ತಾಯ್ಮಾತಿನ ಶಿಕ್ಶಣ: ಎಲ್ಲಿತನಕ

Date: 26-10-2024

Location: ಬೆಂಗಳೂರು

"ಸಣ್ಣ ಸಣ್ಣ ಬಾಶೆಗಳ ಮತ್ತು ಬುಡಕಟ್ಟು ಬಾಶೆಗಳ ಪಾಲಕರಲ್ಲಿ ಅವರ ಬಾಶೆಗಳೆ ಅವರನ್ನು ಹಿಂದಿಕ್ಕುತ್ತಿವೆ ಎಂಬುದು ಕಾಡುತ್ತದೆ. ಎಲ್ಲಿಯವರೆಗೆ ಮಕ್ಕಳಿಗೆ ತಮ್ಮ ಬಾಶೆಯಲ್ಲಿ ಶಿಕ್ಶಣವನ್ನು ಕೊಡಬೇಕು ಎಂಬುದು ಇಲ್ಲಿ ಪಾಲಕರನ್ನು ಕಾಡುವ ಮುಕ್ಯವಾದ ಪ್ರಶ್ನೆ. ತಮ್ಮ ಬಾಶೆಯಲ್ಲದ ಮಾದ್ಯಮವೆ ತಮಗೆ ಮುಕ್ತಿಯ ದಾರಿ ಎಂಬುದು ಇಬ್ಬರಲ್ಲೂ ಕಾಣುವ ಸಮಾನವಾದೊಂದು ಬ್ರಮೆ," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ತಾಯ್ಮಾತಿನ ಶಿಕ್ಶಣ: ಎಲ್ಲಿತನಕ’ ಕುರಿತು ಬರೆದಿರುವ ಲೇಖನ.

ತಾಯ್ಮಾತಿನಲ್ಲಿ ಶಿಕ್ಶಣ ಎಂದ ಕೂಡಲೆ ಒಂದೆಡೆ ಆಳುವ ವರ‍್ಗ, ಪಾಲಸಿ ಮಾಡುವವರು ಇನ್ನೊಂದೆಡೆ ಪಾಲಕರು ಹೆದರುತ್ತಾರೆ. ಒಂದು ಗುಂಪು ಬಾರತದಲ್ಲಿ ಇರುವ ನೂರಾರು ಬಾಶೆಗಳಲ್ಲಿ ಹೀಗೆ ಶಿಕ್ಶಣವನ್ನು ಮಾಡಲು ಸಾದ್ಯವೆ ಎಂಬ ಪ್ರಶ್ನೆಯನ್ನು ಮುಂದೆ ತರಬಹುದು. ಇನ್ನೊಂದೆಡೆ ಪಾಲಕರಲ್ಲಿ ಬಯ ಇರುತ್ತದೆ. ಕನ್ನಡದಂತಾ ಪ್ರದಾನ ಬಾಶೆಗಳ ಪಾಲಕರಲ್ಲಿ ಸಾಮಾಜಿಕ ಪ್ರತಿಶ್ಟೆ ಮತ್ತು ಉದ್ಯೋಗ ಮೊದಲಾದವು ಕಾಡುತ್ತವೆ. ಸಣ್ಣ ಸಣ್ಣ ಬಾಶೆಗಳ ಮತ್ತು ಬುಡಕಟ್ಟು ಬಾಶೆಗಳ ಪಾಲಕರಲ್ಲಿ ಅವರ ಬಾಶೆಗಳೆ ಅವರನ್ನು ಹಿಂದಿಕ್ಕುತ್ತಿವೆ ಎಂಬುದು ಕಾಡುತ್ತದೆ. ಎಲ್ಲಿಯವರೆಗೆ ಮಕ್ಕಳಿಗೆ ತಮ್ಮ ಬಾಶೆಯಲ್ಲಿ ಶಿಕ್ಶಣವನ್ನು ಕೊಡಬೇಕು ಎಂಬುದು ಇಲ್ಲಿ ಪಾಲಕರನ್ನು ಕಾಡುವ ಮುಕ್ಯವಾದ ಪ್ರಶ್ನೆ. ತಮ್ಮ ಬಾಶೆಯಲ್ಲದ ಮಾದ್ಯಮವೆ ತಮಗೆ ಮುಕ್ತಿಯ ದಾರಿ ಎಂಬುದು ಇಬ್ಬರಲ್ಲೂ ಕಾಣುವ ಸಮಾನವಾದೊಂದು ಬ್ರಮೆ.

