ಮನುಶ್ಯ ದೇಹರಚನೆ ಮತ್ತು ಬಾಶಾ ಗಳಿಕೆ

Date: 13-09-2024

Location: ಬೆಂಗಳೂರು

"ಶಿಕ್ಶಣ ಎನ್ನುವಂತದ್ದು ಮಗು ಪ್ರಯತ್ನಪೂರ‍್ವಕವಾಗಿ ಕಲಿಯಬೇಕಾಗಿರುವಂತದ್ದು. ಆದ್ದರಿಂದ ಇದು ಮನುಶ್ಯರ ಆಂತರಿಕೆ ಗಳಿಕೆ ಆಗಿರದೆ ಬಾಹ್ಯ ಕಲಿಕೆ ಆಗಿರುತ್ತದೆ. ಮಗು ಈ ಬೂಮಿಗೆ ಬಂದ ಮೇಲೆ ತಾಯಿಯ ಸ್ವರ್‍ಶವನ್ನು ಅರಿಯುವುದರಿಂದ ಮೊದಲ್ಗೊಂಡು ಪ್ರತಿಯೊಂದನ್ನೂ ಪಡೆಯಬೇಕು," ಎನ್ನುತ್ತಾರೆ ಅಂಕಣಕಾರ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಮನುಶ್ಯ ದೇಹರಚನೆ ಮತ್ತು ಬಾಶಾ ಗಳಿಕೆ’ ಕುರಿತು ಬರೆದಿರುವ ಲೇಖನ.

ಮಗುವೊಂದು ಬೂಮಿಗೆ ಬಂದಾಗ ಆಡುವ ಉಸಿರು, ಸೋಕುವ ಗಾಳಿ, ಕೇಳುವ ದನಿ ಎಲ್ಲವೂ ಹೊಸದು. ಎಲ್ಲವನ್ನೂ ಪಡೆದುಕೊಳ್ಳುವ ಸಾಮರ್‍ತ್ಯ ಇರುವ ಮಗುವೊಂದು ಬೂಮಿಗೆ ಬಂದಾಗ ಎಲ್ಲವನ್ನೂ ಪಡೆದುಕೊಳ್ಳಬೇಕು. ಹೀಗೆ ಪಡೆದುಕೊಳ್ಳುವ ಪ್ರಕ್ರಿಯೆಯಲ್ಲಿ ಬಿನ್ನತೆಗಳು ಇರುತ್ತವೆ. ಕೆಲವನ್ನು ಮಗು ನಿರ‍್ಗ ಸಹಜವಾಗಿ ಗಳಿಸಿಕೊಳ್ಳುತ್ತದೆ. ಇನ್ನು ಕೆಲವನ್ನು ಪ್ರಯತ್ನ ಪೂರ‍್ವಕವಾಗಿ ಕಲಿತುಕೊಳ್ಳಬೇಕು. ಪ್ರಾಕ್ರುತಿಕವಾಗಿ ಮಗು ಪಡೆದುಕೊಳ್ಳುವ ಉಸಿರಾಟದಂತಾ ದೇಹಿಕ ವಿಚಾರಗಳು ಮಗುವನ್ನು ಈ ಬೂಮಿಯ ಪರಿಸರದಲ್ಲಿ ಬದುಕುವುದಕ್ಕೆ ತಯಾರುಗೊಳಿಸುತ್ತವೆ. ಆನಂತರ ಈ ಜಗದ ಜಂಜಾಟದಲ್ಲಿ ಮಗು ಬೀಳುತ್ತದೆ. ಬೂಮಿಯ ಮೇಲಿನ ಎಲ್ಲ ಜೀವಸಂಕುಲದ ಹಾಗೆಯೆ ಮನುಶ್ಯ ಪ್ರಾಣಿಯೂ ಬದುಕುವುದಕ್ಕೆ ಬೇಕಾಗುವಶ್ಟನ್ನು ಪ್ರಕ್ರುತಿಯಿಂದ ಸಹಜವಾಗಿ ಗಳಿಸಿಕೊಳ್ಳುತ್ತದೆ. ಇನ್ನು ಕೆಲವನ್ನು ಮಗು ಬೆಳೆಯುತ್ತಾ ಕ್ರಮೇಣ ಸಾಮಾಜಿಕ ಬದುಕಿಗೆ ಅವಶ್ಯವಾದುದನ್ನು ಸುತ್ತಲಿನ ಪರಿಸರದಿಂದ ಪ್ರಯತ್ನ ಪೂರ‍್ವಕವಾಗಿ ಕಲಿತುಕೊಳ್ಳುತ್ತದೆ. ಈ ಎರಡನ್ನು ಬಿನ್ನವಾಗಿ ಗಳಿಕೆ (Aquisation) - ಕಲಿಕೆ (Learning) ಎಂದು ಕರೆಯಬಹುದು. ಈ ಎರಡರ ನಡುವಿನ ಬಿನ್ನತೆಯನ್ನು ಜೀವಶಾಸ್ತ್ರಗ್ನರು, ಶಿಕ್ಶಣ ಶಾಸ್ತ್ರಗ್ನರು ವಿವರಿಸುತ್ತಾರೆ. ಗಳಿಕೆ ಆಂತರಿಕ (Internal) ಆಗಿದ್ದರೆ ಕಲಿಕೆ ಬಾಹ್ಯ (External) ಆಗಿರುತ್ತದೆ.

