳಿ, ಮಳೆ ಎನ್ನದೆ ಹಗಲಿರುಳು ದುಡಿದ ರೈತ ಸಮುದಾಯ ಭೂಮಿಯನ್ನು ಹಾಳಾಗಿಸಿ ತಾವೂ ಹಾಳಾಗುತ್ತಿರುವ ಈ ದಿನದಲ್ಲಿ ಗೆಳೆಯ ಪತ್ರಕರ್ತ ಚಾಮರಾಜ ಸವಡಿ ಅವರು ನೈಸರ್ಗಿಕ ಕೃಷಿ ಹರಿಕಾರ ಶ್ರೀ ಸುಭಾಷ ಪಾಳೇಕರ ಅವರ ಕೃಷಿ ವಿಧಾನಕ್ಕೆ ಮಾರುಹೋಗಿ ’ರೈತರೇ ಬದುಕಲು ಕಲಿಯಿರಿ’ ಎಂಬ ಪುಸ್ತಕ ಹೊರತರುವ ಮೂಲಕ ರೈತರಿಗೆ ಹೊಸ ಭರವಸೆ ಮೂಡಿಸಲು ಯತ್ನಿಸಿದ್ದಾರೆ.

ಭೂಮಿ, ಆಹಾರ, ಸಮಾಜ ಎಲ್ಲವೂ ವಿಷಮಯವಾಗುತ್ತಿರುವ ಸ್ಥಿತಿ ಒಂದೆಡೆ ಇದ್ದರೆ ಅಷ್ಟೇ ದುರಂತಮಯ ಸ್ಥಿತಿಯಲ್ಲಿ ನಮ್ಮ ರೈತ ಸಮುದಾಯ ಇದೆ. ಇಂತಹ ಸಂದರ್ಭದಲ್ಲಿ ಶ್ರೀ ಸುಭಾಷ ಪಾಳೇಕರ ಅವರ ಕಾರ್ಯಾಗಾರದಲ್ಲಿ ಪಾಲ್ಗೊಂಡು, ರೈತರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ, ಸರಳ ಭಾಷೆಯಲ್ಲಿ ಉಪಯುಕ್ತ ಪುಸ್ತಕವನ್ನು ಮಿತ್ರ ಚಾಮರಾಜ ಬರೆದಿರುವುದು ಸಂತಸದ ಸಂಗತಿ.

ಕೃಷಿ ಲಾಭದಾಯಕವಲ್ಲ ಎಂದು ರೈತರು ದೂರ ಉಳಿಯುತ್ತಿರುವ ಹಾಗೂ ನಗರಗಳಿಗೆ ವಲಸೆ ಹೋಗುತ್ತಿರುವ ಈ ಸಂದರ್ಭದಲ್ಲಿ ಎಲ್ಲ ರಂಗಗಳಿಗಿಂತ ಕೃಷಿರಂಗವೇ ಹೆಚ್ಚು ಲಾಭದಾಯಕವಾಗಬಲ್ಲದು ಎಂಬುದನ್ನು ಮನದಟ್ಟು ಮಾಡಿಸಲು ಈ ಪುಸ್ತಕದಲ್ಲಿ ಯತ್ನಿಸಲಾಗಿದೆ.

ಶ್ರೀ ಸುಭಾಷ ಪಾಳೇಕರ ಅವರ ಕಾರ್ಯಾಗಾರ ಒಂದು ಕೃಷಿ ಪದವಿಗೆ ಸಮಾನವಾದ ಸ್ಥಾನವನ್ನು ನೀಡುತ್ತದೆ. ಅದಕ್ಕೆ ಪೂರಕವಾಗಿ ’ರೈತರೇ ಬದುಕಲು ಕಲಿಯಿರಿ’ ಪುಸ್ತಕ ಹೊರಬಂದಿದೆ. ಈ ಚಿಕ್ಕ ಪುಸ್ತಕ ರೈತರಿಗೆ ಅರ್ಥವಾಗುವ ಭಾಷೆಯಲ್ಲಿ ಮೂಡಿ ಬಂದಿದ್ದು, ರೈತ ಸಮುದಾಯಕ್ಕೆ ಹೊಸ ಭರವಸೆ ಮೂಡಿಸುವಂತಿದೆ.

ಗಾಂಧಿ ಕನಸಿನ ಗ್ರಾಮಭಾರತಕ್ಕೆ ನನಸಿನ ಬುತ್ತಿ ಕಟ್ಟುತ್ತಿರುವ ಶ್ರೀ ಪಾಳೇಕರ ಅವರ ಪ್ರಯತ್ನಕ್ಕೆ ಪೂರಕವಾಗಿ ಸಂಪದ್ಭರಿತ ವಿಚಾರ ಮತ್ತು ಕೃಷಿ ವಿಧಾನಗಳಿಂದ ಮೈದುಂಬಿಕೊಂಡಿರುವ ಈ ಪುಸ್ತಕ ರೈತರಿಗೆ ಬದುಕಲು ಕಲಿಸುವ ಉತ್ತಮ ಪ್ರಯತ್ನ. ಮಾಗಿದ ಅನುಭವಗಳ ನಿರೂಪಣೆ ಪುಸ್ತಕದ ಪ್ರತಿಷ್ಠೆ ಹೆಚ್ಚಿಸಿವೆ.

