ದಿವ್ಯಾಮೃತ

ನಮ್ಮ ತೋಟದ ಹೂಗಳ ರುಂಡ ಕತ್ತರಿಸಿ
ಪಕಳೆಗಳ ಹರಿದು ಚೂರು ಚೂರು ಮಾಡಿ
ಒರಳಲ್ಲಿ ಹಾಕಿ ಒಣಕೆಯಿಂದ ಸಣ್ಣಗೆ ಕುಟ್ಟಿ
ರಸವ ತೆಗೆದು ಅಮೃತವ ಮಾಡಿದರು

ಅದೋ ಕಾಲ ಮುಂದೂಡುವ
ಮುಪ್ಪು ಮರೆ ಮಾಚುವ
ಚಿರ ಯೌವ್ವನ ತುಂಬುವ
ಮೈ ಮನಗಳ ಗಾಳಿಯಲ್ಲಿ ತೇಲಿಸುವ
ಸದಾ ಸರ್ವಾಂಗೀಣ ಸುಂದರಗೊಳಿಸುವ
ದಿವ್ಯಾಮೃತ

ಮೊಲವನ್ನು ಸಿಂಹವಾಗಿಸುವ
ಇಲಿಯನ್ನು ಹುಲಿಯಾಗಿಸುವ
ಇರುವೆಯನ್ನು ಆನೆಯಾಗಿಸುವ
ನರಿಯನ್ನು ತೋಳವಾಗಿಸುವ
ಮುಂಗೂಸಿಯನ್ನು ಹಾವಾಗಿಸುವ
ಸಂಜೀವಿನಿ

ಬೆಳ್ಳಂಬೆಳಿಗ್ಗೆ ಕೊಳ್ಳಿ ದೆವ್ವಗಳು
ಬಂಗಾರದ ಬಂಡಿಯಲ್ಲಿ ಬಡಿವಾರದಿಂದ
ಬಣ್ಣ ಬಣ್ಣದ ಕುಲಾಯಿ ತೊಟ್ಟ ವಿದೂಷಕರು
ಬಟ್ಟೆಯಿಲ್ಲದ ಬಿಳಿ ತೊಗಲಿನ ತಿಂತಿಣಿಯರು
ಹಗಲೇ ಬೆಳದಿಂಗಳು ಚೆಲ್ಲಿದಂತೆ, ನಕ್ಷತ್ರ ಮೂಡಿದಂತೆ
ಮೆರವಣಿಗೆ ಹೊರಟಿವೆ
ಹೂ ಪಕಳೆಗಳ ಅಮೃತವ ಸವಿಯುಣಿಸಲು

ಒಂದೇ ಒಂದು ಹನಿ ಕುಡಿದರು ಸಾಕು
ನರ ನಾಡಿಗಳು ಹುರಿಗೊಂಡು
ಸಿಡಿಲ ಜಂಗಮತ್ವ ಎದೆಯೇರಿ
ಕಾಮ ರಸಾಯನದ ಲಾವ ರಸ ಉಕ್ಕಿ
ಜ್ವಾಲಮುಖಿ ಸ್ಪೋಟಗೊಂಡು ಅನುಕ್ಷಣವೂ
ಉದ್ದೀಪನ ಉನ್ಮತ್ತ ಉತ್ತುಂಗ ಸರೋವರ

ಬನ್ನಿ ಬನ್ನಿ ಈಜಾಡಿ ತೇಲಾಡಿ
ಹಗಲು ರಾತ್ರಿಯ ಹಂಗಿಲ್ಲದ
ಮೈಥುನವೋ ಮೈಥುನ.......

ನವಮಾಸ ಬೇಕಿಲ್ಲ, ಹೆರಿಗೆ ನೋವಿಲ್ಲ
ಹುಟ್ಟಿದ ಕ್ಷಣವೇ
ಮುಗಿಲೆತ್ತರಕ್ಕೆ ಎದ್ದು ನಿಲ್ಲುತ್ತಾರೆ
ನವ ನಂದನರು !

- ರಾಜಶೇಖರ ಹಳೆಮನೆ