ನನ್ನವ್ವ

ಸಣ್ಣವಳಿದ್ದಾಗ ಕೂಲಿ ಮಾಡಿ
ತಾಯಿ ಜೊತೆಗೂಡಿ
ತಂದೆ ಪ್ರೀತಿಯಿಲ್ಲದೆ
ಹಾಯಿ ಬೆಚ್ಚನೆ ಹಚ್ಚಹಸಿರಿನಲಿ
ಹೊಚ್ಚ ಹೊಸ ಕನಸುಗಳ
ಉಸುರಿನಲಿ ಬದುಕಿದಳು ನನ್ನವ್ವ.

ಯೌವನದಿ, ಕನಸಿನ ಪುರುಷನಿಗೆ
ಹಾಸಿದಳು ಹಸೆಮಣೆಗೆ ಮೈ
ತಕರಾರಿಲ್ಲದೆ ಮುಗ್ಧೆ
ಹೆಣೆದ ಕನಸುಗಳು ಅವರಿಸಿ
ನೆಲ-ಮುಗಿಲ ಹಾಸಿ ಹೊದ್ದಳು
ಮನದುಂಬಿ ಕನಸುಗಳೆಲ್ಲ
ಹರಡಿ ಹಾರುತಿರುವಾಗ
ಹಿಡಿಯ ಬಯಸಿದಳು ನನ್ನವ್ವ.

ನನಸಾದ ಕನಸುಗಳು ಬೆರಳೆಣಿಕೆ
ಈಡೇರದವು ಭೂಮಿಯಷ್ಟು
ಎಲ್ಲವೂ ಹಾಸಿಹೊದ್ದು, ಅದರಿಂದೇಳದಾದಳು
ಕೊರಕೊರಗಿ ಸೊರಗಿದಳು ನನ್ನವ್ವ.

ಮೈಮೂಳೆ ಸವೆಸಿ, ನೆತ್ತರು ಇಂಗಿಸಿ
ಬೆಳಗಿದ ಕಣ್ಣಗಳು ಮನೆ ಬೆಳಕಾಗಿಸಿ
ಮನ ಮಂಕಾಗದವಳ ದುಡಿತ
ಈಗಲೂ ತಪ್ಪಲಿಲ್ಲ
ಹತ್ತು ಹೆತ್ತು ಆರು ಉಳಿದು
ಅತ್ತತ್ತು ಉಸಿರು ಬಿಸಿಯಾದರೂ
ಕಂಗಳಲಿ ಭರವಸೆಯ ತಣ್ಣನೆ ಬೆಳಕು
ಮೊಗದ ತುಂಬೆಲ್ಲ ಪೂರ್ಣ

- ಹೇಮಲತಾ ವಡ್ಡೆ