ಹಾಡು ಹಕ್ಕಿ (ಭಾಮಿನಿ ಷಟ್ಪದಿ.)

ಮರದ ಮೇಲೆಯೆ ಕುಳಿತು ಹಾಡುವ
ಕರಿಯ ಬಣ್ಣದ ಪುಟ್ಟ ಹಕ್ಕಿಯು
ಹರಿಸಿ ಬಿಡುವಾ ನಾದ ಲಹರಿಗೆ ಮನವು ಸೋತಿಹುದು
ಕರೆಯುತಿರುವುದು ತನ್ನ ಬಳಗವ
ಮರೆಯಲಿರುತಿಹ ಹಣ್ಣು ತಿನ್ನಲು
ಸರಸವಾಡುತ ತನ್ನ ಯಿನಿಯನ ಜತೆಗೆ ಕೂಡುತಲಿ
ಹೂವು ತುಂಬಿದ ಮರಗಳೆಡೆಯಲಿ
ಕಾವು ಕೊಡುಲಿಯದರ ಮರಿಗಳ
ನೋವು ಕಾಣದ ರೀತಿ ಸಾಕುತ ಬೆಳೆಸಿ ಕೊಳ್ಳುವುದು
ಮಾವು ಹೂಗಳ ರಸವ ಹೀರುತ
ಜಾವದಲ್ಲಿಯೇ ಹಾರಿ ಬಿಡುತಲಿ
ಕಾವ ದೇವನ ನೆನೆದು ಹರುಷದಿ ತಿನಿಸ ಹುಡುಕುವುದು
ಬಣ್ಣ ತುಂಬಿದ ಗರಿಯ ಹರಡುತ
ಕಣ್ಣು ತುಂಬುವ ಚೆಲುವ ಬೀರುತ
ಸಣ್ಣ ಹೆಜ್ಜೆಯ ಹಾಕಿ ಕುಣಿಯುವ ನವಿಲ ನಾಟ್ಯವನು
ಹೆಣ್ಣ ಜತೆಯಲಿ ಸೇರಿ ನಲಿಯುತ
ಹೊನ್ನಿನಂತೆಯೆ ಹೊಳೆಯುತಿರುತಲಿ
ನನ್ನ ಮನದಲಿ ಹರುಷ ಮೂಡಿಸಿ ತನುವ ಮರೆಸುವುದು
ಬಾಳಿ ಬದುಕಲು ಪಕ್ಷಿ ಸಂಕುಲ
ಹಾಳು ಮಾಡದೆ ಪ್ರಕೃತಿ ಸಿರಿಯನು
ಕಾಳು ಹಾಕುತ ಪ್ರೀತಿ ತೋರುತಲಿರಲು ಸಂತಸವು
ನಾಳೆ ಮಾಡುವ ಕೆಲಸವೆಲ್ಲವ
ತಾಳುಯೆನ್ನುತ ಮುಂದೆ ಹಾಕದೆ
ಬಾಳು ಮುಗಿಯುವ ಮೊದಲು ಮಾಡಲು ದೇವನೊಲಿಯುವನು

- ಪಂಕಜಾ.ಕೆ. ಮುಡಿಪು