ಓ ವಿಮರ್ಶಕ

ಭಾವನೆಗಳು ಮಾರುತ್ತವೆ ಎದೆಪೇಟೆಯ ಒಳಗೆ
ಬೀದಿಯಬದಿ ಬಿಕರಿಗಾಗಿ ಕಾಯುತ್ತಿವೆ ತಮಗೆ ॥ಪ॥

ಬರೆದವನೆದೆ ಬರಿದಾಯಿತೆ? ವರತೆಯಝರಿ ಜಿನುಗು
ಮಾತಿಲ್ಲದೆ ಮಗುಹುಟ್ಟಿತು ಜನರುಲಿದರು ಗುನುಗು
ವೇದಿಕೆಯಲಿ ಹರಿಬಿಟ್ಟರು ವಾಗ್ಝರಿಗಳ ಬಾಣ
ಪರಿವೀಕ್ಷಕ ಉಚ್ಛರಿಸಿದ ತಾಮಾಡಿದ ಯಾನ ೧

ಕೃತಿಯಾಳಕೆ ಕೃತಿಯಗಲಕೆ ಶೃತಿಹೊಂದದೊ ಮೂಢ
ಕುರುಡರಪರಿ ಕರಿವರ್ಣನೆ ಬರಿಮಗ್ಗಲು ನೋಡ
ಅಪರಂಜಿಗೆ ತಾಮ್ರಬೆರೆತ ಕಸಕಡ್ಡಿಯ ಹೆಕ್ಕಿ
ಅಕ್ಕಸಾಲಿ ಪುಟವಿಕ್ಕಿದ ಕಟುಮಾತಲಿ ತಿಕ್ಕಿ ೨

ಆಭರಣವು ಎದೆಗಿಳಿದರೆ ನಿನ್ನಿಂದದು ಗೊತ್ತು
ವ್ಯಾಪಾರದಿ ಜನಕೊಂಡರೆ ಬೆಲ್ಲಕಿರುವೆ ಮುತ್ತು
ಚಕ್ರವರ್ತಿ ಅತುಲಬಲವ ಹೊಗಳುಭಟ್ಟ ಹಾಡಿ
ಕೇಳಿದಕಿವಿ ನಿಮಿರುತ್ತಿವೆ ಕೊಳ್ಳುತ್ತಿವೆ ಮೋಡಿ ೩

ಪೂರ್ವಾಗ್ರಹ ಗಡಿಕಟ್ಟಳೆ ಈರ್ಷೆಗಳನು ಮೀರಿ
ಈಜಿಮುಳುಗಿ ದಾಖಲಿಸುತ ಅಂತರಾಳ ತೂರಿ
ಹಲಕೋನದಿ ಮಥಿಸಲಿಮನ ನವನೀತವ ತೆಗೆದು
ಓದುಗನೆದೆ ಬಿಸ್ತಾರಕೆ ರಸಗವಳವ ಮೊಗೆದು ೪

- ಜೀವರಾಜ ಹ ಛತ್ರದ