ತರುವನೇನವ ಸುಖವ 

ಹಸುಗೂಸು ಅಳುತಿರಲು
ಹಸಿವೆನುತ ಬಳಿಬಂದು
ತುಸುವೆ ನೀಡಲು ತುತ್ತು ಬಳಿಯಲಿಲ್ಲ
ಬಸಿದರೂ ಜೀವವನೆ
ಹುಸಿಯಾಯ್ತು ಕನಸೆಲ್ಲ
ದೆಸೆಯೊಳಿತು ನನ್ನೆಡೆಗೆ ಸುಳಿಯಲಿಲ್ಲ

ಇರಲೊಂದು ಸೂರಿಲ್ಲ
ನೆರವಾಗೊ ಮನವಿಲ್ಲ
ಬಿರುಬಿಸಿಲಲೇ ಕರ್ಮ ಸಾಗುತಿದೆ ನಿರತ
ಉರಿವ ಬೆಂಕಿಯ ಎದುರು
ಸುರಿಸಿದರು ಕಂಬನಿಯ
ಅರಿವೊಂದು ಮನವಿಲ್ಲ ನೋವ ಮಿಡಿತ

ರಚ್ಚೆ ಹಿಡಿದರು ಕಂದ
ಮುಚ್ಚಿಕೂರುವೆ ಕಿವಿಯ
ಬಚ್ಚಿಡುತಲೆಲ್ಲ ಕಲ್ಲೆದೆಯ ಮಾಡಿ
ಹುಚ್ಚುಗೊಂಡರು ಮನವು
ಹೆಚ್ಚುತಲಿಯೊಡಲಿನುರಿ
ಮೆಚ್ಚದೀ ಜೀವ ಬದುಕುವುದ ಬೇಡಿ

ಧರೆಗಿಳಿಸಿದಾ ದೇವ
ಮರೆತಹಾಗಿದೆಯೇಕೊ
ನರಳಿದರು ಜೀವ ಸಹಿಸುತಲಿ ಬೇಗೆ
ತೆರೆದು ಬೆಳಕಿನ ಹಾದಿ
ಕರುಣೆಯನು ತೋರುತಲಿ
ತರುವನೇನವ ಸುಖವ ಒಂದು ಘಳಿಗೆ

ಅನ್ನಪೂರ್ಣಾ ಬೆಜಪ್ಪೆ