ಎರಡನೇ ದಿನ

ಮನಸಿನ ಪರವಾನಿಗಿ ಪಡೆದು
ಅಂಗಾತ ಮಲಗುತ್ತಾಳೆ
ಕನಸು ಬೀಳದ ಹಾಗೆ,
ಕನಸು ಅಂತರಂತರ ತೇಲುತ್ತಾ
ಪಲ್ಲಂಗದ ಸುತ್ತ ಗಾಳಿಯೊಂದಿಗೆ ಬೆರೆತು ಬೆವರಿ

ಮೌನದ ಕೂಡ ಒದರಾಡುವ ಮೌನ
ಗಾಳಿಯೊಂದಿಗೆ ಗುದ್ದಾಡುವ ಗಾಳಿ
ನೀರಿನೊಂದಿಗೆ ಮಾತನಾಡುವ ನೀರು

ಕನಸು ಮೌನಗಳ ನುಂಗುವ ಗಾಳಿ
ಗಾಳಿಯ ನುಂಗುವ ನೀರು
ನೀರನೆ ನುಂಗುವ ಮಾತು
ಅವಳನು ನುಂಗದ ಹೆಬ್ಬಾವಿನಂತಹ
ಎರಡನೇ ದಿನ
ಬಾಯಿ ತೆರೆದು ಬುಸುಗುಡುತ್ತಿದೆ

ಅವಳ ನಡು
ಅವಳ ಹೊಕ್ಕಳು
ಅವಳ ಕಾಮರೂಪ
ಕನ್ನಡಿಯೊಂದಿಗೆ ಅವನ ಹಾದರ

ನೂರು ಚೂರಾಗಿ ಹೋಯ್ತು
ತಡೆದು ತಡೆದು ಬೀಳುವ ಕನಸು
ಮುಗ್ಗರಿಸುವ ಕನ್ನಡಿ
ಅವನ ನಿಷ್ಠೆ

ಕಟಕಟೆಯಲ್ಲಿ ಭಗವದ್ಗೀತೆ ಮುಟ್ಟುವ
ಮೌನ
ಗಾಳಿ
ನೀರು
ಯಾವುದೂ ಸತ್ಯ ಹೇಳುವುದಿಲ್ಲ

ಸುಳ್ಳಿನ ನೆತ್ತಿಯ ಮೇಲೆ
ಹೊಡೆದಂತಿರಬೇಕು
ಹೊಸ ಸುಳ್ಳು
ಮತ್ತು
ಪರೆಗಳಚಿ ಬಿಸಾಡುವ
ಅವನು

ಚಿತ್ರ: ವಿಷ್ಣುಕುಮಾರ್‌