ವರ್ತ-ಮಾನ

ಅಂಗಳದ ಅಡಿಕೆ ಅಟ್ಟದಡಿ ನೆಟ್ಟ ಕಂಬಕ್ಕೆ
ಒರಗಿಸಿಟ್ಟ ವಯಸ್ಸಾದ ಸೈಕಲ್ಲು
ನೋಡುತ್ತ ಕುಳಿತವಳಿಗೆ ನೆನಪಾಗುತ್ತದೆ
ತನ್ನ ಸ್ಥಿತಿ-ಗತಿ-ತೋಟ-ಮನೆ
ಉಂಡುಟ್ಟು ಬದುಕಲು ಸಾಕಷ್ಟು
ಆದರೆ ಎದುರಿಗಿನ ಊರ ರಸ್ತೆಯ ತುಂಬ
ಆಚೀಚೆ ಮನೆಯ ಹುಡುಗರ ಕಾರು-ಬೈಕು
ಆಗಾಗ – ಅವರವರ ಅನುಕೂಲಕ್ಕೆ ತಕ್ಕಂತೆ
ಪುರುಸೊತ್ತಾದಾಗ ಬಂದು – ಹೋಗುವ
ಬೆಂಗ್ಳೂರು ಸೇರಿದವರ ಠಾಕು - ಠೀಕು
ನೋಡ-ನೋಡುತ್ತಲೇ ಸೆಳೆತ ಒಳಗೆ
ತನ್ನ ಮಕ್ಕಳೂ ಹಾಗಾಗಲೆಂಬ ಹಾರೈಕೆ
ಕಾಲ ಕಳೆದಂತೆ – ಅವರು ಬೆಳೆದಂತೆ
ಹುಟ್ಟೂರ ಬಿಟ್ಟು ಹೊರಟು – ಎಲ್ಲೆಲ್ಲೋ ಸೇರಿ
ಆದಾಗ ಮನೆಯತ್ತ ಭರ್ ಎಂದು
ಬರುವ ಸಂಭ್ರಮದಲ್ಲಿ ಹಿಗ್ಗಿದವಳು
ಅವರ ಮಕ್ಕಳೂ ಹೊರಕ್ಕೆ ಹಾರಿ
ತನ್ನ ಮನೆಯಂಗಳದ ಮೇಳಣ ಆಗಸದಲ್ಲಿ
ವಿಮಾನಗಳಲ್ಲಿ ಸಂಚರಿಸುವ ಸ್ಥಿತಿ ನೆನೆದು
ಪುಳಕಗೊಳ್ಳುತ್ತಲೇ ಒಳಗೊಳಗೆ
ಅಂಗಳ ಸಾರಿಸುತ್ತಲೇ ದಿನಗಳು ಉರುಳಿ
ಎಲ್ಲರೂ ದೂರಾಗಿ – ಅಪರೂಪವಾಗಿ
ಆರೋಗ್ಯದಲ್ಲೀಗ ವಿಪರೀತವಾಗಿ
ಕಾಲು ಬುಡದಲ್ಲಿ ಇದ್ದಿದ್ದರೆಂಬ ಯೋಚನೆ
ಚಿಂತೆಯಾಗಿ ಸುಡುವ ಒಡಲಿಗೆ
ಆಡುವ ಬಾಯಿಯೇ ಬತ್ತಿಹೋಗಿದೆ
ಪ್ರಪಂಚ ಬದಲಾಗುತ್ತಲೇ ಇದೆ
ಬಯಸಿದಂತೆ – ಬಂಯಸದಂತೆ – ತನ್ನಿಷ್ಟದಂತೆ!

-ರವೀಂದ್ರ ಭಟ್ಟ ಕುಳಿಬೀಡು