ಕೆಂಪು ಹೂವಿನ ಮರದ ಕೆಳಗೆ 

ಕೆಂಪು ಹೂವಿನ ಮರದ ಕೆಳಗೆ 

ಉದುರಿದ ಕೆಂಪು ಹೂವಿನ ಪಕಳೆಗಳ ಮೇಲೆ 

ಬುರ್ರಂತ ಬುಲ್ಲೆಟ್ ಬೈಕ್‌ನಲ್ಲಿ ಓಡಾಡುವಾಗಲೆಲ್ಲಾ 

ನೆನಪೊಂದು ಎದುರಿಗೆ ಪುಟಿಪುಟಿದು ಬರುತ್ತಿದೆ.. 

ಇಲ್ಲೇ.. ಇದೇ ಮರದ ಕೆಳಗೆ ನನ್ನಪ್ಪ ಚಪ್ಪಲಿ ಹೊಲೆಯುತ್ತಿದ್ದ 

ಅವರ ಮಧುರ ಪಾದಗಳಿಗೆ ಯಾವುದೇ ಹಾನಿಯಾಗದಿರಲೆಂದು ಹದ ಮಾಡಿದ 

ಚರ್ಮದ ಚಪ್ಪಲಿಗಳನ್ನು ಹೊಲೆದು ಬದುಕಿನ ಬವಣೆ ಬದಿಗಿರಿಸುತಿದ್ದ..! 

ಜೊತೆ ಜತೆಗೇ ಹಾದಿಬದಿ ಹರಿದು ಹೋದ ಮನಸುಗಳ್ನೂ ಸರಿಪಡಿಸುತ್ತಿದ್ದ 

ಹಸಿದ ಕನಸಿನ ಕುಡಿಗಳಿಗೆ ಶ್ರಮದ ನದಿಯ ನೀರು ಕುಡಿಸುತ್ತಿದ್ದ 

ತಾಯಿಯ ತಟ್ಟೆಯಲಿ ಮಮತೆಯ ಮೊಟ್ಟೆಯನಿಡುತ್ತಿದ್ದ 

ಅವಳ ಸೆರಗಿನ ಸಿಹಿ ಮಾತಿಗೆ ಗುಲ್‌ಮೊಹರ್ ಅರಳಿಸುತ್ತಾ 

ಹಾಡಹಗಲಲ್ಲೂ ಇರುಳಲ್ಲಿ ಮಿನುಗುವ ಚುಕ್ಕಿಗಳ ಹಾಡಾಗುತ್ತಿದ್ದ..! /೧/. 

ಈ ಕೆಂಪು ಹೂವಿನ ಈ ಮರದ ಕೆಳಗೆ.. 

ಬೆದರಿದ ಚಿಗುರೆಲೆಗಳ ನೆರಳಮೇಲೆ 

ನನ್ನವಳ ಕೇಶರಾಶಿ ಹಾರಾಡಿದಾಗಲೆಲ್ಲಾ 

ನನ್ನಪ್ಪನ ಬ್ಯೂಟಿಫುಲ್ ರೂಪಕವೊಂದು ರೌದ್ರಾವತಾರವಾಗುತ್ತದೆ 

ಇಲ್ಲೇ.. ಇದೇ ಕಾಂಡದ ಕೆಳಗೆ ಆತ ಚಕ್ಕಂಬಕ್ಕಳ ಹಾಕಿದ ಋಷಿಯಂತಿರುತ್ತದ್ದ 

ಆತನ ಕೆಣಕಿದ ಬಾಟ, ಪೂಮಾ, ಅಡಿಡಾಸ್, ನೈಕ್,ಕ್ರಾಕ್ಸ್ ಚಪ್ಪಲಿಗಳೆಲ್ಲಾ 

ನನ್ನ ಕೂದಲಿಗೆ ಸಮ ಅಂತ ರಂಗೇರಿದ ರಾತ್ರಿಯಲಿ ಬಯಲಾಟವಾಗುತ್ತಿದ್ದ..! 

ಬೀಸಿ ಬರುವ ಬೆಂಗಳೂರ ತಂಗಾಳಿಗೆ 

ತೂಗ್ಯಾಡುವ ಮಹಲಿನ ಬೆಳಿಕಿಗೆ ಬೆವೆತು 

ಅವರ ಕೊಳೆತ ಕಾಲುವೆಗಳಿಗೆ ಇಳಿದು ಪಾಚಿಗಟ್ಟಿದ ಪ್ಲಾಸ್ಟಿಕ್, 

ಅಡ್ಡಗಟ್ಟಿದ್ದ ಕಾಂಡೋಮ್, ಬಾಟ್ಲಿಗಳನ್ನು ಬಾಚಿ ತೆಗೆದು 

ಶುಚಿಗೊಳಿಸಿದ ಅಣ್ತಮ್ಮಂದಿರ ಕೈಗಳನ್ನು ಕಂಡು ಕಾರ್ಮುಗಿಲಾಗಿ ಬಿಡುತ್ತಿದ್ದ..! /೨/ 

ಈ ಕೆಂಪು ಹೂವಿನ ಮರದ ಕೆಳಗೆ.. 