ಶಿಕ್ಶಣ ಎನ್ನುವಂತದ್ದು ಮಗು ಪ್ರಯತ್ನಪೂರ‍್ವಕವಾಗಿ ಕಲಿಯಬೇಕಾಗಿರುವಂತದ್ದು. ಆದ್ದರಿಂದ ಇದು ಮನುಶ್ಯರ ಆಂತರಿಕೆ ಗಳಿಕೆ ಆಗಿರದೆ ಬಾಹ್ಯ ಕಲಿಕೆ ಆಗಿರುತ್ತದೆ. ಮಗು ಈ ಬೂಮಿಗೆ ಬಂದ ಮೇಲೆ ತಾಯಿಯ ಸ್ವರ್‍ಶವನ್ನು ಅರಿಯುವುದರಿಂದ ಮೊದಲ್ಗೊಂಡು ಪ್ರತಿಯೊಂದನ್ನೂ ಪಡೆಯಬೇಕು. ಸ್ರ‍ರ್‍ಶ, ವಾಸನೆ, ಬಣ್ಣ ಮೊದಲಾದ ಇಂದ್ರಿಯ ಸಂಬಂದಿ ಅರಿವನ್ನು, ಹಸಿವು, ಬಾಯಾರಿಕೆ ಮೊದಲಾದ ದೇಹಸಂಬಂದಿ ಅರಿವನ್ನು, ಪ್ರೀತಿ ಮೊದಲಾದ ಮನಸಂಬಂದಿ ಅರಿವನ್ನು, ತಾಯಿ, ಮನೆ, ಸಮಾಜ ಮೊದಲಾದ ಸಮಾಜ ಸಂಬಂದಿ ಅರಿವನ್ನು ಮಗು ಪಡೆದುಕೊಳ್ಳುತ್ತದೆ. ಈ ಎಲ್ಲವನ್ನು ಮಗುವೊಂದು ಪಡೆದುಕೊಳ್ಳುವುದು ಸ್ವತಂತ್ರವಾಗಿ ಇರುವುದಿಲ್ಲ. ಒಂದು ಇನ್ನೊಂದರೊಂದಿಗೆ ಪರಸ್ಪರ ಕೋದುಕೊಂಡ ಸ್ತಿತಿಯಲ್ಲಿ ಮಗು ಈ ಎಲ್ಲವನ್ನೂ ಪಡೆಯುತ್ತಿರುತ್ತದೆ. ಒಂದು ಕಲಿಕೆ ಇನ್ನೊಂದರ ಕಲಿಕೆಯನ್ನು ಸಹಜವಾಗಿ ಪ್ರಬಾವಿಸುತ್ತಿರುತ್ತದೆ ಮತ್ತು ಅದರಿಂದ ಪ್ರಬಾವಕ್ಕೊಳಗಾಗುತ್ತಿರುತ್ತದೆ. ಹೀಗೆ ಮಗು ಬೆಳೆಯುತ್ತದೆ. ಇದನ್ನು ಮಗುವಿನ ದೇಹಿಕ ಬೆಳವಣಿಗೆ, ಮಾನಸಿಕ ಬೆಳವಣಿಗೆ ಮತ್ತು ಸಾಮಾಜಿಕ ಬೆಳವಣಿಗೆ ಎಂದು ಸ್ತೂಲವಾಗಿ ಹೇಳಬಹುದು. ಮಗುವಿನ ದೇಹದ ಮತ್ತು ದೇಹಿಕ ಬೆಳವಣಿಗೆಯು ಮಗುವಿನ ಮಾನಸಿಕ ಬೆಳವಣಿಗೆಯನ್ನು ಸಹಜವಾಗಿ ನಿಯಂತ್ರಿಸುತ್ತಿರುತ್ತದೆ. ಈ ಎರಡರ ಬೆಳವಣಿಗೆ ಸಹಜವಾಗಿ ಮಗುವಿನ ಸಾಮಾಜಿಕ ಬೆಳವಣಿಗೆಯನ್ನು ನಿಯಂತ್ರಿಸುತ್ತಿರುತ್ತದೆ.

