ಮೂರನೇ ಕನಸು 

ನನ್ನೆಡೆಗೇ ಬರುತ್ತಿರುವ
ಚೆಲುವ ಚೆನ್ನಿಗರಾಯ

ಆರಡಿ ಬಯಲ ದಾಟಿ
ಏಳಡಿ ಕಡಲ ಸೀಳಿ
ಎಂಟನೇ ಅಡಿ ಸೀದಾ
ನನ್ನೆದೆಯ ಮೇಲೆಯೆ!

ಎಷ್ಟು ದಿನವಾಯ್ತು
ಮಳೆಯಿಲ್ಲ ನೆಲಕೆ
ಮುತ್ತಿಲ್ಲ ತುಟಿಗೆ
ಗಾಯಗೊಂಡ ನೆಲ
ಒಣಗಿದ ತುಟಿ
ಅವನ ಕಣ್ಣೊಳು ಹೊಕ್ಕ ನನಗೆ
ತಣ್ಣನೆ ಕತ್ತಲ ದರ್ಶನ

ಯಾಕೆ ಬರುತ್ತಿರುವನು ಈಕಡೆ
ಯಾರು ತೋರಿದರು ಈ ದಾರಿ
ಏನಿರಬೇಕು ಅವನ ಹೆಸರು
ಯಾರಿಟ್ಟರು ಆ ಹೆಸರು

ಮೂರಡಿ ನೆಲವ ಹಾಸಿ
ನಾಲ್ಕಡಿ ದೂರದಿ ನಿಂದು
ಐದಡಿ ನೆರಳ ಮೇಲೆ ನೆರಳು
ಅವನೊಳಹೊಕ್ಕ ನನಗೆ
ಯಾವ ಹೆಸರು
ಯಾವ ದೆಸೆ

ಗಾಯಗೊಂಡ ನನಗೆ ಅವನಿಗೆ
ಈ ರಾತ್ರಿಗೆ
ತೊಗಲಿನಾಸರೆ
ಕತ್ತಲಿನಾಸರೆ
ಬಿಟ್ಟರೆ

ಹಾದುಬಂದ ಬಯಲು
ದಾಟಿಬಂದ ಕಡಲು
ಹಾಸಿ ಮಲಗಿದ ನೆಲ
ಪಾರಾಗಬೇಕಿದೆ ನಾನು ನನ್ನಿಂದ
ಅವನು ಅವನಿಂದ
ಇಬ್ಬರೂ ಈ ಕನಸಿನಿಂದ