ಗಝಲ್

ಅರಿತನ ಮರೆತು ಕುರಿತೋದುತ
ಖುಷಿಯಾಗು ಮನವ ತೆರೆದು ನೀನು/
ಸಿರಿತನ ಬಯಸಿ ಮುಖವಾಡ ಧರಿಸಿ
ವಂಚಿಸಿದೆ ಬಳಿಗೆ ಕರೆದು ನೀನು//

ನಾಳಿನ ದಿನಗಳಿಗೆ ದ್ವೇಷವನ್ನು ಬಿಡದೆ
ಹೊತ್ತು ಸಾಗುತ್ತಿರುವೆಯಲ್ಲ ಏಕೆ/
ಬಾಳಿನ ದಾರಿಯು ಸ್ನೇಹ ಪ್ರೀತಿಯಿಂದ
ಕೂಡಿರಲಿ ಅಹಂ ತೊರೆದು ನೀನು//

ಕುರುಡು ಕಾಂಚಾಣ ಕುಣಿಸುತ್ತಿದೆ
ಬಂಧು ಬಳಗದಲ್ಲಿ ವಿಷಬೀಜ ಬಿತ್ತಿ/
ಬರಡು ಭೂಮಿಯಲ್ಲಿ ಸಂಬಂಧದ
ಪೈರು ಬೆಳೆಸು ಒಲವು ಎರೆದು ನೀನು//

ನೋವು ನಲಿವುಗಳ ಮರೆಮಾಚಿ
ಅನುದಿನ ಕಾಯಕದಿ ಮಗ್ನನಾಗು/
ನೊಂದ ಜೀವಕ್ಕೆ ಸಾಂತ್ವನ ಹೇಳಿದೆ
ಕುಹುಕ ನುಡಿಯದಿರು ಜರೆದು ನೀನು//

ರವಿಯ ಕಿರಣಕ್ಕೆ ಮಂಜು ಕರಗುವಂತೆ
ಬಡತನ ದೂರವಾಗುವುದು ಚಿಂತಿಸದಿರು/
ಕವಿಯ ಹೃದಯ ಮಧುರ ಭಾವದಿಂದ
ಮೀಟಿದೆ ಕಾವ್ಯ ಬರೆದು ನೀನು//

✍️ ಕವಿತಾ ಹಿರೇಮಠ