ಆಕಾಶ ಮಲ್ಲಿಗೆ

ಇರುವುದನು ಬದಿಗಿಟ್ಟು ಇಲ್ಲದುದ ಬಯಸಿದರೆ
ಅಪಘಾತ ಉಪಘಾತ ನೂರೆಂಟಿವೆ
ಉಳ್ಳವರ ಅನುಕರಿಸೆ ಗೋಳಂಟವೆ? ॥ಪ॥

ಹಂಚುಣ್ಣಿ ಹಾಲುಣ್ಣಿ ಕೆಚ್ಚಲಲಿ ಮನೆಮಾಡಿ
ಹಾಲುಣ್ಣವಿವು ಎಂದೂ ಬರಿರಕ್ತವು
ಮರದೊಳಗೆ ಹಾರಾಡಿ ಎತ್ತರದಿ ಜಿಗಿದಾಡಿ
ಗೃಹತಾರೆ ಜೊತೆಗಿರದು ಅನುರಕ್ತವು

ಹಸುರುಟ್ಟ ಮರಗಿಡದಿ ಕರಿಬೊಡ್ಡೆ ವರಟ್ಯಾಕೆ
ಹರಿಕೊಂಬೆ ಹೂವರಳಿ ಹಲವುಬಣ್ಣ
ಬೇರಿರದ ಮರಗಳಿಗೆ ಕೊನೆಯಲ್ಲಿ ಬದುಕಿಲ್ಲ
ಮರಸತ್ತ ಮರುಘಳಿಗೆ ಬೇರುಮಣ್ಣು

ಕರಿನಾಯಿ ಬಿಳಿಮರಿಗೆ ಬಣ್ಣವಿದು ಬದಲಾಯ್ತು
ಒಳಗೊಂದು ರಾಜಕೀಯ ನಡೆದಂತಿದೆ
ಉಸಿರಿರದ ಜಾಗದಲಿ ಆಗರ್ಭ ಕತ್ತಲಲಿ
ಮೊಟ್ಟೆಯನು ಮರಿಕುಕ್ಕಿ ಹೊರಡುತ್ತಿದೆ

ಅಮೃತದ ಬೋಗುಣಿಯ ದೂರಿರಿಸಿ ಜನರೀಗ
ಸುರಪಾನ ಸುರಿಸುರಿದು ಸಾಯುತ್ತಿವೆ
ಮದ್ದಿರುವ ಹಿತನುಡಿಯು ಬಿದ್ದಲ್ಲೆ ವದ್ದಾಡಿ
ಬಣ್ಣಗಳ ವಣಮಾತು ಬೇಯುತ್ತಿವೆ

ಆಕಾಶ ಮಲ್ಲಿಗೆಗೆ ಕೈಚಾಚಿ ಜನರೀಗ
ಹುಲಿಬಯಸಿ ಮೈಗೆಲ್ಲ ಬರೆಯಿಟ್ಟರು
ನೆಲಕಾತ ಜನರೆಲ್ಲ ಹಾರಾಟ ಬಯಸಿದರು
ಕೈಸೋತು ಮೇಲಿಂದ ಕೆಳಬಿದ್ದರು

-ಜೀವರಾಜ ಹ ಛತ್ರದ