ವಿಳಾಸ ಮರೆತ ಪತ್ರ....

"ಗೆ"

ಮೈ
ಡಿಯರ್
ಮರೆತು ಬಿಟ್ಟ ಒಲವೇ

ಸ್ಥಳ ಮತ್ತು ದಿನಾಂಕ : ವಿಳಾಸ ಮರೆತ ಪತ್ರ

ವಿಷಯ : ಈ ಕೆಳಗಿನಂತೆ

ಈ ಮೇಲ್ಕಾಣಿಸಿದ ನಾನು ಅಂದರೆ
ತುಸು ಪೋಲಿ ಅತಿ ಪ್ರೇಮಿಯ ಬಿನ್ನಹಗಳು

ಈಗ

*ನಿನ್ನ ಹೆಸರು ಗೀಚದ ಶಹರದ ಗೋಡೆಗಳು ಬಿದ್ದು ಬಿಡಲಿ
*ನಿನ್ನ ಮುಂಗುರುಳು ಸೋಕದ ಗಾಳಿ ಇನ್ನು ಮುಂದೆ ಬೀಸದಿರಲಿ
*ಇಳಿ ಸಂಜೆ ನಾವಿಬ್ಬರೂ ಕದ್ದಾಡಿದ ಪಿಸು ಮಾತುಗಳ ಕಾಯದ ಸಂಜೆ ಸಾಯಲಿ
*ನೀನಿರದ ಕನಸುಗಳು ಎಂದು ರಾತ್ರಿಗೆ ಬಾರದಿರಲಿ

ಮುಂದೆ

* ಹಿಡಿದಿಡಲಾರದಷ್ಟು ಒಲವಿದೆ ಬೊಗಸೆ ಹೃದಯದಲಿ
*ಬಟ್ಟಲು ಕಣ್ಣುಗಳಲ್ಲಿ ಬೆಳದಿಂಗಳ ತುಂಬಿರುವೆ
*ನನ್ನ ಸೋಲಿಸುವ ನಿನ್ನ ನಗುವಿಗೆ ನಿತ್ಯವೂ ಮೌನದ ಸುಂಕ ಕಟ್ಟುತಿರುವೆ
*ಅಕ್ಕಿ ಬೆಲ್ಲ ತುಂಬಿಟ್ಟ ಸೇರು ಹೊಸ್ತಿಲ ಮೇಲಿದೆ

ಮತ್ತೆ

*ಜಿಂದಗಿಯಲ್ಲಿ "ನಾನು" ಗರೀಬ
ಪ್ರೇಮವನ್ನಷ್ಟೆ ಕೊಡಬಲ್ಲೆ
ಕಾವ್ಯವನ್ನಷ್ಟೆ ಕಟ್ಟಬಲ್ಲೆ

ಸದ್ಯಕ್ಕೆ

ನಿನ್ನ ನಶೆಯಲ್ಲಿರುವೆ
ಜಗದ ಯಾವ ನೋವು
ನನ್ನನ್ನು ಬಾಧಿಸುವುದಿಲ್ಲ

"ಇಂದ"

ತುಸು ಪೋಲಿ ಅತಿ ಪ್ರೇಮಿ
ಒಂಟಿ ರೂಮು
ನೀನು ಎಂದು ಬರದ
ಬೀದಿ ಕೊನೆ ತಿರುವು

- ಅಭಿಷೇಕ ಬಳೆ ಮಸರಕಲ್