ತೆವಲು

ಮುಟ್ಟಿನ ಮುದ್ದೆಯಿಂದೆದ್ದ
ಪುರುಷನ ಶಿಶ್ನದಲ್ಲಿ ಶಿಷ್ಟತೆ ಇದೆಯೇ?

ಜೊಲ್ಲು ಸುರಿಸುವ ಬೀದಿ ನಾಯಿಗಳು
ತೀಟೆ ತೀರಿಸಿಕೊಳ್ಳುವ ಇರಾದೆಯಿಟ್ಟು
ಆಸೆಯ ಅಮಲಿನಲಿ ಉಂಡಿದ್ದು

ಎದೆಯುಬ್ಬಿಸಿ ನಡೆಯುವಾಗ
ಕುಪ್ಪಸದೊಳಗಿನ ಮೊಲೆಗಳು ಕಣ್ಣ ಕುಕ್ಕುತ್ತಿವೆಯೇ ?
ಹಾಲುಣಿಸಿದ ತುಟಿಯಿನ್ನು ಒಣಗಿಲ್ಲ ಆಗಲೇ ಹೊಸಕಿ ಹಾಕುವ ಹೊಂಚು

ಸ್ಯಾನಿಟರಿಯಲಿ ಸುರಿವ ರಕ್ತ ಅಸಹ್ಯವೆಂದರೆ ಹೇಗೆ?
ಹುಟ್ಟಿಸಿದವಳನೇ ಬೇನೆಯಲಿ ಬೇಯಿಸುತ್ತಿರುವ ನಾಮರ್ದರೇ ಯೋಚಿಸಿ ನೋಡಿ
ನಿಮ್ಮದೇ ಹುಟ್ಟಿನ ಗುಟ್ಟಿರುವ ಯೋನಿಯನು ಮುಟ್ಟುವ ಮರ್ಯಾದಸ್ಥರು

ಅವಿತಿರುವ ಭವಿಷ್ಯವೊಂದಕ್ಕೆ ಗರ್ಭಪಾತ ಮಾಡಿಸಿದ್ದು
ಮಾತು ಬಾರದ ಗೋಡೆಗೆ ಮಾತ್ರ ಗೊತ್ತು

ಹಾಸಿಗೆ ಹಂಚಿಕೊಂಡ ನೋವಿಗೆ ಹೆಗಲಾಗದ ಹೆಗ್ಗಣಗಳು ಮರ್ಮಾಂಗಗಳನ್ನ ಮುಟ್ಟಿ ನೋಡಿಕೊಂಡಿವೆ
ಹುಟ್ಟಿದ್ದು ಯಾರಿಂದೆಂದು ?

ತೆವಲಿಗೆ ಹುಟ್ಟಿ ನನ್ನನ್ನೇ ಗುಲಾಮಗಿರಿಗೆ ತಳ್ಳಿದವರು
ಅರ್ಥವಾಗದೇ ಅನುಭವಿಸಿದ
ನೋವನು ಕಾಮವೆಂದು ಮಾರಾಟಕ್ಕಿಡಬೇಡಿ.

- ಕವಿತಾ ಸಾಲಿಮಠ