ಈ ಇಬ್ಬರಿಗೂ, ಈ ಎರಡೂ ಪ್ರಶ್ನೆಗಳಿಗೆ ಒಂದೆ ಸಮಾದಾನ ಕೊಡಬಹುದು. ಅಲ್ಲದೆ ಇಂಗ್ಲೀಶ್ ಮಾದ್ಯಮದಂತಾ ಮೋಹಕ ಮಾದ್ಯಮದ ಆಸೆಯಲ್ಲಿರುವವರಿಗೂ ಇದು ಉತ್ತರವಾಗಬಹುದು. ತಾಯ್ಮಾತಿನಲ್ಲಿ ಶಿಕ್ಶಣ ಎಂದು ಹೇಳುವಾಗ ಮುಕ್ಯವಾಗಿ ಪ್ರಾತಮಿಕ ಶಿಕ್ಶಣ ಎಂಬ ವಿಚಾರವನ್ನು ಇಟ್ಟುಕೊಂಡಿದೆ. ಅಂದರೆ ಮಕ್ಕಳಿಗೆ ತಾಯ್ಮಾತಿನ ಶಿಕ್ಶಣವನ್ನು ಪ್ರಾತಮಿಕ ಹಂತದವರೆಗೆ ಮುಕ್ಯವಾಗಿ ಕೊಡಬೇಕು. ಆನಂತರದ ಹಂತದ ಶಿಕ್ಶಣವನ್ನೂ ಹೀಗೆ ತಾಯ್ಮಾತಿನಲ್ಲಿ ಇಲ್ಲವೆ ಅವರವರ ಬಾಶೆಯಲ್ಲಿ ಕೊಡಬಹುದು. ಆದರೆ ಹಲವಾರು ಕಾರಣಗಳಿಂದಾಗಿ ಎಲ್ಲ ಬಾಶೆಗಳಲ್ಲಿಯೂ ಇದು ಸಾದ್ಯ ಆಗದೆ ಇರಬಹುದು. ಎಲ್ಲೆಲ್ಲಿ ಸಾದ್ಯವೊ ಅಲ್ಲಲ್ಲಿ ಇಡಿಯಾಗಿ ಶಿಕ್ಶಣವನ್ನು ಅವರವರ ಬಾಶೆಗಳಲ್ಲಿ ಕೊಡಬಹುದು, ಇನ್ನು ಸಾದ್ಯವಿರುವೆಡೆಗಳಲ್ಲಿ ಪ್ರವುಡ ಹಂತದ ಶಿಕ್ಶಣದವರೆಗಾದರೂ ಅವರವರ ತಾಯ್ಮಾತಿನಲ್ಲಿ ಇಲ್ಲವೆ ಅವರವರ ಬಾಶೆಯಲ್ಲಿ ಕೊಡಬಹುದು. ಇಲ್ಲಿ ಕೆಲವು ವಿವರಗಳನ್ನು ಮಾತನಾಡಿದೆ.

ಕನ್ನಡದಂತಾ ಪ್ರದಾನ ಬಾಶೆಗಳಲ್ಲಿ ಈಗಾಗಲೆ ಕೆಲವು ವಲಯಗಳಲ್ಲಿ ಹೆಚ್ಚೂ ಕಡಿಮೆ ಉನ್ನತ ಶಿಕ್ಶಣದವರೆಗೆ ಶಿಕ್ಶಣವನ್ನು ಕೊಡಲಾಗುತ್ತಿದೆ. ಹೀಗೆ ಈಗಾಗಲೆ ಒಂದು ಬಾಶೆಯಲ್ಲಿ ಶಿಕ್ಶಣವನ್ನು ಕೊಡಲಾಗುತ್ತಿದ್ದರೆ ಅದನ್ನು ಮುಂದುವರೆಸಬಹುದು. ಈ ಪುಸ್ತಕದಲ್ಲಿ ಮಾತನಾಡಿದಂತೆ ಕರ‍್ನಾಟಕ ಎಂಬ ರಾಜ್ಯವನ್ನು ತೆಗೆದುಕೊಂಡರೆ ಕನ್ನಡದ ಹೊರತಾಗಿ ಇನ್ನೂ ಹಲವು ಬಾಶೆಗಳನ್ನು ಶಿಕ್ಶಣ ಮಾದ್ಯಮಗಳನ್ನಾಗಿ ಮಾಡಬೇಕಿದೆ. ಹೀಗೆ ಶಿಕ್ಶಣ ಮಾದ್ಯಮಗಳನ್ನಾಗಿ ಬೆಳೆಸುವ ಬಾಶೆಗಳಲ್ಲಿ ಮೂಲಬೂತವಾಗಿ ಪ್ರಾತಮಿಕ ಹಂತದವರೆಗೆ ಶಿಕ್ಶಣವನ್ನು ಕೊಡಬೇಕು.

