ಭೈರಾಗಿ

ಆ ಊರಿನಲ್ಲೊಬ್ಬ
ವಿರಾಗಿ ಧರ್ಮ ಗುರುವಿದ್ದ
ವಿಭೂತಿ ಭೂಷಣ ಜಟಾಧಾರಿ
ವೇಧಾಂತ ಪಠಣ ಮಣಮಣ ಮಂತ್ರ ಸದಾ
ಮೌನದ ಕುರಿತು ಮಾತಾಡುತ್ತಲೇ ಇದ್ದ
ಮಂದಿ ಹೌದೌದೆಂದು ತಲೆಯಾಡಿಸಿ
ಕಾಲಿಗೆರಗುತ್ತಿದ್ದರು

ಒಮ್ಮೆ ತೊರೆಯಂತೆ ಹರಿಯುತ್ತಿದ್ದ
ಪ್ರವಚನದ ನಡುವೆ ತೂರಿಬಂದ
ಹಳ್ಳಿಗನ ಪ್ರಶ್ನೆಯ ಸಿಬಿರೊಂದು
ಗುರುವಿನ ಗಂಟಲಿಗೆ ನಾಟಿತು
ಆದಿ ಶಂಕರನ ಮರ್ಮಕ್ಕೆ ತಾಕಿದ
ಚಂಡಾಲನ ಪ್ರಶ್ನೆಯಂತೆ
ಗುರು ತತ್ತರಿಸಿ ನಿರುತ್ತರನಾದ

ಉತ್ತರಕ್ಕಾಗಿ ಹುಡುಕಿ ತಡಕಾಡಿದ
ಧರ್ಮಗ್ರಂಥ ಅಕ್ಷರದ ಪಾಂಡಿತ್ಯ
ನೆರವಿಗೆ ಬರಲಿಲ್ಲ
ಧ್ಯಾನಕ್ಕೆ ದಕ್ಕಲಿಲ್ಲ

ಸತ್ಯವ ಅರಸಿ
ಅಲೆದಲೆದು ಅಲೆಮಾರಿಯಾಗಿ
ಊರು ಕೇರಿ ಮಂದಿರ ಮಸೀದಿಗಳ ಸುತ್ತಿದ
ಹಿಮಾಲಯದ ತುತ್ತ ತುದಿ ಏರಿದ
ಹಾದಿ ಇಲ್ಲದ ತುದಿಯಲ್ಲಿ ಕೂತು
ಏನುಮಾಡುವುದು ?
ಕೆಳಗಿಳಿದು ಕಾಡಿನ ಪಾಲಾದ

ನಿಶ್ಯಬ್ದದ ಹಾಡಿಗೆ ಕಿವಿಯಾದ
ಹತ್ತಾರು ನದಿಗಳ ರುಚಿ ನೋಡಿದ
ಹಲವು ಹೂಗಳ ಮೂಸಿದ
ಬಿಸಿಲು ಚಳಿ ಮಳೆಗೆ ಮೈ ಯಾದ
ಬಯಲಾಗಿ ಮೌನವಾದ
ತುಂಬಿ ಕೊಂಡ ಜ್ಞಾನವ ಸುರಿದು
ಉರಿದುರಿದು ಬರಿದಾಗಿ
ವಿಭೂತಿಯೇ ಆದ..

ಅವನ ಮೌನ ಕುರಿತು
ಈಗ ಜನ ಮಾತಾಡತೊಡಗಿದರು
ಸತ್ಯ ಹರಿಯತೊಡಗಿತು ಬೆಳಕಿನಂತೆ

- ಹಂದಲಗೆರೆ ಗಿರೀಶ್