ಮಾರ್ನಾಮಿಯ ಕನಸು

ಮಲಗಿದ್ದೆ
ಹರಿದ ಕನಸುಗಳ ಕಂಬಳಿ ಹೊಲಿಯುತ್ತ
ಏನೆನೋ ಹಂಬಲಿಕೆ ಬಳಲಿಕೆ
ಹಳೆ ಮುಖ ಹೊಸ ಮುಖವಾಗಿ
ಕೋಣನ ತಲೆಯ ಅಸಾದಿ
ಎಮ್ಮೆಯ ತಲೆಯ ಮಹಿಷ
ಸಂಬಂಧದ ಮಾಲೆ ಕೊರಳ ಸುತ್ತಿಕೊಂಡಿರಲು
ಅವ್ವ ಹಚ್ಚಿದ ಬುಡ್ಡಿಯ ಬೆಳಕಲಿ
ಆಜ್ಜನ ಹೆಜ್ಜೆಗಳು
ಕಣ್ಣ ಪರದೆಯ ಮೇಲೆ ಜೋಕಾಲಿ ತೂಗುತ

ಹರಕು ಸೀರೆ ಸುಟಿಗೆ ತಗುಲಿದ ಪಂಚೆ
ಹಸಿದ ಹೊಟ್ಟೆಯ ತುಂಬಾ ಕರುಳ ಬಿಕ್ಕಳಿಕೆ
ಮೂಲೆ ಕಚ್ಚಿದ ಕೋಲು ಚಿಗುರುವ ಕನಸು
ಹೊಲದ ತುಂಬಾ ಬೆವರ ಗವುಲು
ತೆನೆಗಟ್ಟಿ ಕಾಳು ಹಿಡಿ ಹಬ್ಬಿ ಉಡಿ ತುಂಬಿ

ಆರಿದ ಒಲೆಯ ಕೆಂಡದಲಿ ಕಿಡಿ ಹಾರಿ
ಹೊತ್ತಿ ಕೊಳ್ಳುವ ತವಕ
ಮನೆ ತುಂಬಿದ ತುಪ್ಪದ ಗಾಳಿಯ ವಾಸನೆ
ನಸುಕಿನಲೇ ಹಟ್ಟಿಯು ಬಗ್ಗಡ ಹೊದ್ದು
ರಂಗೋಲಿಗೆ ಅವ್ವನ ತುದಿ ಬೆರಳ ಸ್ಪರ್ಶ
ಪುಟ್ಟ ಪಾದದ ಹೆಜ್ಜೆ ಗುರುತು
ಬಗ್ಗಡ ಬಳಿದ ಹಟ್ಟಿಯ ಮೇಲೆ...

ಹೊತ್ತುಟ್ಟಿ ಬರುವಾಗ
ಅಜ್ಜನ ಕೈ ಬೆರಳು ಕುಡುಗೋಲಿನ ಹಿಡಿಕೆ ಹಿಡಿದು
ಹೊಲವ ತುಂಬಿದ ಕಾಮನ ಬಿಲ್ಲುಗಳು
ಅವ್ವ ಹೊತ್ತು ಬರುವ ಹಿಟ್ಟಿನ ಹೊತ್ತು
ಅಜ್ಜನ ರಟ್ಟೆಯ ಬಿಗಿ ಸತುವು

ಕಣವ ಸಾರಿಸಿ
ಹುಲ್ಲನು ತುಳಿಸಿ ರಾಗಿಯ ಮಾಗಣಿಗೆ
ಚೆಲುವಿನ ಗಾಳಿ ಬೀಸಿ
ವರುಷದ ಕನಸು ಅವ್ವನ ಮೊರತುಂಬಿ
ಕಣದಲಿ ಹುಲುಸು...

ಸರಿ ಹೊತ್ತಿಗೆ ಎಚ್ಚರವಾದ ಮನಸು
ಕಣ್ಣ ಮುಂದೆ ಅವ್ವ ಅಜ್ಜನ ಪಟ
ಮುಂದೆ ಸುರಿದ ಪುರಿ ಮೇಲೆ ಚಕ್ಕುಲಿ ನಿಪ್ಪಟ್ಟು
ಮೈಸೂರು ಪಾಕು ಕೋಡುಬಳೆ
ಸಣ್ಣ ಲೋಟದಲಿ ಅವಿತಿದ್ದ ಶಾಂಭವಿ
ಮೂಗಿನ ಹೊಳ್ಳೆಗೆ ತಾಕುತಿದ್ದ ಧೂಪದ ಹೊಗೆ

ಒಲೆಯ ಮೇಲಿನ ಪಾತ್ರೆಯಲಿ
ಕೊತ ಕೊತ ಕುದ್ದು ತಟ್ಟೆ ತುಂಬಿದ್ದ
ತುಕ್ಕಡ ಸವೆದು ಬರಿದಾದ ಮೂಳೆಗಳು

ಸುತ್ತಲೂ ನೋಡಿದೆ
ಮೌನ ಬಡಿದ ಗೊರಕೆ ಸದ್ದು
ನಗುತ್ತಿದ್ದ ಅವ್ವ ಅಜ್ಜನ ಪಟಕೆ
ಅಡ್ಡ ಬಿದ್ದೆ
ಎರಡೂ ಪಟದಿಂದ ಚಾಚಿದ ಬಲಗೈಗಳು
ನನ್ನ ತಲೆ ಮೇಲಿಟ್ಟಿರಲು
ಮೈ ಕೊಡವಿ ಎದ್ದೆ
ಅಯ್ಯೋ ! ಮಾರ್ನಾಮಿಯ ಕನಸು

- ಬಿದಲೋಟಿ ರಂಗನಾಥ್