ಸಮಾನತೆಯ ವಿಚಾರ ಮತ್ತು ತಾಯ್ಮಾತಿನ ಶಿಕ್ಶಣ

Date: 18-11-2024

Location: ಬೆಂಗಳೂರು

"ಸಾಮಾಜಿಕವಾಗಿ ಎಲ್ಲ ವ್ಯವಸ್ತೆಗಳು ಎಲ್ಲರಿಗೂ ಸಮಾನವಾಗಿ ಒದಗಬೇಕು ಎಂಬುದು. ಇದರಲ್ಲಿ ಗಮನಿಸಬೇಕಾದ ಅಂಶವೆಂದರೆ ಬಾಶೆ ಆದಾರದ ಮೇಲೆ ಸಮಾನತೆಯನ್ನು ಯಾರೂ ಯೋಚಿಸುವುದಿಲ್ಲ. ದೇಶದಲ್ಲಿ ಶಿಕ್ಶಣವನ್ನು ಕೇವಲ ಕೆಲವೆ ಬಾಶೆಗಳಲ್ಲಿ ಕೊಡಲಾಗುತ್ತಿದೆ," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಸಮಾನತೆಯ ವಿಚಾರ ಮತ್ತು ತಾಯ್ಮಾತಿನ ಶಿಕ್ಶಣ’ ಕುರಿತು ಬರೆದಿರುವ ಲೇಖನ.

ಸಮಾನತೆ ಎನ್ನುವುದು ಆದುನಿಕ ರಾಶ್ಟ್ರಸಮಾಜಗಳ ಅತ್ಯಂತ ಮುಕ್ಯವಾದ ಒಂದು ಆಶಯ. ಪ್ರಜಾಪ್ರಬುತ್ವ ದೇಶಗಳು ಮುಕ್ಯವಾಗಿ ಈ ಆಶಯವನ್ನು ಹೊಂದಿವೆ. ದೇಶದ ಎಲ್ಲ ನಾಗರಿಕರ ನಡುವೆ ಸಮಾನತೆಯನ್ನು ತರುವುದು ಎಂಬುದೆ ಈ ಆಶಯ. ಸಮಾನತೆ ಎಂದರೆ ಏನು ಎಂಬುದನ್ನು ತುಸು ಸೂಕ್ಷ್ಮವಾಗಿ ಆಲೋಚಿಸಬೇಕು. ಸಮಾನತೆ ಎಂದರೆ ಸರಕಾರದ ಎಲ್ಲ ಸೇವೆ, ಸವುಲಬ್ಯ ಮೊದಲಾದವುಗಳನ್ನು ಪಡೆದುಕೊಳ್ಳುವಲ್ಲಿ ಎಲ್ಲರೂ ಸಮಾನ ಅವಕಾಶ ಹೊಂದಿರಬೇಕು, ಮತ ಚಲಾಯಿಸುವುದು ಮತ್ತು ಆಡಳಿತ ಇಲ್ಲವೆ ನಾಗರಿಕ ಸೇವೆ ಮೊದಲಾದ ವಲಯಗಳಲ್ಲಿ ಎಲ್ಲರಿಗೂ ಸಮಾನ ಅವಕಾಶಗಳು ಇರಬೇಕು ಎಂಬುದು. ಸಾಮಾಜಿಕವಾಗಿ ಎಲ್ಲ ವ್ಯವಸ್ತೆಗಳು ಎಲ್ಲರಿಗೂ ಸಮಾನವಾಗಿ ಒದಗಬೇಕು ಎಂಬುದು. ಇದರಲ್ಲಿ ಗಮನಿಸಬೇಕಾದ ಅಂಶವೆಂದರೆ ಬಾಶೆ ಆದಾರದ ಮೇಲೆ ಸಮಾನತೆಯನ್ನು ಯಾರೂ ಯೋಚಿಸುವುದಿಲ್ಲ. ದೇಶದಲ್ಲಿ ಶಿಕ್ಶಣವನ್ನು ಕೇವಲ ಕೆಲವೆ ಬಾಶೆಗಳಲ್ಲಿ ಕೊಡಲಾಗುತ್ತಿದೆ.

