ಕಲಾವಿದನ ಸೆರೆಗೂ ಸಿಗದ ಚಿತ್ರ

ಮುಳುಗಿ ಹೋಗಿದ್ದೇವೆ
ಇಬ್ಬರೂ
ಕಡಲು ಕಣಿವೆ ದಾಟಿ
ಸಮುದ್ರ ಮುಟ್ಟಿ

ಇಬ್ಬರಲ್ಲೂ ಜೀವ ಭಯ
ಕೈಗಳು ಸಡಿಲಗೊಳ್ಳದೆ ಬಿಗಿಯಾಗುತ್ತಲೇ ಹೋದವು
ಭಾವ ಎದೆ ತುಂಬಿ
ಮೈ ತುಂಬಾ ಕೈಯಿ ಮೂಡಿದವು

ನಿಶ್ಯಬ್ಧ ನೀಲ ನೀರಿನಲ್ಲಿ
ಮುಖದ ಚಹರೆಯಿಲ್ಲ
ತಿಮಿಂಗಿಲ ನೀರಾವು ಮೀನುಗಳ ಭಯವಿಲ್ಲ
ದಿಗಂತದ ದೂರು ಆ ನೀರಿನ ಆಳ

ಬೆತ್ತಲಾದ ದೇಹಗಳಲ್ಲಿ
ಕಾಮವಾಂಛೆಯ ಬಿಗಿತವಿಲ್ಲ
ಅಂಗಾಂಗವನ್ನೂ ಮುಟ್ಟುವಂತಿಲ್ಲ
ಬಿಡಿಸಿಕೊಳ್ಳದ ಕರಗಳಲ್ಲೂ
ನನ್ನದೆಂಬ ಸ್ವಾರ್ಥ ಬಿಂದು

ಭಾವಕಲಸಿದ ಬಿಸಿ ಕಣ್ಣೀರು
ಸಮುದ್ರದೊಳು ಸೇರಿಹೋಗುವಾಗ
ಯಾವ ಕಲಾವಿದನಿಗೂ ಕಣ್ಣು ಕಾಣಲಿಲ್ಲ
ಕವಿ ಜೋಳಿಗೆಯಲಿ
ಖಾಲಿಯಾದ ಲೇಖನಿಯ ಇಂಕು

ಒಂದು ಕೈಯಿಂದ ಗೆರೆ ಎಳೆಯುತ್ತಲೇ ಇದ್ದೇವೆ
ಮೂಡದ ಚಿತ್ರದ ಮುಂದೆ
ಮುಖಗಳು ಗಾಬರಿಗೊಳ್ಳಲಿಲ್ಲ
ಮುಳುಗಿ ಹೋಗುವ ದೇಹಗಳಿಗೆ
ಭಯದ ಬೆನ್ನಿಲ್ಲ

ಕರಗಿ ಹೋಗುತ್ತಿದೆ ನಡೆದು ಬಂದ ದಾರಿ
ಮನಸು ಬಿಸಿಯಾಗುತ
ಜೊತೆಯಾದ ಮೌನಮಾತು

ಬೆಳಗೆದ್ದು ಕಣ್ಣುಜ್ಜಿಕೊಂಡರೇ
ಆ ಕಡೆಯಿಂದ ಫೋನು
ಮುಳುಗಿ ಹೋದೆವು ನಾವು
ಸಮುದ್ರದಂಚನು ಮುಟ್ಟಿ !