ಮೇಣಕ್ಕಂಟಿದ ಬತ್ತಿ

ನಾನು ನೀನಾಗಿ ನೀನು ನಾನಾಗಿ
ಒಲುಮೆಯೊಳಾಡುವುದು ಗಾಢವಾಗಿ ಬೆಸೆಯುವುದು
ನೀನಿರದೆ ನಾನಿರಲಾಗದ ಬಂಧದಲಿ
ನೂರ್ದನಿಗಳು ಮಾರ್ದನಿಸಿ ಒಂದೇ ಜೀವಾತ್ಮದಂತೆ
ಒಮ್ಮನಸ್ಸಿನಿಂದ ಕೂಡಿ ನಡೆಯುವುದು

ನಮ್ಮೊಳಗಿನ ಭಾವ ವಿನಿಮಯದೊಳು
ಮಾತು ಪುಟಗಳ ಮೀರಿ ಸಂಪುಟವಾಗುವುದು
ನಿಶೆಯ ಹಿರಿಮೆ ಗರಿಮೆಗಳ ಬಣ್ಣಿಸುವುದು
ನಾವಿರುವ ಹಾಗೆಯೇ ಅಲ್ಲೆಲ್ಲ ಸುತ್ತಿ ಬರುವುದು

ನೀನು ಘನವಾಗಿರುವ ವೇಳೆಯಲಿ
ಎದೆ ಬಾಗಿಲಲಿ ನಿಂತು ಇಣುಕಿ ನೋಡುವುದು
ಅತ್ತಿತ್ತ ಹಾಯುವ ಭಾವಗಳನು ಮೆಲುಕು ಹಾಕುವುದು
ಇನಿತಿನಿತಾಗಿ ಕರಗಿ ಲೀನವಾಗುವ ಬಗೆಯನು ಕಾಯುವುದು

ಇಷ್ಟಗಳ ಕೂಟದಲಿ ಬಿರುಕುಗಳು ಮೂಡದಂತೆ
ಕನಸಿನ ಕೂಸುಗಳು ನಿತ್ರಾಣವಾಗದಂತೆ
ಭಾಷೆ ಪರಿಭಾಷೆಗಳ ಬಲದಲಿ ಬಲಿತು
ನಿನ್ನಂತೆ ನಾನೂ ಅನುವಾಗುವುದು

ನಾವಾಗಿರುವಾಗ ಮನಸಿಗೊತ್ತಿಕೊಂಡವುಗಳ ಸಲುವಾಗಿ
ಕಾಣದ ಕೈಗಳು ನೀಡಿದ ತೀರ್ಪಿಗೆ
ಇಷ್ಟಿಷ್ಟೇ ಉಸಿರ ಕೋಶದಿಂದಿಳಿದು ಬಯಲಿಗೆ ಬಂದು
ಹೆಜ್ಜೆಗಳ ಹೆಣೆದು ಅಖಂಡವಾಗುವುದು
ಬೆಳಕಲಿ ಅರಳಿದ ಬದುಕಿನೊಳು ಅಂತರ್ಗತವಾಗುವುದು

ಅನಿತಾ ಪಿ. ತಾಕೊಡೆ