ಆ ಬಾಶೆಗಳನ್ನು ಬಲ್ಲವರಿಗೆ ಮಾತ್ರ ಅದು ಉಪಯೋಗಕಾರಿಯಾಗಿದೆ. ಉಳಿದವರಿಗೆ ಇನ್ನೊಂದು ಬಾಶೆಯನ್ನು ಕಲಿಯುವುದೆ ದೊಡ್ಡ ಕೆಲಸ. ಆನಂತರ ವಿಶಯವನ್ನು ಕಲಿಯಬೇಕಾದ ಅವಶ್ಯಕತೆ ಇರುತ್ತದೆ. ಹಾಗಾಗಿ ಪ್ರದಾನ ಬಾಶೆಗಳಲ್ಲದ ಮಕ್ಕಳಿಗೆ ಶಿಕ್ಶಣ ಸಮಾನವಾಗಿರದೆ ಅಸಮಾನವಾಗಿದೆ. ಬಾರತದಲ್ಲಿ ಇರುವ ನೂರಾರು ಬಾಶೆಗಳನ್ನು ಕನಿಶ್ಟ ಬಾಶೆಯಾಗಿಯೂ ಕಲಿಸುವ ಅವಕಾಶವನ್ನು ಇದುವರೆಗೆ ಬೆಳೆಸಿಲ್ಲ. ಕನಿಶ್ಟ ಪ್ರಾತಮಿಕ ಹಂತದಲ್ಲಿಯಾದರೂ ಇದರ ಅವಶ್ಯಕತೆ ಹೆಚ್ಚಿದೆ. ಅವರವರ ತಾಯ್ಮಾತುಗಳನ್ನು ಶಾಲೆಗಳಲ್ಲಿ ಇತರ ವಿಶಯಗಳ ಜೊತೆಜೊತೆಗೆ ಉಳಿಸಿದರೆ ಅದು ಮಕ್ಕಳನ್ನು ಶಿಕ್ಶಣಕ್ಕೆ ಕೊಂಡಿಸುವ ಕೆಲಸವನ್ನು ಮಾಡುತ್ತದೆ. ಹೀಗೆ ದೇಶದಲ್ಲಿ ಸಮಾನತೆಯನ್ನು ಸಾದಿಸುವುದು ಎಂದರೆ ಎಲ್ಲರಿಗೂ ಅವರವರ ಬಾಶೆಯಲ್ಲಿ ಶಿಕ್ಶಣವನ್ನು ಕೊಡುವುದು.

ಬಾರತ ಹಲವು ಸಾಮಾಜಿಕ ತರತಮಗಳಿಂದ ಕೂಡಿರುವ ದೇಶ. ಬಾಶಾ ತರತಮವೂ ಅವುಗಳಲ್ಲಿ ಒಂದು. ಸಾಮಾಜಿಕ ತರತಮದೊಂದಿಗೆ ಬಾಶಾ ತರತಮ ಅಂಟಿಕೊಂಡಿರುತ್ತದೆ. ಒಂದು ಸೊಗಸಾದ ಬಾಶಾ ತರತಮದ ಚಿತ್ರವನ್ನು ಕೊಡುವುದಾದರೆ, ಮಂಗಳೂರು ಪರಿಸರದ ನಿರ‍್ಶನವನ್ನು ತೆಗೆದುಕೊಳ್ಳೋಣ. ಬಾರತದಲ್ಲಿ ಇಂಗ್ಲೀಶು ಮತ್ತು ಹಿಂದಿಗಳ ನಡುವೆ ಇಂಗ್ಲೀಶು ಸಾಮಾಜಿಕವಾಗಿ ಮೇಲಂತಸ್ತಿನಲ್ಲಿ ಮತ್ತು ಹಿಂದಿ ತುಸು ಕೆಳಗೆ ಬರುತ್ತದೆ. ಇಂಗ್ಲೀಶನ್ನು ಹೊರತುಪಡಿಸಿ ಹಿಂದಿ ಮತ್ತು ಕನ್ನಡ ಮೊದಲಾದ ಇತರ ಬಾರತೀಯ ಬಾಶೆಗಳ ನಡುವಿನ ಸಂಬಂದವನ್ನು ಗಮನಿಸಿದರೆ ಹಿಂದಿ ಅದಕ್ಕಿರುವ ರಾಜಕೀಯ ಮತ್ತು ಆಡಳಿತದ ಬೆಂಬಲದಿಂದ ಪ್ರತಿಶ್ಟೆಯನ್ನು ಕನ್ನಡದೆದುರು ಪಡೆದುಕೊಳ್ಳುತ್ತದೆ.