ಉದುರಿದ ಹಣ್ಣೆಲೆಗಳ ಮೇಲೆ ಹರಿದ 

ನನ್ಮಕ್ಕಳ ಕಾಂಟೆಸ್ಸಾ ಕಾರಿನ ಕಿಟಕಿ ತೆಗೆದಾಗಲೆಲ್ಲಾ 

ಅಪ್ಪನ ಅದಮ್ಯ ಬದುಕಿನ ಅದ್ಭುತ ಅನುಭೂತಿ ಮೂಡುತ್ತದೆ 

ಕೆರೆಮಣ್ಣಿನಡಿ ಆಡಿದ ಕೈಗಳಿಗೆ ಮರದ ಬುಡ, ತಾರು,ಸಿಮೆಂಟಿನ ಸಹವಾಸ. 

ನವಿಲೂರು, ಬಸವನ ಹುಳುವಿನ ಬದು, ಮೊಟಕುಮೀನಿನ ಸಾರು ಇಂದು ಬರೀ ಕನಸು 

ಬೆಳೆದ ಜೋಳದ ಬೆಳೆಯೆತ್ತರ ಬೆಳೆದ ಬಡ್ಡಿಗೆ ಎಲ್ಲವೂ ಬಿಟ್ಟು ಬೆಂಗಳೂರಿಗೆ ಬಂದ ನೆಲೆಗೆ ಅದೆಷ್ಟೋ ವರ್ಷ,

ಬಗುರಿಯ ಬಯಕೆ, ಬೆಂಬಿಡದ ಬದುಕುವಾಸೆಗೆ ಸಾವಿಗೇ ಸಡ್ಡು..! 

ಬಾನಿನೆತ್ತರದ ಅಪಾರ್ಟ್‌ಮೆಂಟಿನ ಕೊಳೆ, ಕಸ ಮುಸರೆತ್ತುವ ತಾಯಿಯ ವಾತ್ಸಲ್ಯ 

ತಂಗಳು ತಿನ್ನಲಾರದ ಮಕ್ಕಳ ಮುಸುಡಿ ಕಂಡ ನನ್ನಪ್ಪನ ಮೀಸೆಯ ತುಂಬ ರೋಷದ ವೇಷ 

ಮಧುರ ಮಯಿ ತಾಯಿಯ ಶಾಂತ ನಗುವಿನ ನದಿಯಲೆಯಲಿ ತೇಲಿ ಹೋಗುವ ಆವೇಶ..!/೩/ 

ಈ ಕೆಂಪು ಹೂವಿನ ಮರದ ಕೆಳಗೆ.. 

ಬಿರು ಮಳೆಗಾಳಿಗೆ ಹರಡಿದ ಕೊಂಬೆಗಳ ಮೇಲೆ 

ಕಾಲಿಟ್ಟಾಗಲೆಲ್ಲಾ ಕದಡುವ ಮನಸು, ಕಣ್ಮಂಜಾದರೂ 

ನನ್ನಪ್ಪನ ಅವಿರತ ಅವಧೂತಾಸೆ ಧುತ್ತನೆ ಪ್ರತ್ಯಕ್ಷವಾಗುತ್ತದೆ 

ಕಲಿಯದ ಮಕ್ಕಳು, ಕಣ್ತುಂಬಿ ಕುಳಿತ ಮಡದಿ ಕೈ ಬಿಡದ ಚಪ್ಪಲಿ 

ಹೊಲೆಯುವಾಗಲೆಲ್ಲಾ ಕಣ್ತಪ್ಪಿನಿಂದ ಕೈ ಕುಯ್ಯುವ ಕಲೆಯಿಂದ ನೆತ್ತರ ಚಿತ್ತಾರ 

ಕಸದ ರಾಶಿಯ ನಡುವೆ ಕಣ್ಬಿಡುತ್ತಿದ್ದ ಗುಡಿಸಿಲೊಳಗಿನ ಬಿಸಿಲ್ಗೋಲುಗಳ ಜೊತೆ 

ಗಿಣ್ಣಿದಾಂಡುವಾಡುತ್ತಿದ್ದ ಅಣ್ತಮ್ಮಂದಿರಿಗೆಲ್ಲಾ ಪ್ಲೇಗೋ, ನ್ಯೂಮೋನಿಯವೋ,ಟೈಫಾಯಿಡ್ಡೋ..! 

ಸುತ್ತದ ಸರ್ಕಾರಿ ಆಸ್ಪತ್ರಗಳಿಲ್ಲ, ನಿಂದನೆ, ಅಪಮಾನದ ಜೊತೆ ಬೈಸಿಕೊಳ್ಳದ ಬೈಗಳಿಲ್ಲ 

ದಣಿವರಿಯದ ತಾಯಿಗೆ ರಾತ್ರಿಗಳೆಲ್ಲ ಬಿಟ್ಟುಕೊಡದ ಚಟ್ಟಕಟ್ಟಿದವು ಬೈಗು ಕಾಣದ ತಂದೆಯ 

ಬಯಕೆಗಳೆಲ್ಲಾ ಬೂದಿ ಪಾಲಾದವು, ಬದುಕುಳಿದ ನನ್ನ ಬದುಕಿಗೆ ಕಾಣದ ಕೈಗಳೆಲ್ಲಾ 

ಇದೇ ಮರದ ಕೆಳಗಿನ ನೆರಳ ನೇಗಿಲಾಗಿ, ಫಲ ಮುಗಿಲೆತ್ತರಕೆ ಬೆಳೆಸಿ ಬಯಲಾದವು..!/೪/