ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ತೊಟ್ಟಲಕ ಗುಳದಾಳಿ ಕಟ್ಟಿದವರ್ಯಾರ
ಕಾಣಬೇಕಂದರ ಕೊಂಚಿಗಿ ಮರಿಯಾತ
ಕೊಂಚಿಗಿಯ ದೌರ ಬಾಯಾಗ ಜಬಡೂತ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ಕುಂಟಲಪಿ ಆಡ್ಯಾಡಿ ಅಂಡ್ಯಾಳ ತೂರ್ಯಾಡಿ
ಗಣಗಳಕಿ ತುಂಬ ಹುಂಚೀಯ ಚಿಗಳಿ
ಚಿಟಮೀರಿ ಚನ್ನಕ್ಕನ ಯಾರು ಚಿವಟಿದರೇನ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ಕತ್ತಲಿನ ಕಂಟ್ಯಾಗ ಬೆಳಕೀನ ಹೂವ
ಕೆಂಪಾನ ಹಣ್ಣ ಉದುರುದುರಿ ಬಿದ್ದಾವ
ಎಂಥ ಘಾತಾತ ಏನೀ ಗುಣಾಚಾರ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ನೂರೆಂಟ ಬೀಜ ದಿನದಿನಕೂ ಬಿತ್ತಾನ
ಹದಮಾಡಿ ಹೊಲವ ಹರಗುವರ ನೋಡ
ಮಡಿತುಂಬ ಮೆಳಕಿ ತಲಿತುಂಬ ಬಳಗ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ಕುಡಿಯೊಡದ ಮಿಡಿ ಮೂಡಿ ಒಗರೊಗರ
ತ್ವಾಟೀಯ ಒಡದ ಪುಟದಾವ ಸುತ್ತೆಲ್ಲ
ಊರೆಲ್ಲಾ ಫಸಲ ಸೂರೆಲ್ಲಾ ಮಳಿನೀರ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ಕಾಳೀನ ನಿಟ್ಟ ಕಣಕಣಜ ತುಂಬಿ ತುಂಬಿ
ಸಾರಿಸೀದ ಗಳಿಗಿ ಸ್ಯಾವಿಗಿ ಎಳಿಯ
ಸಕ್ಕರಿ ಸುರುಸುರುವಿ ಉಣುವಾಗ ಸರದಾರ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ನೆಲಿವೀನ ಹಗ್ಗಕ್ಕ ಬಿಗದ ಕಟ್ಟಿದ ಎದಿಯ
ತಡವಲಿಲ್ಲ ಗಂಟ ಬಿಚ್ಚಿಲ್ಲ ಕಡಿತನಕ
ಕುಂತಲ್ಲಿ ಒಳ್ಳ ಕುಟ್ಟಾಕ ಒನಕಿ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

ಮನಿತುಂಬ ಕಿಡಕಿ ಹಣಕಿ ನೋಡುವರ್ಯಾರ
ಕೈತುಂಬ ಹುಣ್ಣ ಮುಟಗಿ ಬಿಚ್ಚುವರ್ಯಾರ
ಕಣ್ತುಂಬ ರಗತ ಕಿವಿತುಂಬ ಅಳ್ಳಿ
ನೆಲ್ಲಕ್ಕಿ ತುಳಿಲಾಕ ನೆದರ್ಯಾಕ ಬೇಕ

-ಭುವನಾ ಹಿರೇಮಠ