ವಿಜಯಪುರದ ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯದ ವಿಶ್ರಾಂತ ಕುಲಪತಿಗಳಾಗಿರುವ ಸಬಿಹಾ ಭೂಮಿಗೌಡ ಮೂಲತಃ ಗದಗ ಜಿಲ್ಲೆಯ ರೋಣ ತಾಲ್ಲೂಕಿನ ಗಜೇಂದ್ರಗಡದವರು.  ತಂದೆ ಎಂ.ಆರ್. ಗಜೇಂದ್ರಗಡ, ತಾಯಿ ಸಾಹಿರಾ. ಎಂ.ಎ., ಪಿಎಚ್.ಡಿ. ಪಡೆದು ಪ್ರಾಧ್ಯಾಪಕಿಯಾಗಿ ಮಂಗಳೂರು ವಿಶ್ವವಿದ್ಯಾಲಯದ ಕನ್ನಡ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿದ ಅವರು ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಸಿಂಡಿಕೇಟ್ ಸದಸ್ಯರು, ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಸದಸ್ಯರು, ಕರಾವಳಿ ಲೇಖಕಿಯರು ಮತ್ತು ವಾಚಕಿಯರ ಸಂಘದ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಿದ್ದಾರೆ.
ಬಗೆ (ವಿಮರ್ಶೆ) 2001, ಚಿತ್ತಾರ (ಕಾವ್ಯ) 2004, ಕನ್ನಡ ಭಾಷಾ ಪ್ರವೇಶ (ಸಹಲೇಖಕರೊಂದಿಗೆ) 2005, ನಿಲುಮೆ (ವಿಮರ್ಶೆ) 2005, ನುಡಿಗವಳ (ಮಹಿಳಾ ಅಧ್ಯಯನ) 2006, ಕನ್ನಡ ಮಹಿಳಾ ಸಾಹಿತ್ಯ ಚರಿತ್ರೆ (ಸಹಲೇಖಕರೊಂದಿಗೆ) 2006, ಲೀಲಾ ಬಾಯಿ ಕಾಮತ್ ಬದುಕು ಬರೆಹ (ವ್ಯಕ್ತಿಚಿತ್ರ) 2008, ಒಂದಾಣೆ ಮಾಲೆಯ ಸಾಹಸಿ: ಕುಟ್ಟಿ ವಾಸುದೇವ ಶೆಣೈ (ವ್ಯಕ್ತಿಚಿತ್ರ) 2008, ಲಿಂಗತ್ವ ಸಮನ್ಯಾಯದೆಡೆಗೆ 2008, ಅವಿವಾಹಿತ ಮಹಿಳೆ: ಸಮಾಜೋ ಸಾಂಸ್ಕೃತಿಕ ಅಧ್ಯಯನ 2008 (ಸಹಲೇಖಕರೊಂದಿಗೆ), ಕಡಲತಡಿಯ ಮನೆ (ಸಣ್ಣಕಥೆ) 2009, ನುಡಿಹೊನಲು (ಚಿಂತನ ಲೇಖನಗಳು) 2010 ಪ್ರಕಟಿತ ಕೃತಿಗಳು.

ಸರಸ್ವತಿಬಾಯಿ ರಾಜವಾಡೆ ಅವರ ಆಯ್ದ ಕತೆಗಳು 1994, ಪ್ರಬಂಧ 1999 (2000) ನಾವು ಮತ್ತು ನಮ್ಮ ಪರಿಸರ 2004, ಕರಾವಳಿಯ ಕಥೆಗಳು 2006, ಕನ್ನಡ ಸಾಹಿತ್ಯ ಮತ್ತು ಮಹಿಳೆ 2007, ಮಹಿಳಾ ಸಾಹಿತ್ಯ 2018, ಕನ್ನಡ ಸಾಹಿತ್ಯ ಮೀಮಾಂಸೆ 2008, ಸಂಸ್ಕೃತಿ ಮಹಿಳಾ ಮಾಲಿಕೆ ಸಂಪುಟ-1 2008 ಮಹಿಳಾ ಆತ್ಮಕಥೆಗಳು : ಅನುಸಂಧಾನ 2008, ಮಹಿಳೆ ಸಂಘಟನೆ ಹೋರಾಟ 2008, ದಕ್ಷಿಣ ಕನ್ನಡ ಜಿಲ್ಲೆಯ ಮಕ್ಕಳ ಸಾಹಿತ್ಯ 2009, ನಾವು ಮತ್ತು ನಮ್ಮ ಪರಿಸರ ಭಾಗ-2 2009, ಕುವೆಂಪು: ಶತಮಾನೋತ್ತರ ನೋಟ 20009, ಚಂದ್ರಗಿರಿ (ಸಾರಾ ಅಬೂಬಕ್ಕರ್‌ ಅಭಿನಂದನ ಗ್ರಂಥ; 2009) ಸಂಪಾದಿತ ಕೃತಿಗಳನ್ನು ಹೊರತಂದಿದ್ಧಾರೆ.