ಭ್ರಷ್ಟ ನಾಯಕ

ಕಾಂಚಾಣ ಕರಿಮಾಯಿ ಬೆಂಬತ್ತಿ ನರಿನಾಯಿ
ಏನಾದರಾಗಲಿ ಏನೆಂದರೆನ್ನಲಿ
ಪುಗಸೆಟ್ಟೆ ರೊಕ್ಕವು ಹರಿದು ಬರಲಿ ॥ಪ॥

ದುಡಿಯೋದು ಬದಿಗಿಟ್ಟು ಮಣ್ಣನ್ನು ಮರೆತಿಟ್ಟು
ಕುಲಕಸುಬು ಮರೆತಿವರು ಮಂಗಾಟ ನಡೆಸಿದರು
ಚುನಾವಣೆ ಪಂಚಾಯ್ತಿ ಎಂಎಲ್ಎ ಎಲೆಕ್ಷನ್ನು
ಕುಡುಕರನು ಹೆಚ್ಚಿಸಿದ ಅಪಕೀರ್ತಿ ಕೊಡುಗೆಯಿದು ೧

ಕೋಳಿಗಳ ತೂರಿದರು ಬಾಟಲಿಯ ಹಂಚಿದರು
ಜಾತಿಗಳ ಮುಂದಿಟ್ಟು ಮತಭೇಟೆಯಾಡಿದಿರಿ
ತಲವಾರು ಬಡಿಗೆಯಲಿ ತಲೆದೆಗೆದು ನಡುಬೀದಿ
ಬಿಸಿರಕ್ತ ರಂಗೋಲಿ ಚಿತ್ತಾರ ಬಿಡಿಸಿದಿರಿ ೨

ಮನಸುಗಳ ಒಡೆದವರು ಕನಸುಗಳ ಕೊಂದವರು
ಭರಪೂರ ಭರವಸೆಯ ಮಿಥ್ಯೆಯನು ಹಡೆದವರು
ಹತ್ತಾರು ಅಪರಾಧ ನೂರೆಂಟು ಆರೋಪ
ನಾಯಕನ ಅರ್ಹತೆಗೆ ಇವಿರದವ ಅಪರೂಪ ೩

ಹಣಬಲಕೆ ನೆಣಹೆಚ್ಚಿ ಮದ್ದಾನೆ ಘೀಳಿಡುತ
ಚುನಾವಣೆಯಂಕುಶವು ಸೊಕ್ಕಿಳಿಸಿ ಪೊರೆಕಳಚಿ
ಗಾಯಗಳ ನೆಕ್ಕುತ್ತ ಗವಿಯೊಳಗೆ ಮಲಗಿತ್ತು
ಆಗಾಗ ಬೀದಿಯಲಿ ನಾಟಕದಿ ಮೈಪರಚಿ ೪

ಅಧಿಕಾರ ಹೋದಾಗ ನೀರ್ದೆಗೆದ ಮೀನಂತೆ
ವಿಲವಿಲನೆ ವದ್ದಾಡಿ ಹರಿದಪ್ಪಿ ಮಾತಾಡಿ
ಕುದುರೆಯನು ನಡೆಸದವ ಕತ್ತೆಯನು ಬಯಸುತ್ತ
ಮರುಳತನ ದೊರಕೊಂಬು ಬಡಬಡಿಸಿ ಜಾಲಾಡಿ ೫

-ಜೀವರಾಜ ಹ ಛತ್ರದ