ಆನಂತರ ಎಲ್ಲಿಯವರೆಗೆ ಶಿಕ್ಶಣವನ್ನು ಆ ಬಾಶೆಯಲ್ಲಿ ಕೊಡುವುದಕ್ಕೆ ಸಾದ್ಯವಾಗುವುದೊ ಅಲ್ಲಿಯವರೆಗೆ ಮುಂದುವರೆಸಬಹುದು. ಆದರೆ ಇನ್ನು ಕೆಲವು ಸಣ್ಣ ಸಣ್ಣ ಬಾಶೆಗಳಲ್ಲಿ, ಬುಡಕಟ್ಟುಗಳ ಬಾಶೆಗಳಲ್ಲಿ ಉನ್ನತ ಹಂತದವರೆಗೆ ಶಿಕ್ಶಣ ಸಾದ್ಯವಾಗುವುದು ತುಸು ಕಶ್ಟವಾಗಬಹುದು, ಬಹುಶಾ ಅನವಶ್ಯಕವೂ ಆಗಿರಬಹುದು. ಇದೆಲ್ಲವೂ ಒಂದು ತಿಳುವಳಿಕೆ ಮಾತ್ರ. ಮುಂದೆ ಬರುವ ಶಿಕ್ಶಣ ಕ್ಶೇತ್ರದ ಹಲವು ಬೆಳವಣಿಗೆಗಳು ಮತ್ತು ತಾಂತ್ರಿಕ ಬೆಳವಣಿಗೆಗಳು ಈ ತಿಳುವಳಿಕೆಯನ್ನು ಮುರಿದು ಹೊಸ ತಿಳುವಳಿಕೆಗಳನ್ನು ತರಲೂಬಹುದು, ತರುತ್ತವೆ. ಅದಿರಲಿ, ಈ ಸಣ್ಣ ಸಣ್ಣ ಬಾಶೆಗಳಲ್ಲಿ ಪ್ರಾತಮಿಕ ಹಂತದವರೆಗೆ ಕಡ್ಡಾಯವಾಗಿ ತಾಯ್ಮಾತಿನ ಶಿಕ್ಶಣವನ್ನು ಕೊಡಬೇಕು.

ಮಕ್ಕಳನ್ನು ಅವರ ತಾಯ್ಮಾತಿನ ಶಿಕ್ಶಣದಲ್ಲಿ ಶಾಲೆಗೆ ಸೇರಿಸಿಕೊಂಡು ಕ್ರಮೇಣ ಇತರ ಬಾಶಾಮಾದ್ಯಮಕ್ಕೆ ಸಿದ್ದಗೊಳಿಸಬೇಕು. ಈ ಪ್ರಕ್ರಿಯೆಯನ್ನು ಇಲ್ಲಿ ಒಂದೆರಡು ಸಾಲುಗಳಲ್ಲಿ ಹೇಳಿದೆ. ಇತ್ತೀಚಿನ ಹೊಸ ರಾಶ್ಟ್ರೀಯ ಶಿಕ್ಶಣ ನೀತಿ ಮೂರನೆಯ ತರಗತಿವರೆಗೆ ಪಟ್ಯಗಳನ್ನು ಇಡುವುದು ಬೇಡ ಎಂದು ಹೇಳಿದೆ. ಹಾಗಾಗಿ ಮಕ್ಕಳಿಗೆ ಪರ‍್ವಪ್ರಾತಮಿಕದಿಂದ ಹಿಡಿದು ಮೂರನೆಯ ತರಗತಿವರೆಗೆ ಇನ್ನು ಮೇಲೆ ಪಟ್ಯಗಳು ಇರುವುದಿಲ್ಲ. ಮುಕ್ಯವಾಗಿ ಆಟೋಟಗಳು, ವಿವಿದ ಬಗೆಯ ಚಟುವಟಿಕೆಗಳು, ಬಾಶಾ ಆಟ ಮೊದಲಾದವು ಮಾತ್ರ ಇರುತ್ತವೆ. ಈ ಹಂತದಲ್ಲಿ ಸಾದ್ಯವಾದಶ್ಟು ಮಕ್ಕಳಿಗೆ ಅವರವರ ಮಾತಿನಲ್ಲಿಯೆ ವ್ಯವಹರಿಸುವುದಕ್ಕೆ ಅವಶ್ಯವಾದ ವ್ಯವಸ್ತೆಯನ್ನು ಮಾಡಬೇಕು.

