ವಲಸೆ ಬಂದ ಹಕ್ಕಿಗಳ ಹಾಡು

ಒಂದು ಚೂರು ರೊಟ್ಟಿಗಾಗಿ
ಊರ ಮರವ ತೊರೆದು
ವಲಸೆ ಬಂದ ಹಕ್ಕಿಗಳಿಗೆ
ಇಂದು ಮರಳಿ ಗೂಡು ಸೇರುವ ದಾರಿ ಕಾಣಿಸುತಿಲ್ಲ
ಹಿಡಿ ಕಾಳು ಕಡಿ ನಂಬಿ ಬಂದ ಪಕ್ಷಿಗಳಿಂದು
ನಡುಬೀದಿಯ ಬಯಲಲ್ಲಿ ಬಂಧಿಯಾಗಿವೆ

ರೆಕ್ಕೆಯ ಮೇಲೆ ಮರಿಗಳ ಹೊತ್ತು ಹಾರಿ ಹೊರಡೋಣವೆಂದರೆ
ಗಡಿಗಡಿಗಳ ತುಂಬಾ ಗೋಡೆಗಳೆದ್ದಿವೆ

ನೆಲಮನೆಯಿಂದ ಮುಗಿಲೆತ್ತರದ ಮಹಡಿಗಳ
ರಟ್ಟೆಯಿಂದಲೇ ಕಟ್ಟಿದ ಹಕ್ಕಿಗಳನು
ಕಾನೂನು ಮುರಿದರೆಂದು ಕೈಕಾಲು ಮುರಿದು
ಹಡೆಮುರಿಗೆ ಕಟ್ಟಿ ರಸ್ತೆಗೆ ಎಸೆಯಲಾಗಿದೆ
ಸಂವಿಧಾನದ ಅನುಷ್ಠಾನವೆಂದರೆ ಈಗೀಗ ಹೀಗೆಯೇ

ಬೊಗಸೆ ಕಾಳು ತಿಂದು ಬಂದ ಬಾಹುಬಲದಿಂದ
ಟನ್ನುಗಟ್ಟಲೆ ಸುಟ್ಟ ಇಟ್ಟಂಗಿಗಳ
ಹೊತ್ತು ಹಾರಿ
ಗಗನ ಚುಂಬಿ ಕಟ್ಟಡಗಳ ಕಟ್ಟಿದ ಹಕ್ಕಿಗಳನು
ಇಂದು ನಗರ ಪಂಜರದಾಚೆ
ಹಾರಲು ಬಿಡುತಿಲ್ಲ
ಟನ್ನುಗಟ್ಟಲೆ ಇಲಿ ಹೆಗ್ಗಣ ತಿಂದ
ಮುಗ್ಗಸು ಅಕ್ಕಿಗಳ ಮೂಟೆ ಮುಂದಿಟ್ಟು
ಎಷ್ಟು ಬೇಕಾದರೂ ತಿನ್ನಿ ನಗರಕ್ಕೆ ಜೈ ಎನ್ನಿ
ಎಂದವರ ಉಪಕಾರ
ಹೇಗೆ ತೀರಿಸುವುದು ತಿಳಿಯುತಿಲ್ಲ

ಹಿಂದಕ್ಕೋ ಮುಂದಕ್ಕೋ ಪಯಣ ಜಾರಿಯಲ್ಲಿದೆ
ಹಾದಿಯುದ್ದಕೂ ಬಿದ್ದಿರುವ
ಹಸಿವಿನ ಬೀಜಗಳ ಒಂದೊಂದಾಗಿ ಆಯ್ದು
ಮರಿಗಳಿಗೆ ತುತ್ತು ಮಾಡಿ ತಿನ್ನಿಸುವ ತಾಯಿ ಹಕ್ಕಿಗಳು
ಹರಿದ ಆಕಾಶದಲ್ಲಿ
ಚೂರು ಚೂರಾದ ಚಂದಿರನ ತೋರಿಸಿ
ಕಣ್ಣೀರು ಕರಗಿಸುವ ಲಾಲಿಹಾಡು ಹುಡುಕುತ್ತಿವೆ
ಸುತ್ತಮುತ್ತಲೂ ಬಂದೂಕು ಲಾಟಿ ಬಿಲ್ಲುಗಳು
ಒಟ್ಟಿಗೆ ಸೇರಿ ಬೇಟೆಯಾಡಲು ಮಾತನಾಡಿಕೊಳ್ಳುತ್ತಿವೆ
ಮತ್ತೆ ಹೇಳುತ್ತಿವೆ
ಕಾನೂನು ನಿಮ್ಮನ್ನು ರಕ್ಷಿಸುತ್ತದೆ

ನಮ್ಮುದ್ಧಾರಕೆ
ಜನ್ಮವೆತ್ತಿ ಬಂದ ಅವತಾರ ಪುರುಷರು ನೀವು
ನಿಮ್ಮ ನೆತ್ತಿಯನೆಂದೂ ಕುಕ್ಕುವುದಿಲ್ಲ ನಾವು
ಕೊಕ್ಕು ಮಾತ್ರ ಮುರಿಯಬೇಡಿ
ಹಾರುವುದನೆ ಮರೆತಿವೆ ರೆಕ್ಕೆ
ಬೆಂಕಿ ಹಚ್ಚಬೇಡಿ
ಇನ್ನುಮುಂದೆ
ನಿಮ್ಮ ಘನಚರಿತೆಯ ಹಾಡುಕಟ್ಟಿ ಹಾಡಲಾರೆವು ನಾವು
ಕುತ್ತಿಗೆಗೆ ಕುಣಿಕೆ ಹಾಕಬೇಡಿ
ಒಂದು ಹಿಡಿ ಕಾಳಿಗಾಗಿ
ವಲಸೆ ಬಂದ ಹಕ್ಕಿಗಳು ನಾವು
ಒಂದೇ ಒಂದು ಸಾರಿ ಊರ ಮಾರಿ
ನೋಡಿ ಬರುತ್ತೇವೆ ದಯಮಾಡಿ ಕರುಣೆ ತೋರಿ

ಇಲ್ಲವೇ
ನೀವೇ ಕಟ್ಟಿದ ಅರಗಿನ ಪಂಜರದೊಳಗೆ
ನಾವೇ ಒಟ್ಟಿಗೆ ಹೋಗುತ್ತೇವೆ
ತಡಮಾಡದೆ ಸುಟ್ಟುಬಿಡಿ

ದಯವಿಟ್ಟು ಗಮನಿಸಿ :
ಮಾನವ ಹಕ್ಕುಗಳ ಕಾನೂನು ವಲಸೆ ಬಂದ ಹಕ್ಕಿಗಳಿಗೆ
ಅನ್ವಯಿಸುವುದಿಲ್ಲ.