ಆತ್ಮ ಸಖ

ಯಾರವನು ಸಖೀ ಯಾರು ಹೇಳೇ?
ನಿನ್ನಿನಿರುಳಲಿ ಬಂದೆನ್ನ ಸೂರೆಗೊಂಡವನು?
ಗುರುತು ಪರಿಚಯವಿರದ ಗದ್ದಲದ ಸಂತೆಯೊಳು
ಮುಗುಳು ನಗೆಯಲಿ ಸೆಳೆದು ಕಟ್ಟಿದವನು!
ಯಾರವನು ಗೆಳತೀ ಯಾರು ಹೇಳೇ?
ನಲ್ಲನಿಲ್ಲದ ಶೂನ್ಯಸಂಜೆಗಳಲಿ, ಸೊಲ್ಲಡಗಿ ನಾ ಮೌನಿಯಾಗಿರಲು
ಬಂದು ನನ್ನೆದೆ ಮೀಟಿ ಸಪ್ತಸ್ವರಗಳ ಮೇಲೆ ತೇಲಿಸುವವನು
ಯಾರವನು ಇಂದುಮುಖಿ ಬಂದು ಹೇಳೇ?
ನೆರೆಹೊರೆಯ ಕಣ್ಣುಗಳು ಪಿಸುಗುಡುತಲಿರುವಾಗ
ರಾಜಠೀವಿಯಲಿವನು ಕದವ ಬಡಿಯುವನು
ಯಾರವನು ಹಮ್ಮೀರ ಯಾವೂರ ಸರದಾರ?
ಏನಂಥ ಅವರಸರವು ಬಂದು ಕೇಳೇ?
ಇರುಳು ಭೋರ್ಗರೆವ ಮಳೆ ಕರುಳು ಸೀಳುವ ಗಾಳಿ
ಬಂದ ಬಂದವನೇ ಮೈಯ ಚಳಿಬಿಡಿಸಿ ತಲ್ಲಣಗಳ ನೇವರಿಸಿ
ನನ್ನೆದೆಯ ಹಕ್ಕಿಯನು ಬೆಚ್ಚಗಿಟ್ಟವನು
ಯಾರವನು ಚೆಲುವ? ಕದ್ದವನು ನನ್ನೊಲವ?
ಯಾರು ಹೇಳೇ ಸಖಿ ಬೇಗ ಹೇಳೇ?
ಸಂಜೆಗಾವಳದಲ್ಲಿ ನಾ ಹಾಲು ಕರೆವಾಗ
ಮೆತ್ತಗೆ ಬಂದವನು ನನ್ನತ್ತೆ ಹಾಕಿರುವ
ಹೊನ್ನಕಾಲಂದುಗೆಯ ನಗುನಗುತ ತೆಗೆಯುವನು
ಯಾರವನು ಮನಗಳ್ಳ ಹೇಳೆ ಸಖಿ ಯಾರವನು?
ಭೂಮಿ ಚಂಡನು ಒದ್ದು ನನ್ನ ಗೆದ್ದವನು
ಸೂರ್‍ಯ ಬಿಂಬವ ಕಿತ್ತು ಹಣೆಗೆ ತಿಲಕವನಿಟ್ಟು
ನನ್ನ ಎದೆಯಂಗಳದಿ ಚಂದಿರನ ಪದಕವನು ತೂಗಿದವನು
ಯಾರವನು ಹೇಳೆ ಸಖಿ ಕೈಯ ಮುಗಿಯುವೆನು
ನೆತ್ತರಿನ ಕಣಕಣವೂ ತಳಮಳದಿ ಕುದಿವಾಗ
ಭೋರಿಡುವ ಸೊಕ್ಕಿಗೆ ಉಕ್ಕೇರಿದವನು
ಯಾರಿವನು? ಬಂದೆನ್ನ ಬಯಲು ಮಾಡಿದವನು
ಹಸುಗೂಸನೆರೆದು ಹಾಲನೆರೆದಂತೆ
ಕಣ್ಣುತೊಟ್ಟಿಲೊಳಿಟ್ಟು ಲಾಲಿ ಹಾಡುವನು
ಹೌದೇನೇ ಸಖಿ? ಇವನು ಅವನೇ ಏನೇ?
ಇಂದಿನಿರುಳೂ ಇವನು ಬರುವನೇನೇ?
ಕೈಲಾಸಪುರಕೆ ಇವ ಕರೆದೊಯ್ಯನೇನೇ?
ಬಂದಾನೋ, ಬಾರನೋ ನನ್ನಾತ್ಮ ಸಖನು?
ಬಂದಾನೋ.. ಬಾರನೋ... ಬಂದಾನೋ... ಬಾ...ರ...ನೋ...

- ಶಶಿಕಲಾ ವೀರಯ್ಯಸ್ವಾಮಿ