ಈ ದೇಶ ನಿಜಕ್ಕೂ ಬಲಿಷ್ಠವಾಗಬೇಕೆಂದರೆ, ಬಡ ರೈತನ ಮುಖದಲ್ಲಿ ಉಲ್ಲಾಸದ ಕಳೆ ಮೂಡಿ ಬರಬೇಕೆಂದರೆ ಕೃಷಿ ಪದ್ಧತಿ ಸರಳವಾಗಬೇಕು. ಅದಕ್ಕೆ ಹಾಕುವ ಖರ್ಚು ತಗ್ಗಬೇಕು. ಇದು ಸಾಧ್ಯವಾಗುವುದು ಶ್ರೀ ಸುಭಾಷ ಪಾಳೇಕರ ಅವರ ನೈಸರ್ಗಿಕ ಕೃಷಿ ಪದ್ಧತಿಯನ್ನು ಸಂಪೂರ್ಣವಾಗಿ ಅನುಸರಿಸಿದಾಗ ಮಾತ್ರ. ಆ ವಿಧಾನಕ್ಕೆ ಚಾಮರಾಜ ಅವರ ಪುಸ್ತಕ ದಾರಿದೀಪವಾಗಬಲ್ಲದು. ಆತಂಕದಲ್ಲಿರುವ, ಸಂಕಷ್ಟಕ್ಕೆ ಸಿಲುಕಿರುವ ರೈತರು ನೆಮ್ಮದಿಯಿಂದ ಬದುಕುವುದನ್ನು ಕಲಿಸಬಲ್ಲುದು. ಅವರಲ್ಲಿ ಹೊಸ ಭರವಸೆ ಹುಟ್ಟಿಸಬಲ್ಲುದು. ಮಿತಿಮೀರಿದ ಜನಸಂಖ್ಯೆ, ಅಸಹಾಯಕತೆ, ಬಡನತ ಹಾಗೂ ನಿರುದ್ಯೋಗದಿಂದ ತತ್ತರಿಸಿ ದಿಕ್ಕುತಪ್ಪಿರುವ ರೈತ ಸಮುದಾಯಕ್ಕೆ ಈ ಪುಸ್ತಕ ಸುಗಮ ಬದುಕಿನ ದಿಕ್ಸೂಚಿಯಾಗಬಲ್ಲುದು.

ಬೆಳೆಗಳಿಗೆ ಹೊರಗಿನಿಂದ ಯಾವುದೇ ಗೊಬ್ಬರ, ಕೀಟನಾಶಕ ಹಾಕದೆ, ನೈಸರ್ಗಿಕವಾಗಿ ಲಭ್ಯವಿರುವ ಸಸ್ಯ, ಗೋಮೂತ್ರ, ಸಗಣಿ ಬಳಸಿ ಬೆಳೆಗಳಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಪಾಳೇಕರ ಅವರ ಕೃಷಿ ವಿಧಾನ ಭೂಮಿಯ ಸತ್ವ ಹೆಚ್ಚಿಸುವಂತೆ, ಕಂಗೆಟ್ಟ ರೈತರಿಗೆ ಕೃಷಿಯಲ್ಲಿ ಮತ್ತೆ ಆಸಕ್ತಿ ಹುಟ್ಟಿಸುವಂತೆ ಮಾಡುವಲ್ಲಿ ಈ ಪುಸ್ತಕ ಸಮರ್ಥವಾಗಿದೆ.

ರೈತರು ಸ್ವಾವಲಂಬಿಗಳಾಗಿ, ಸ್ವಾಭಿಮಾನಿಗಳಾಗಿ, ಮತ್ತೆ ಅನ್ನದಾತರಾಗಿ ಬದುಕಬೇಕೆಂದರೆ, ನೆಮ್ಮದಿಯ ಬದುಕು ಸಾಗಿಸಬೇಕೆಂದರೆ, ಶ್ರೀ ಪಾಳೇಕರ ಅವರ ವಿಚಾರಧಾರೆಯನ್ನು ಕನ್ನಡದಲ್ಲಿ ಹೊರತಂದಿರುವ  ಶ್ರೀ ಚಾಮರಾಜ ಸವಡಿ ಅವರ ’ರೈತರೇ ಬದುಕಲು ಕಲಿಯಿರಿ’ ಪುಸ್ತಕವನ್ನು ಓದಬೇಕು. ಇದು ನಮ್ಮ ರೈತರಿಗೆ ಜೀವಾಮೃತವೂ ಹೌದು.