ಕನ್ನಡವು ಹೆಚ್ಚಾಗಿ ಕರ‍್ನಾಟಕ ರಾಜ್ಯದಲ್ಲಿ ಬಳಕೆಯಲ್ಲಿರುವುದರಿಂದ ಕರ‍್ನಾಟಕದ ಪರಿಸರಕ್ಕೆ ಬರೋಣ. ಕರ‍್ನಾಟಕದಲ್ಲಿ ತುಳು ಮೊದಲಾದ ಹಲವು ಸ್ತಳೀಯ ಬಾಶೆಗಳು ದೊಡ್ಡ ಸಂಕೆಯ ಮಾತುಗರನ್ನು ಹೊಂದಿಯೆ ಬಳಕೆಯಲ್ಲಿ ಇವೆ. ಆದರೆ ಕನ್ನಡ ಅದಕ್ಕಿರುವ ರಾಜಕೀಯ, ಆಡಳಿತ, ಬಹುಸಂಕ್ಯಾತರ ಬಾಶೆ ಎಂಬ ಕೋಡು ಮೊದಲಾದವು ಸೇರಿ ತುಳುವಿನ ಎದುರು ಮೇಲಂತಸ್ತನ್ನು ಅನುಬವಿಸುತ್ತದೆ. ತುಳು ಕೆಳಗಿನದಾಗುತ್ತದೆ. ತುಳು ಪ್ರದಾನವಾಗಿ ಬಳಕೆಯಲ್ಲಿರುವ ಮಂಗಳೂರು ಪ್ರದೇಶಕ್ಕೆ ಬಂದಾಗ ತುಳು ಅಲ್ಲಿ ವ್ಯಾಪಕ ಬಳಕೆಯ ಬಾಶೆಯಾಗಿ, ಪರಿಸರದ ಬಾಶೆಯಾಗಿ ಕಾಣಿಸುತ್ತದೆ. ಹಾಗಾಗಿ ಅಲ್ಲಿಯೆ ಸ್ತಳೀಯವಾಗಿ ಕಂಡುಬರುವ ಸಾಮಾಜಿಕವಾಗಿ ಕೆಳಮಟ್ಟದಲ್ಲಿ ಇರುವ ಕೊರಗರ ಬಾಶೆ ತುಳುವಿಗಿಂತ ಕೆಳಗಿನದು ಆಗುತ್ತದೆ.

ಈ ತರತಮ್ಯ ಕರ‍್ನಾಟಕದ, ಬಾರತದ ಎಲ್ಲ ಪರಿಸರಗಳಲ್ಲಿಯೂ ಒಂದಲ್ಲಾ ಇನ್ನೊಂದು ರೀತಿಯಲ್ಲಿ ಇದೆ. ತುಂಬಾ ಬಿನ್ನವಾದ ಬಹುಬಾಶಿಕ ಪರಿಸರ ಇರುವಲ್ಲಿಯೂ ಈ ತರತಮ ಮಾತ್ರ ಇದ್ದೆ ಇದೆ. ಈ ಕೊಂಡಿಯಲ್ಲಿ ಸಿಗುವ ಬಾಶೆಗಳೆಂಬ ಗಂಟುಗಳೆಶ್ಟು ಎಂಬಲ್ಲಿ ಸ್ವಲ್ಪ ಹೆಚ್ಚು ಕಡಿಮೆ ಆಗಬಹುದು. ಸಮಾನತೆ ಎಂದಾಗ ಕೊರಗ ಮಾತನಾಡುವವರೂ, ಕನ್ನಡ ಇಲ್ಲವೆ ಇಂಗ್ಲೀಶು ಮಾತನಾಡುವವರೂ ಅವರ ಬಾಶೆಯ ಕಾರಣಕ್ಕೆ ಮೇಲು-ಕೀಳು ಕಾರಣವನ್ನು ಅನುಬವಿಸುವಂತಾಗಬಾರದು. ಎಲ್ಲ ಬಾಶೆಗಳನ್ನೂ ಸಮಾನವಾಗಿ ಕಾಣುವಂತಾಗಬೇಕು. ಅದಕ್ಕೆ ಎಲ್ಲ ಬಾಶಿಕರೂ ತಮ್ಮ ಬಾಶೆಗಳನ್ನು ಬಿಟ್ಟು ಪ್ರದಾನ ಬಾಶೆಗಳಿಗೆ ಬರುವುದು ಪರಿಹಾರ ಆಗುವುದಿಲ್ಲ. ಹಾಗಾದರೆ ಅದನ್ನು ಪ್ರಜಾಪ್ರಬುತ್ವದ ಕೊಲೆ ಎಂದೆನ್ನಬೇಕಾಗುತ್ತದೆ.