ಸಾದ್ಯವಾದಶ್ಟು ಆ ಪರಿಸರದಲ್ಲಿ ಇರುವ ಬಾಶೆಗಳನ್ನು ಬಲ್ಲವರನ್ನು ಆಯಾ ಬಾಗದಲ್ಲಿ ಶಿಕ್ಶಕರೆಂದು ನೇಮಿಸಬೇಕು. ಪರಿಸರದ ಹಲವು ಬಾಶೆಗಳಿಗೆ ಅವಶ್ಯವಾದಲ್ಲಿ ಹೆಚ್ಚುವರಿ ಶಿಕ್ಶಕರನ್ನು ನೇಮಿಸಬಹುದು ಇಲ್ಲವೆ ಇತರರ, ಸಮಾಜಸೇವಾ ವಲಯ ಮೊದಲಾದವುಗಳಲ್ಲಿ ಇರುವವರ ಸಹಾಯವನ್ನೂ ಪಡೆದುಕೊಳ್ಳಬಹುದು. ಸಾದ್ಯವಾದಶ್ಟು ಮಕ್ಕಳು ತಮ್ಮ ಮನೆಮಾತನ್ನು ಬಳಸುವುದಕ್ಕೆ ಮುಕ್ತವಾದ ವಾತಾವರಣವನ್ನು ಇಲ್ಲಿ ನಿರ‍್ಮಿಸಬೇಕು. ಮಕ್ಕಳು ಮನೆಮಾತನ್ನು ಬಳಸಬೇಕು ಎಂದರೆ, ಕನ್ನಡ ಮಾತನಾಡುವ ಮಕ್ಕಳನ್ನೆ ತೆಗೆದುಕೊಂಡರೆ ಅವರು ಅವರವರ ಪ್ರಾದೇಶಿಕ ಮಾತನ್ನು ಆಡುವುದಕ್ಕೆ ಮುಕ್ತವಾದ ಅವಕಾಶಗಳನ್ನು ಕೊಡಬೇಕು.

ಇದು ಮಕ್ಕಳ ಮನೊವಿಕಾಸಕ್ಕೆ, ಆ ಮೂಲಕ ಅವರ ಪ್ರತಿಬಾವಿಕಾಸಕ್ಕೆ ಇರುವ ಮುಕ್ಯವಾದೊಂದು ದಾರಿ. ಇನ್ನು ಉಳಿದ ಮಾತುಗಳ/ಬಾಶೆಗಳ ಮಕ್ಕಳು ಅವರವರ ಮಾತನ್ನು/ಬಾಶೆಯನ್ನು ಆಡುವುದಕ್ಕೆ ಮುಕ್ತವಾದ ವಾತಾವರಣವನ್ನು ಒದಗಿಸಬೇಕು. ಸದ್ಯ ನಮ್ಮ ಸಮಾಜದಲ್ಲಿ, ಬೀದಿಗಳಲ್ಲಿ ಬಿನ್ನ ಬಾಶೆಗಳನ್ನು ಆಡುವ ಮಕ್ಕಳು ಹೇಗೆ ಕೂಡಿ ಬೆಳೆಯುತ್ತಿರುವರೊ, ಹಾಗೆಯೆ ಶಾಲೆಗಳಲ್ಲಿಯೂ ಅಂತದೆ ವಾತಾವರಣ ಇರುವಂತಾಗಬೇಕು. ಇದ್ದಕಿದ್ದ ಹಾಗೆ ಕ್ರುತ್ರಿಮವೆನಿಸುವ ಏಕಬಾಶಿಕ ವಾತಾವರಣ ನಿರ‍್ಮಾಣವಾಗಬಾರದು.

