ಸಂತೆಯ ಸರಕು

ಇಲ್ಲಿ ಪ್ರೀತಿ ಹಂಚಲಾಗುತ್ತದೆ
ಎಂಬ ಅಂಗಡಿಯ ತಲೆಬರಹದ
ಕೆಳಗೆ ;
ಸ್ಟಾರು ಹಾಕಿ ಸಣ್ಣ ಅಕ್ಷರಗಳ
'ಷರತ್ತುಗಳು ಅನ್ವಯ' ಎಂಬ ಪದ
ನನ್ನ ಕಣ್ಣಿಗೆ ಬೀಳಲಿಲ್ಲ - ಕ್ಷಮಿಸಿ.

ಬರಿಗೈಯಲ್ಲೇ ಒಳಗೆ ಕಾಲಿಟ್ವವನಿಗೆ
ಸಿಕ್ಕಿದ್ದು ಭರ್ಜರಿ ಸ್ವಾಗತ ;
ಬರಿಗಾಲಿಗೂ ಒಂದು ಘನತೆ ದಕ್ಕಿದ್ದು
ಅದೇ ಮೊದಲು.

ಅಂಗಡಿಯ ತುಂಬ ಮಾತೇ ಮಾಣಿಕ್ಯ
ಪದ ಪದ ಜೋಡಿಸಿದ ಮುತ್ತಿನ ಹಾರ ;
ಮನದ ಮೂಳೆಗೆ ನೇತು ಬಿದ್ದ ಮೌನ ಎದೆ ಕಲಕುವ ಕೊರಳ ಹಾಡು ಕರಳು ಬಳ್ಳಿ
ಜೋಡಿಸುವ ಜನ್ಮಾಂತರದ ನಂಟು.

ಸಂಜೆಯಾಗುತ್ತದೆ
ಅಂಗಡಿಗಳೂ ಕದವಿಕ್ಕುತ್ತವೆ;
ಕಣ್ಣ ಹಣತೆಯ ದೀಪವಾರುತ್ತವೆ
ಪ್ರೀತಿಯೂ ಚಿಲ್ಲರೆ ಚೌಕಾಸಿಗೊಳಾಗುವ
ಸಂತೆಯ ಸರಕು ಎಂದು ಎಲ್ಲ ಮುಗಿದ ಮೆಲೆ
ಅರಿವಾಗುವ ಕ್ಷಣ ಅದು.

ಆಡಿದ ಮಾತುಗಳು
ಹಾಡಿದ ಪದಗಳು ಕರುಳು ಅಂಟಿಸುವ
ನಂಟು ;
ಉರಿದು ಆರಿದ ದೀಪಗಳ ಸಿಡಿಲ ಮೌನ.

ಇಷ್ಟಗಲ ನಕ್ಕಿದ್ದೂ ಸುಳ್ಳೇ !

ಪುಕ್ಕಟೆಯಾಗಿ ಯಾವುದೂ ಸಿಗುವುದಿಲ್ಲ
ಇಲ್ಲಿ ;
ಪ್ರತಿ ಪ್ರೀತಿಯೂ ಷರತ್ತಿಗೊಳಪಟ್ಟು
ಆತ್ಮಾಹುತಿಗಾಗಿ ಕಾಯುತಿರುವ ಶಿಲುಬೆ !

**
ಡಾ.ಲಕ್ಷಣ ವಿ ಎ