ಬಾರತೀಯ ಹಲವರಲ್ಲಿ ಈ ತರತಮ ರಚನೆಯಲ್ಲಿ ತಮಗಿಂತ ಮೇಲಿರುವ ಬಾಶೆಗೆ ಹೆಚ್ಚು ಮರ‍್ಯಾದೆ ಕೊಡುತ್ತಾರೆ. ಬಾರತೀಯ ಸಾಮಾಜಿಕ ರಚನೆಯಲ್ಲಿ ಸಾಮಾಜಿಕ, ದರ‍್ಮಿಕ ಒಳಗೊಂಡು ಸಾಂಸ್ಕೃತಿಕವಾದ ಹಲವು ಆಯಾಮಗಳಲ್ಲಿ ತಮಗಿಂತ ಮೇಲಿರುವವರನ್ನು ಕೆಳಗಿರುವವರು ಅನುಸರಿಸುವುದು, ಮಾದರಿಯಾಗಿ ತೆಗೆದುಕೊಳ್ಳುವುದು ಮತ್ತು ಅವರಿಗೆ ತುಸು ಹೆಚ್ಚು ಮರ‍್ಯಾದೆಯನ್ನು ಕೊಡುವುದು ಕಂಡುಬರುತ್ತದೆ. ಅದರಂತೆಯೆ ಬಾಶಿಕ ಅಂತಸ್ತಿನಲ್ಲಿ ತಮಗಿಂತ ಮೇಲಿರುವ ಬಾಶೆಗೆ ಕೆಳಗಿರುವ ಬಾಶೆಯ ಮಾತುಗರು ಹೆಚ್ಚಿನ ಮರ‍್ಯಾದೆಯನ್ನು ಕೊಡುತ್ತಾರೆ.

ಇತ್ತೀಚಿನ ದಿನಗಳಲ್ಲಿ ಕನ್ನಡದಂತಾ ಪ್ರದಾನ ಬಾಶೆಗಳಿಗೆ ರಾಜಕೀಯ ಕಾರಣದಿಂದಾಗಿ ತಮ್ಮ ಕೆಳಸ್ತಿತಿಗೆ ಕಾರಣವಾದ ಬಾಶೆಯನ್ನು ಒಡೆಯುವುದು ಇಲ್ಲವೆ ಎದುರಿಸುವುದು ಬದುಕಿನ ಅವಶ್ಯಕತೆ ಆಗಿರುತ್ತದೆ. ಇದು ಸಣ್ಣ ಸಣ್ಣ ಬಾಶೆಗಳಿಗೂ ವಾಸ್ತವ. ಆದುನಿಕ ಕಾಲದ ಹಲವಾರು ಬೆಳವಣಿಗೆಗಳಿಂದಾಗಿ ಇಂದು ಬಾಶೆಗಳ ನಡುವಿನ ಅಸಮಾನತೆ ಬಹುವ್ಯಾಪಕವಾಗಿ ಬೆಳೆದು ನಿಂತಿದೆ. ಹಾಗಾಗಿ ತಮ್ಮ ಈ ಸ್ತಿತಿಗೆ ಕಾರಣವಾದ ಬಾಶೆಯನ್ನು ಒಡೆಯುವುದು, ಎದುರಿಸುವುದು ಅನಿವರ‍್ಯದ ಸಾಮಾಜಿಕ ಮುಂಚಲನೆ ಎಂದು ಎಲ್ಲರೂ ಬಾವಿಸಿಕೊಳ್ಳುತ್ತಾರೆ.

ಈ ವಾಸ್ತವವನ್ನು ಶಿಕ್ಶಣಕ್ಕೂ ಎಳೆದು ತಂದು ಸಾಮಾಜಿಕ ಅಂತಸ್ತಿನಲ್ಲಿ ತಮ್ಮ ಮೇಲಿನ ಬಾಶೆಯ ಶಿಕ್ಶಣವನ್ನು ಅವರು ಬಯಸುತ್ತಾರೆ. ಹೀಗಾಗಿ ಈ ಮೇಲಿನ ನಿರ‍್ಶನದ ಸಂರ‍್ಬದಲ್ಲಿ ಕೊರಗರು ಶಿಕ್ಶಣವನ್ನು ತುಳುವಿನಲ್ಲಿ ಇಶ್ಟಪಡಬಹುದು, ಆದರೆ ತುಳುವರು ಕನ್ನಡವನ್ನು ಇಶ್ಟಪಡಬಹುದು. ಕನ್ನಡದವರು ಶಿಕ್ಶಣದ ವಿಚಾರದಲ್ಲಿ ಇಂಗ್ಲೀಶನ್ನು ಇಶ್ಟಪಡುತ್ತಾರೆ. ಹಿಂದಿಯನ್ನು ಇಶ್ಟಪಡುವ ಸ್ತಿತಿ ಬೇರೆ ಹಲವು ಕಾರಣಗಳಿಂದ ಇಲ್ಲ. ಈ ಮನಸ್ತಿತಿಯನ್ನು ಮುರಿದು ಅವರವರ ಬಾಶೆಗಳಲ್ಲಿ ಪ್ರಾತಮಿಕ ಶಿಕ್ಶಣವನ್ನು ಕೊಡುವ ಕೆಲಸವನ್ನು ಮಾಡಲೇಬೇಕಾದ ಜರೂರು ಇದೆ.