ಇಲ್ಲೂ ಇದ್ದಾರೆಯೇ ಚೋರರು

ಚಿನ್ನ, ಹಣ, ವಸ್ತುಗಳ
ಕದಿಯುವ ಕಳ್ಳರಿದ್ದಾರೆ ಎಲ್ಲೆಡೆಗೆ
ಅವರ ಮಟ್ಟ ಹಾಕಲೆಂದು
ಪೊಲೀಸರೂ ಇದ್ದಾರೆ
ಸೊಂಟ ಮುರಿಯಲೆಂದು

ಆದರೂ ನಿಂತಿಲ್ಲ ಕಳ್ಳತನ
ಇದಕ್ಕೊಂದು ಹೊಸತನ
ಬರೆಹಗಳ ಚೋರರಿದ್ದಾರೆ ಅಲ್ಲಲ್ಲಿ
ಇಲ್ಲೂ ಇದ್ದಾರೆಯೇ..
ಒಮ್ಮೆ ಹೇಳಿ... ಏಕೆಂದರೆ..
ಶಿವರುದ್ರಪ್ಪನವರ ಕವನಕ್ಕೂ ಕನ್ನ..!!
ಹೇಸಿಗೆ ತಿನ್ನಲು ಹೇಸದ ಜನ.

ಏನು ಸಾಧನೆ ಮಾಡುವರಿವರು
ಸ್ವಂತಿಕೆ ಇಲ್ಲದ ಭಂಡರು
ನನಗೋ ಭಯ ಆವರಿಸಿದೆ ಈಗ
ಸಾಹಿತ್ಯ ಎಂದರೆ ಹೀಗಾ..
ಛೆ.. ಇರಬಹುದು ಕೆಲವು ಹುಳ
ಗೆದ್ದಲು ಹಾಳೆಯ ತಿಂದಂತೆ...
ಇಲ್ಲೂ ಇದ್ದಾರೆಯೇ...

ಒಪ್ಪಿಕೊಂಡು ಬಿಡಿ.. ಆಗಲಾರದು..
ತನಗೆ ತಾನೇ ಮಸಿ ಬಳಿಯುವುದೆಂತು..
ಹೋಗಲಿ.. ಬಿಡಿ... ಬದಲಾಗಿ..
ಸಾಕ್ಷಿ ಹೊರಬೀಳುವ ಮೊದಲು..
ಛಿ.. ಥು.. ಎಂದು ಉಗಿಯುವ ಮೊದಲು..
ಎಲ್ಲೆಡೆಗೂ ವಾರ್ತೆ ಹಬ್ಬುವ ಮೊದಲು..
ಇಲ್ಲೂ ಇದ್ದಾರೆಯೇ..

ಸಿಕ್ಕಿ ಬೀಳಲಾರೆ ಎಂದುಕೊಂಡರೆ..
ಅದು ದಡ್ಡತನ ಅಲ್ಲವೇನು..
ರವಿ ಕಾಣದ್ದನ್ನು ಕವಿ ಕಾಣುವ..
ಗಾದೆ ಮರೆತಿಲ್ಲ ತಾನೇ..
ಇಂದಲ್ಲ ನಾಳೆ, ಹರಾಜು ನಿಶ್ಚಿತ..
ಕಾಲ..ಸನ್ನಿಹಿತ.

ರುಜುವಾತಾಗಲಿ...
ಸಭ್ಯರಿಗೆ ಆಗಲೇ ಗೌರವ, ಸಮ್ಮಾನ.
ನಿಲ್ಲಬೇಕಿದೆ..
ಜೊಲ್ಲು, ಜೊಳ್ಳುಗಳ ನರ್ತನ..
ಇಲ್ಲೂ ಇದ್ದಾರೆಯೇ..
ಒಮ್ಮೆ ಹೇಳಿಬಿಡಿ... ಇಲ್ಲ... ಬದಲಾಗಿ ಬಿಡಿ.
ಕಾಲ ಉತ್ತರಿಸುವ ಮುನ್ನ.

- ಹರಿನರಸಿಂಹ ಉಪಾಧ್ಯಾಯ