ಮನುಶ್ಯ ದೇಹ ರಚನೆಯಲ್ಲಿ ಉಸಿರಾಟ, ಪಚನಕ್ರಿಯೆ, ಎದೆಬಡಿತ, ಅಲ್ಲದೆ ನಡೆದಾಡುವುದು ಮೊದಲಾಗಿ ಹಲವಾರು ಕ್ರಿಯೆಗಳನ್ನು ಮಗು ಸಹಜವಾಗಿ ಪಡೆದುಕೊಳ್ಳುತ್ತದೆ. ಇದಕ್ಕೆ ಯಾವುದೆ ಬಗೆಯ ಪ್ರೇರಕಗಳ ಅವಶ್ಯಕತೆ ಇಲ್ಲ. ಮಗು ಯಾರನ್ನು, ಯಾವುದನ್ನು ಅನುಸರಿಸುವ ಇಲ್ಲವೆ ಅನುಕರಿಸುವ ಅಗತ್ಯವೂ ಇಲ್ಲ. ಸುತ್ತಲಿನ ಸಮಾಜದಲ್ಲಿ ಹಲವಾರು ಪ್ರಾಣಿ-ಪಕ್ಶಿಗಳೂ ಹೀಗೆ ಸಹಜ ಗಳಿಕೆ ಪ್ರಕ್ರಿಯೆಯ ಬಾಗವಾಗಿ ಪಡೆದುಕೊಳ್ಳುವುದನ್ನು ಕಾಣಬಹುದು. ಕೆಲ ಜೀವಿಗಳು ಹುಟ್ಟಿದ ತಕ್ಶಣವೆ ಹಾರುವುದನ್ನು ಗಳಿಸಿಕೊಳ್ಳುತ್ತವೆ, ಇನ್ನು ಕೆಲವು ಈಜುವುದನ್ನು, ಇನ್ನು ಕೆಲವು ನಡೆಯುವುದನ್ನು ಗಳಿಸಿಕೊಳ್ಳುತ್ತವೆ. ಅವುಗಳಿಗೆ ಹಾರುವ, ಈಜುವ, ನಡೆಯುವ ಮೊದಲಾದ ಪ್ರಕ್ರಿಯೆಗಳ ಅರಿವೂ ಕೂಡ ಸಹಜವಾಗಿ ಬಂದಿರುತ್ತದೆ. ಹಾಗಾಗಿ ಇದನ್ನು ದೇಹದ ಆಂತರಿಕ ಗಳಿಕೆ ಎನ್ನಲಾಗುವುದು. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಈ ಮೇಲೆ ಮಾತನಾಡಿದ ಪರಸ್ಪರ ಪ್ರಬಾವ ಬೀರುವ ವಿವಿದ ಬಗೆಯ ಬೆಳವಣಿಗೆಗಳ ಬಾಗವಾಗಿ ಇವು ಬರುವುದಿಲ್ಲ. ದೇಹದ ಬೆಳವಣಿಗೆಯ ಬಾಗವಾಗಿ ಇವುಗಳನ್ನು ನೋಡಬಹುದು. ಆದರೆ, ದೇಹದ ಬೆಳವಣಿಗೆ ಇತರ ಕಲಿಕಾ ಪ್ರಕ್ರಿಯೆಗಳನ್ನು ನಿಯಂತ್ರಿಸಬಹುದು. ಇದಕ್ಕೆದುರಾಗಿ ದೇಹದ ಬೆಳವಣಿಗೆಯನ್ನು ಉಳಿದ ಕಲಿಕಾ ಪ್ರಕ್ರಿಯೆಗಳು ಪ್ರಬಾವಿಸಲಾರವು. ಆದ್ದರಿಂದ ಈ ಸಹಜ ಗಳಿಕೆ ಬಿನ್ನವಾಗುತ್ತದೆ. ಸಹಜ ಗಳಿಕೆಯಲ್ಲಿ ಯಾವುದೆ ಮಗು ಸೋತರೆ, ಅಂದರೆ ಸಹಜವಾಗಿ ಗಳಿಸಿಕೊಳ್ಳಬೇಕಾದವುಗಳಲ್ಲಿ ಯಾವುದನ್ನಾದರು ಮಗು ಪಡೆಯದೆ ಹೋದರೆ ಅದು ಆ ಮಗುವಿನ ಪ್ರಾಕ್ರುತಿಕ ದೇಹಿಕ ಊನವಾಗಿರುತ್ತದೆ.

