ಮನುಷ್ಯನಿಗೂ ಅಕ್ಕಿಗೂ
ಹಸಿವು ಮತ್ತು ಅನ್ನದಾಚೆಗಿನ ನಂಟುಂಟಂತೆ
ಜೈವಿಕವಾಗಿ ಎರಡೂ
ನೂರರಲ್ಲಿಪ್ಪತ್ತೈದು ಪಾಲು ಒಂದೇ ಅಂತೆ
ಮನುಷ್ಯನನ್ನು ಮನುಷ್ಯನನ್ನಾಗಿಸುವ
ಗುಣತಂತುವಿನ ಕಾಲು ಪಾಲು ಭತ್ತದಲ್ಲೂ ಇದ್ದು
ಅಕ್ಕಿಯನ್ನು ಅಕ್ಕಿಯಾಗಿಸುವುದಂತೆ
ಮನುಷ್ಯನಿಗೂ ಹಸುವಿಗೂ ನಡುವೆ
ಬರೇ ಹಾಲುಮಾಂಸವಲ್ಲದ ಕೊಡುಕೊಳು
ವುಂಟಂತೆ
ಮನುಷ್ಯತ್ವದ ಮುಕ್ಕಾಲು ಪಾಲು
ಥೇಟು ಥೇಟಾಗಿ ಹಸುವೊಳಗೂ ಇದ್ದು ಹಸುವನ್ನು
ಹಸುವಾಗಿಸುವುದಂತೆ
ಅಲ್ಲದೆ ಮನುಷ್ಯನಲ್ಲಿ
ನೂರರಲ್ಲಿ ಎಂಬತ್ತೈದು ಅಳತೆ ನಾಯಿಯುಂಟಂತೆ
ತೊಂಬತ್ತಳತೆ ಬೆಕ್ಕುಂಟಂತೆ
ತೊಂಬತ್ತಾರು ಕೋತಿತನವುಂಟಂತೆ
ಹಾಗೇ ಶೇಕಡ ಅರವತ್ತು ಕೋಳಿಯೂ
ಅರವತ್ತೊಂದು ನೊಣವೂ
ಅರವತ್ತೆರಡು ಬಾವಲಿಯೂ ತೊಂಬತ್ತೆರಡು ಇಲಿಯೂ
ತೊಂಬತ್ತನಾಲ್ಕು ಹುಲಿಯೂ ಉಂಟೆಂಬುದಿದೆ
ಎಲ್ಲಕ್ಕಿಂತ ತೊಂಬತ್ತೆಂಟಕ್ಕು ಹೆಚ್ಚು ಗೊರಿಲ್ಲಾತನ
ವುಂಟೆನ್ನಲಾಗಿದೆ
ಅಂದಮೇಲೆ
ಮನುಷ್ಯನೆಂದರೆ ತಾನಲ್ಲದ ಇತರೆಯೇ
ಹೆಚ್ಚು ಹವುದಾಗಿದೆ
ಅದಕ್ಕೇನೇ
ಇವೊತ್ತಿಗೂ ಮನುಷ್ಯರೊಳಗೆ ಮನುಷ್ಯತ್ವವನ್ನು
ಹುಡುಕಲಾಗುತ್ತದೆ
- ನಾಗರಾಜ ವಸ್ತಾರೆ
ನಾಗರಾಜ ವಸ್ತಾರೆ ಅಂತಲೇ ಪರಿಚಿತರಾಗಿರುವ ನಾಗರಾಜ ರಾಮಸ್ವಾಮಿ ವಸ್ತಾರೆ ಅವರು ವೃತ್ತಿಯಲ್ಲಿ ಆರ್ಕಿಟೆಕ್ಟ್‌ ಆಗಿದ್ದು, ಸಾಹಿತ್ಯವನ್ನು ಪ್ರವೃತ್ತಿಯಾಗಿಸಿಕೊಂಡವರು. ಕಥೆ, ಕಾದಂಬರಿ, ಕವಿತೆ, ಪ್ರಬಂಧ ಹೀಗೆ ಕನ್ನಡ ಸಾಹಿತ್ಯ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಕಳೆಮನೆ ಕಥೆ, ಬಯಲು-ಆಲಯ, ಕಮಾನು-ಕಟ್ಟುಕತೆ ಹೆಸರಿನಲ್ಲಿ ಇವರ ಅಂಕಣಗಳು ಪತ್ರಿಕೆಗಳಲ್ಲಿ ಪ್ರಕಟಗೊಂಡಿವೆ.
ವಸ್ತಾರೆ ಅವರ ಪ್ರಮುಖ ಕೃತಿಗಳೆಂದರೆ ತೊಂಬತ್ತನೇ ಡಿಗ್ರಿ, ಅರ್ಬನ್ ಪ್ಯಾಂಥರ್‍ಸ್‌, ನಿರವಯವ ಮುಂತಾದವು.ಇವರಿಗೆ ಪುತಿನ ಕಾವ್ಯ ನಾಟಕ ಪುರಸ್ಕಾರ, ಕನ್ನಡ ಸಾಹಿತ್ಯ ಅಕಾಡೆಮಿಯ ಪುಸ್ತಕ ಬಹುಮಾನ ಮುಂತಾದ ಪ್ರಶಸ್ತಿಗಳು ಲಭಿಸಿವೆ.
More About Author
Concept & Creation 
©2024 Book Brahma Private Limited.
