ಅನಿವಾರ್ಯತೆಯ ನೀಗಿಕೊಂಡ ಮೇಲೆ 

ಅನಿವಾರ್ಯತೆಯ ನೀಗಿಕೊಂಡ ಮೇಲೆ ಅನುಭವದ ಜಾಡು ಸರಾಗವಾಗುತ್ತದೆ ಎನ್ನುತ್ತಾರೆ ಕವಿ ಎಚ್.ಎನ್. ಈಶಕುಮಾರ್. ಪ್ರಾಧ್ಯಾಪಕರಾಗಿರುವ ಈಶಕುಮಾರ್ ಕವಿತೆಯನ್ನು ತಮ್ಮ ಅಭಿವ್ಯಕ್ತಿ ಮಾಧ್ಯಮವಾಗಿಸಿಕೊಂಡಿದ್ದಾರೆ. ಅವರ ‘ಅನಿವಾರ್ಯತೆಯ ನೀಗಿಕೊಂಡ ಮೇಲೆ’ ಕವಿತೆ ಇಲ್ಲಿದೆ.

ಅನಿವಾರ್ಯತೆಯ ನೀಗಿಕೊಂಡ ಮೇಲೆ
ಅನುಭವದ ಜಾಡು ಸರಾಗವಾಗಿ
ಬಣ್ಣದ ಚಿಟ್ಟೆ ಹಾರಿದಂತೆ ಹಗುರ ಯಾನ

ಒಲವ‌ ಭಾವದ ವಿನಿಮಯಕೆ ಅಣಿಯಾಗಿ
ಕೂತು ಕಾಲದ ಜಾಲವ ಅರಿವಂತೆ ಸುತ್ತಲೂ
ಸುಳಿದಾಡುವ ರಂಗು ರಂಗಿನ ಬೆಡಗನು
ಬಗೆ ಬಗೆಯಾಗಿ ಸೆಳೆವ ಕಾತುರ ಹೂವಿಗೂ

ಪಾಚಿತುಂಬಿದ ಕೊಳದ ಬಳಿಗೆ ಆಡಲು
ಊರ ಒಣಿಯಲಿ ನಲಿಯುತ ಓಡುವ
ಪುಟ್ಟ ಪೋರಿ ಚಿಟ್ಟೆಯ ಜಾಡಲಿ ಉದುರಿದ
ಒಂದೊಂದೇ ಪಾರಿಜಾತವ ಆಯುತ ತುಂಬಿದ
ಬೊಗಸೆಗೆ ಮಡಿಲ ನೀಡುತ ನಡೆವಳು

ಕಳೆದ ಇರುಳ ಕನಸಲಿ ನಕ್ಷತ್ರದ ಹಾಗೇ
ಕೋಣೆಯ ತುಂಬೆಲ್ಲ ಹಾರಿದ ಚಿಟ್ಟೆಗಳ
ಹಾದಿಯಲಿ ಕಂಡು ಕರೆವಳು ಮಡಿಲಿಗೆ
ಇನ್ನೂ ಕೊಂಚ‌ ಬಣ್ಣವ ಸೋಕಿಸು ಬಾ ಎಂದು

ಮಡಿಲಲಿ ತುಂಬಿದ ಬಣ್ಣಕೆ ಕಂಗಳಲಿ
ಕಾಮನಬಿಲ್ಲಿನ ಸೆಳೆವು ಮೂಡಲು ಚಿಟ್ಟೆಯು
ಸೋಕಿಸಿ ಹಚ್ಚಿದ ಬಣ್ಣಕ್ಕೆ ಎದೆಯ ಕನಸನೇ
ಅಡವಿಟ್ಟಳು ಮಾಯಾದ ಊರಲಿ ಉಳಿಯಲು

ಜೀವದ ಸೆಲೆಯಾಗಿ ಮೋಹದ ಬಣ್ಣವನೇ ಕಾಡುವ
ಚೆಲುವಾಗಿ..ಒಲವಾಗಿ....ಹೂವ ಕಂಪನವಾಗಿ...