ಹೀಗೆ ಮಕ್ಕಳಿಗೆ ಮೂರನೆಯ ತರಗತಿವರೆಗೆ ಅವರ ಬಾಶಾ ಬಳಕೆಗೆ ಮುಕ್ತ ವಾತಾವರಣ ಒದಗಿಸಿ ಆನಂತರ ನಾಲ್ಕನೆಯ ತರಗತಿಗೆ ಪಟ್ಯಗಳನ್ನು ಕೊಡುವಾಗ ಸಾದ್ಯವಾದಶ್ಟು ಹೆಚ್ಚು ಪ್ರಮಾಣದ ಪಟ್ಯಗಳನ್ನು ಮಕ್ಕಳ ತಾಯ್ಮಾತಿನಲ್ಲಿಯೆ ಕೊಡಬೇಕು. ಇದರಲ್ಲಿ ಸ್ವಲ್ಪ ಪ್ರಮಾಣದಲ್ಲಿ, ಅವಶ್ಯವಾದಶ್ಟು ಮಾತ್ರ ನಾಡಿನ ಇಲ್ಲವೆ ಪ್ರದೇಶದ ಪ್ರದಾನ ಬಾಶೆಯನ್ನು ಪರಿಚಯಿಸಬಹುದು. ಇದನ್ನು ಮುಂದಿನ ತರಗತಿಗಳಲ್ಲಿ ಹೆಚ್ಚಿಸುತ್ತಾ, ಮಕ್ಕಳ ಬಾಶೆಯ ಪ್ರಮಾಣವನ್ನು ಕಡಿಮೆ ಮಾಡುತ್ತಾ ಬರಬೇಕು. ಪ್ರಾದೇಶಿಕ ಪ್ರದಾನ ಬಾಶೆಗಳನ್ನು ಒದಗಿಸಿದ ಮಕ್ಕಳಿಗೆ ಅಯ್ದಾರನೆಯ ತರಗತಿಯಲ್ಲಿ ನಾಡಿನ ಪ್ರದಾನ ಬಾಶೆಯನ್ನೂ ಪರಿಚಯಿಸಬೇಕು. ಹೀಗೆ ಮಕ್ಕಳನ್ನು ನಾಡಿನ ಪ್ರದಾನ ಬಾಶಾಮಾದ್ಯಮಕ್ಕೆ ಅಣಿಗೊಳಿಸಬಹುದು.

ಇದರೊಂದಿಗೆ ಸೂಕ್ತವಾದ ತರಗತಿಯಲ್ಲಿ ಇಂಗ್ಲೀಶನ್ನು ಆನಂತರ ಮಕ್ಕಳಿಗೆ ಪರಿಚಯಿಸಬಹುದು. ಮಕ್ಕಳು ಮುಂದೆ ಇಂಗ್ಲೀಶ್ ಮಾದ್ಯಮವನ್ನೂ ಆಯ್ಕೆ ಮಾಡಿಕೊಳ್ಳುವುದಕ್ಕೆ ಪೂರಕವಾಗಿ ಅವರನ್ನು ತಯಾರಿಸಬೇಕು. ಆಗ ಪ್ರವುಡ ಹಂತದ ಶಿಕ್ಶಣಕ್ಕೆ ಮುಂದೆ ಹೋಗುವ ಮಕ್ಕಳು ನಾಡಿನ ಪ್ರದಾನ ಬಾಶೆಯ ಇಲ್ಲವೆ ಇಂಗ್ಲೀಶಿನ ಹೀಗೆ ಅವರ ಆಯ್ಕೆಯಂತೆ ಅವರು ಮುಂದುವರೆಯುವುದಕ್ಕೆ ಸಾದ್ಯವಾಗುವಂತಿರಬೇಕು.