ರಿಪೇರಿ 

ದ್ವಿಚರಿಯಾಗಿ ಸಾಗುತ್ತಿದೆ
ಗುರಿಯೇ ಇಲ್ಲದೆ ದಾರಿಗುಂಟ
ಬಹಳ ದೂರವೇನೂ ಬಂದಿರಲಿಲ್ಲ
ಅಷ್ಟರಲ್ಲಿಯೇ ಬಂಡಿ ಉಬ್ಬಸಬಡುತ್ತಾ
ನಿಂತುಬಿಟ್ಟಿತು ಏಕಾಏಕಿ
ಈಗ ಬಂಡಿಗೆ ಒಲವನೊದಗಿಸುತಾ
ತಳ್ಳುವ ಕಾಯಕ ತೋಳಗಳದು

ನೂಕಲಾರದೆ ನೂಕಿ ಮುಂದೆಮುಂದಕೆ
ಸುಸ್ತು ಹೊಡೆಯುವಷ್ಟರಲ್ಲಿ
ಕಣ್ಣಿಗೆ ರಾಚಿತು
ಮುರಿದ ಕಂಬ ಕಮಾನುಗಳ
ಹಳೆಯ ಗ್ಯಾರೇಜ್
ನಿಧಾನವಾಗಿ ಬಿಸಿ ನೆತ್ತರ
ವಾಹಿನಿಯೊಂದು ಚಿಮ್ಮಿದಂತಾಯ್ತು ಮೈಯಲ್ಲಿ

ಉರುಳಿ ನರಳಿಕೊಂಡು ಬಂದ
ಬಂಡಿಯೊಂದಿಗೆ ನನ್ನನ್ನು
ಒಮ್ಮೆಲೇ ಸುಪರ್ದಿಗೆ ಪಡೆದ ರಿಪೇರಿಗಾಗಿ
ದೇಶಾವರಿಯ ನಗುವ ಬೀರುತಾ

ಪರಿಕಿಸಿದ ನಿರುಕಿಸಿದ
ಸವೆದ ಭಾಗ ಯಾವುದೆಂದು
ತಡಮಾಡದೆ ಬಂಡಿಭಾಗಗಳ
ಕಳಚತೊಡಗಿದ ಕೈ ಚಳಕದಿಂದೆ
ಈ ಮಧ್ಯೆ
ನನ್ನ ಅವನ ಮಾತು
ನಿರ್ಲಿಪ್ತನಾಗಿ ಆಲಿಸಿನಲ್ಲ ಎಲ್ಲಾ ಪ್ರವರ
ಕೇಳುವ ತವಕವಿಲ್ಲದಿದ್ದರೂ

ಆಸೆಯೇ ದುಃಖಕ್ಕೆ ಮೂಲವಂತೆ
ಅಂತೆ ಆಸೆಯನು ತೊರೆದು ಬದುಕಿರುವೆ
ಈ ಎಲ್ಲಾ ಗೊಡವೆಗಳನ್ನು ತೊರೆದು
ಮಾತಿನ ಲಹರಿ ಮುಂಬರಿಯುತ್ತಲೇ ಹೋಯಿತು
ಅವನು ಕೇಳುತ್ತಲೇ ಇದ್ದ ಸಾವಧಾನವಾಗಿ

ಅನಿತರಲ್ಲೇ ಬಿಡಿಭಾಗಗಳು ಸಮನಿಸುವಂತೆ
ಒಂದರೊಳಗೆ ಮತ್ತೊಂದನು
ಹೊಂದಿಸತೊಡಗಿದ ಅಚ್ಚುಕಟ್ಟಾಗಿ

ಹೇಳಿದನವನು ಕೊನೆಗೆ ನನ್ನ ನಿಟ್ಟಿಸುತ್ತಾ
ವಿಜಯದ ನಗೆಯ ಸೂಸುತ್ತಾ
ನಿಮ್ಮ ಬಂಡಿ ಹೊಸತಾಯ್ತು ಮರಳಿ
ಈಗ ನೀವು ಹೊಸಬರಾಗಿ
ಬಂಡಿಯನೇರಬೇಕು
ಆಜ್ಞೆಯೋ? ವಿಜ್ಞಾಪನೆಯೋ? ತಿಳಿಯದು
ಕಕ್ಕಾಬಿಕ್ಕಿಯಾಗಿ ನಿಂತವಳಿಗೆ
ಎಸೆದದ್ದು ಒಂದೇ ಪ್ರಶ್ನೆ
ಆಸೆ ತೊರೆದು ಬದುಕು ಉಂಟೇ?

ಮರುಮಾತಾಡದೆ ಕಿಸೆಯ
ಹಣವನ್ನೆಲ್ಲಾ ತೆತ್ತು ಹೊರಬಿದ್ದೆ
ನನ್ನೊಳಗೆ ಇಣುಕುತ್ತಾ, ಹುಡುಕುತ್ತಾ!!

ಚಿತ್ರ : ಪಿ. ಕೆ. ಜೈನ್