ಟಮೋಟೋ ಸುಂದರಿ

ಓ ನನ್ನ ಕೆಂಪು ಮೊಗದ ಮುದ್ದು ಮುದ್ದಾದ ಸುಂದರಿ
ಇತ್ತೀಚೆಗೆ ನೀನಾಗುತಿರುವೆ ಏಕೆ ಮತ್ತಷ್ಟು ದುಬಾರಿ//

ನಿನ್ನಿಲ್ಲದೇ ಈರುಳ್ಳಿಯು ಆಗಿಹನು ಬ್ರಹ್ಮಚಾರಿ
ಅವನರಸಿಯಾಗಿ ಬಂದು ಬಿಡು ಬೇಗ ನೀ ರಂಗೇರಿ//

ಏ ವಯ್ಯಾರಿಯೇ ನಿನಗೇತಕೆ ಈ ತರದ ಮುನಿಸು
ಅಡುಗೆಯಲ್ಲಿ ನೀನಿಲ್ಲದೇ ನಾಲಿಗೆಗಿಲ್ಲ ಸೊಗಸು//

ಎಲ್ಲರ ಮನೆ ಮನೆಯಲ್ಲೂ ಮಹಾರಾಣಿ ನೀನು
ನಿನ್ನಯ ಬೆಲೆಯು ಗಗನಕ್ಕೇರಲು ಕಾರಣವೇನು//

ನಿನ್ನನು ದೋಚಲು ಕಾಯುತಿಹರು ಕಳ್ಳ ಖದೀಮರು
ಹಗಲು ರಾತ್ರಿ ಕಾವಲು ಕುಳಿತಿರುವ ನಿನ್ನ ಬೆಳೆದ ರೈತರು//

ನಿನ್ನ ಬೆಲೆ ತಿಳಿಯದೇ ತುಂಡರಿಸಿ ಹಾಕುತ್ತಿದ್ದೆ ಆಗ
ನಿನ್ನ ಮೊಗವನ್ನು ನೋಡುವುದು ಕಷ್ಟವಾಗಿದೆ ನನಗೀಗ //

ಬೇಗನೇ ಬಂದು ನಾರಿಯರ ಅಡುಗೆಮನೆ ನೀ ಸೇರು
ನಿನ್ನನು ಫ್ರಿಜ್ಜಲಿ ಶೇಖರಿಸಿಟ್ಟು ತಗೆದುಕೊಳ್ಳುವೆ ನಾ ಕೇರು///

- ರೇಣುಕಾ ಶಿವಕುಮಾರ