ಮಗು ಹಸಿವು, ಬಾಯಾರಿಕೆಯನ್ನು ಅನುಬವಿಸುವ ವೇಳೆಗೆ ತಾಯಿಯ ಸಕ್ಯದಲ್ಲಿ ಇರುತ್ತದೆ. ಇದರಿಂದ ಮಗುವಿಗೆ ಹಸಿವು, ಬಾಯಾರಿಕೆಗಳ ಅರಿವು ಬರುವುದರ ಜೊತೆಜೊತೆಗೆ ತಾಯಿಯ ಸ್ರ‍ರ್‍ಶವೂ ದೊರೆಯುತ್ತದೆ. ಈ ಸ್ರ‍ರ್‍ಶವು ತಾಯಿಯ ಪ್ರೀತಿಯನ್ನೂ ಕೊಡುತ್ತದೆ. ಹೀಗೆ ಈ ಎಲ್ಲವನ್ನೂ ಮಗು ಒಟ್ಟೊಟ್ಟಿಗೆ ಕಲಿಯುತ್ತದೆ. ಮಗು ಬೂಮಿಗೆ ಬಂದ ಬಳಿಕ ಹಸಿದಾಗ ದೊರೆಯುವ ತಾಯಿಯ ಹಾಲು, ತಾಯಿಯ ಸ್ರ‍ರ್‍ಶ ಮತ್ತು ಆ ಮೂಲಕ ದೊರೆಯುವ ತಾಯಿಯ ಪ್ರೀತಿ ಇವು ಮಗುವಿನ ಕಲಿಕಾ ಪ್ರಕ್ರಿಯೆಯ ಸಂಕರ‍್ಣತೆಯನ್ನು ಬೆಸೆಯುತ್ತವೆ. ಆದ್ದರಿಂದಲೆ ಮನುಶ್ಯರ ಹಸಿವು, ದೇಹದ ಅವಶ್ಯಕತೆಗಳು ಮತ್ತು ಪ್ರೀತಿ ಪರಸ್ಪರ ಬಿಡಿಸಲಾಗದಂತೆ ಬೆಸೆದುಕೊಂಡಿರುವುದು. ಹಸಿವಿಗೆ ಹಾಲುಣಿಸುವ ತಾಯಿ ಸ್ರ‍್ಶಸುಕವನ್ನೂ ಪ್ರೀತಿಯ ಸುಕವನ್ನೂ ಒಟ್ಟೊಟ್ಟಿಗೆ ಕೊಡುತ್ತಿರುತ್ತಾಳೆ. ಹಾಗಾಗಿ ಮಗು ಇವುಗಳನ್ನು ಬೇರೆಯಾಗಿಸಲಾರದು. ಇದು ಬದುಕಿನ ಉದ್ದಕ್ಕೂ ಸಹಜವಾಗಿ ಮುಂದುವರೆಯುತ್ತದೆ.

ಮಗುವೊಂದು ಹೀಗೆ ಏನೆಲ್ಲವನ್ನು ಪಡೆದುಕೊಳ್ಳುತ್ತದೆ ಎಂಬುದನ್ನು ಅವಲೋಕಿಸಬೇಕು. ಮಗು ತನ್ನ ದೇಹಸಾಮರ್‍ತ್ಯಕ್ಕೆ ಮತ್ತು ಮಾನಸಿಕ ಸಾಮರ್‍ತ್ಯಕ್ಕೆ ದಕ್ಕುವವುಗಳನ್ನು ಹೇಗೆ ಗ್ರಹಿಸುತ್ತದೆ, ಮಗುವಿನ ಈ ಗ್ರಹಿಕೆಯನ್ನು ಯಾವ ಪ್ರಬಾವಗಳು ನಿಯಂತ್ರಿಸುತ್ತವೆ, ತನ್ನ ಸುತ್ತಲಿನ ಜಗತ್ತನ್ನು ಮಗು ಹೇಗೆ ಅರ‍್ತ ಮಾಡಿಕೊಳ್ಳುತ್ತದೆ ಎಂಬ ಸೂಕ್ಷ್ಮವಾದ ವಿಚಾರಗಳನ್ನು ತಿಳಿದುಕೊಳ್ಳಬೇಕು.

ಮಗು ಏನೆಲ್ಲವನ್ನು ಪಡೆದುಕೊಳ್ಳುತ್ತದೆ? ಮಗು ತನ್ನ ಪರಿಸರದ ಸುತ್ತ ದೊರೆಯುವ ಎಲ್ಲವನ್ನೂ ಅದು ಪಡೆದುಕೊಳ್ಳುತ್ತದೆ. ಅತ್ಯಂತ ಸಹಜವಾಗಿ ಹಸಿವನ್ನು ಅದು ಅನುಬವಿಸುತ್ತದೆ. ಹಸಿವಿನ ಸುಕವನ್ನು, ಹಸಿದಾಗ ದೊರೆಯುವ ಹಾಲು, ಆ ಹಾಲಿನ, ಹಸಿವನ್ನು ನೀಗುವುದರ ಸುಕವನ್ನು ಅದು ಅರಿತುಕೊಳ್ಳುತ್ತದೆ. ಅದರಿಂದ ದೇಹದ ಬೆಳವಣಿಗೆಗೆ ಅದು ಪೂರಕವಾಗಿರುತ್ತದೆ. ಹಸಿವು ಮತ್ತು ಅದನ್ನು ನೀಗಿಸುವುದು ಎಂಬ ಎರಡು ಬಿನ್ನ ಪ್ರಕ್ರಿಯೆಗಳನ್ನು ಮಗು ಕಲಿಯುತ್ತದೆ.

ಇದು ಮಗುವಿನ ಮಾನಸಿಕ ಬೆಳವಣಿಗೆಗೆ ಪೂರಕವಾಗಿರುತ್ತದೆ. ಈ ಪ್ರಕ್ರಿಯೆಗಳಿಗೆ ಪೂರಕವಾಗಿರುವುದು ತಾಯಿ. ತಾಯಿ ಸಾಮಾಜಿಕತೆಯನ್ನು ಮಗುವಿಗೆ ತನ್ನ ಸ್ರ‍ರ್‍ಶ ಮತ್ತು ಹಾಲಿನ ಮೂಲಕ ಕೊಡುತ್ತಾಳೆ. ಅಲ್ಲಿಗೆ ಮಗುವಿಗೆ ಸಾಮಾಜಿಕತೆ ದಕ್ಕುತ್ತದೆ. ಮಗುವಿಗೆ ಸಂಬಂದಿಸಿದ ಮೊದಮೊದಲ ಕೆಲವು ತಿಂಗಳುಗಳವರೆಗಿನ ಎಲ್ಲ ಚಟುವಟಿಕೆಗಳು ಈ ರೀತಿಯ ಒಂದು ರಚನೆಯನ್ನು ಹೊಂದಿರುತ್ತವೆ. ಮಗು ಸ್ರ‍ರ್‍ಶದ ಅರಿವನ್ನು ಅದರೊಂದಿಗೆ ಕೇಳುವ, ನೋಡುವ ಅರಿವನ್ನೂ ಪಡೆದುಕೊಳ್ಳುತ್ತದೆ. ಇಲ್ಲಿಯೂ ಮುಟ್ಟುವ ಅರಿವಿನಂತದೆ ಸಂಕರ‍್ಣ ಕಲಿಕಾ ಪ್ರಕ್ರಿಯೆಯೊಂದು ಸರಪಣಿಯಂತೆ ಬೆಸೆದುಕೊಳ್ಳುತ್ತದೆ. ಮಗು ಕೇಳುವ ಮತ್ತು ನೋಡುವ ಪ್ರತಿಯೊಂದೂ ಅದರ ಸಮಗ್ರ ಬೆಳವಣಿಗೆಗೆ ಪೂರಕವಾಗಿರುತ್ತದೆ. ಕೇಳುವಿಕೆ ಮತ್ತು ನೋಡುವಿಕೆ ಇವು ಸಹಜವಾಗಿಯೆ ದೇಹದ ಬೆಳವಣಿಗೆ. ಇವೆರಡೂ ಮಗುವಿನ ಆಂತರಿಕ ಸಾಮರ್‍ತ್ಯಗಳೂ ಆಗಿವೆ. ಈ ಕೇಳುವ ಮತ್ತು ನೋಡುವ ಸಾಮರ್‍ತ್ಯದಿಂದ ಮಗು ಏನನ್ನು ಪಡೆದುಕೊಳ್ಳುತ್ತದೆಯೊ ಅವು ಮಗುವಿನ ಮಾನಸಿಕ ಬೆಳವಣಿಗೆಯನ್ನು ಪ್ರಬಾವಿಸುತ್ತವೆ. ಈ ಕೇಳುವ ಮತ್ತು ನೋಡುವ ಪ್ರಕ್ರಿಯೆಯಲ್ಲಿ ಮಗು ಪಡೆದುಕೊಳ್ಳುವ ಎಲ್ಲವೂ ಸಾಮಾಜಿಕವೆ ಆಗಿರುತ್ತವೆ.

ಮಗು ತಾಯಿಯ ದನಿಯನ್ನು ಕೇಳಬಹುದು, ತಾಯಿಯ ಮುಕವನ್ನು ನೋಡಬಹುದು. ಇವೆರಡೂ ಸಾಮಾಜಿಕವೆ ಆಗಿವೆ. ಹೀಗೆ ಮಗುವಿನ ಪ್ರತಿಯೊಂದು ಬೆಳವಣಿಗೆಯೂ ಒಂದು ಸಂಕರ‍್ಣ ರಚನೆಯಾಗಿರುತ್ತದೆ. ಇವುಗಳನ್ನು ಪರಸ್ಪರ ಬಿಡಿಸಲು ಸಾದ್ಯವಾಗದು. ಆದ್ದರಿಂದಲೆ ಮಗು ಬೆಳೆದ ಪರಿಸರದ ಬಾವನೆಗಳನ್ನೆ ನಿರಂತರ ಅನುಬವಿಸುತ್ತಿರುತ್ತದೆ. ಮಗುವಿಗೆ ಈ ಬಾವನೆಗಳನ್ನು ಅನುಬವಿಸುವುದಕ್ಕೆ ಸಾಕಶ್ಟು ಅವಕಾಶಗಳೂ ಇರಬೇಕು. ಇವು ಮಗುವಿನ ಮಾನಸಿಕ ಸ್ತಿತಿಯನ್ನು ಮತ್ತು ಸಾಮಾಜಿಕತೆಯನ್ನು ನಿರ‍್ದರಿಸುತ್ತವೆ.

ಈ ವಿಶಯವಾಗಿ ಮನೋವಿಗ್ನಾನಿಗಳು, ಮಕ್ಕಳತಗ್ನರು ಇನ್ನಶ್ಟು ಹೆಚ್ಚಾಗಿ ಬರೆಯಬಲ್ಲರು. ಇಲ್ಲಿ ಈ ವಿಚಾರಗಳನ್ನು ತುಸು ಮಾತನಾಡುವುದಕ್ಕೆ ಕಾರಣವೆಂದರೆ ಮಗುವೊಂದು ಹೇಗೆ ತನ್ನ ಸಾಮಾಜಿಕತೆಯನ್ನು ರೂಪಿಸಿಕೊಳ್ಳುತ್ತದೆ ಎಂಬುದನ್ನು ಅರಿತುಕೊಳ್ಳುವುದಕ್ಕೆ. ಇನ್ನು ಮುಂದಿನ ಬರಹಗಳಲ್ಲಿ ಮಗು ಬಾಶೆಯನ್ನು ಪಡೆದುಕೊಳ್ಳುವ ಪ್ರಕ್ರಿಯೆ ಬಗೆಗೆ ತುಸು ಮಾತನಾಡಬಹುದು.