ಕಲೆ ಜಗತ್ತನ್ನು ಬದಲಾಯಿಸಲೇ ಬೇಕೆಂದಿಲ್ಲ- ಫಿಯೊನಾ ಹಾಲ್

Date: 01-06-2021

Location: ಬೆಂಗಳೂರು

ಹಿರಿಯ ಪತ್ರಕರ್ತ-ಲೇಖಕ ರಾಜಾರಾಂ ತಲ್ಲೂರು ಅವರು ಜಾಗತಿಕ ಸಮಕಾಲೀನ ಕಲೆ ಮತ್ತು ಕಲಾವಿದರನ್ನು ಕುರಿತು ಬರೆಯುವ ಅಂಕಣ 'ಈಚೀಚೆ, ಇತ್ತೀಚೆ'. ಪ್ರತಿ ವಾರ ಪ್ರಕಟವಾಗುವ ಈ ಸರಣಿಯಲ್ಲಿ ಈ ಬಾರಿ ಆಸ್ಟ್ರೇಲಿಯಾ ಮೂಲದ ಕಂಟೆಂಪೊರರಿ ಆರ್ಟ್ ಕಲಾವಿದೆ ಫಿಯೋನಾ ಮಾರ್ಗರೆಟ್ ಹಾಲ್ ಅವರ ಕಲಾಬದುಕಿನ ಕುರಿತು ಬರೆದಿದ್ದಾರೆ.

ಕಲಾವಿದೆ: ಫಿಯೋನಾ ಮಾರ್ಗರೆಟ್ ಹಾಲ್ (Fiona Margaret Hall)
ಜನನ: 16 ನವೆಂಬರ್, 1953
ಶಿಕ್ಷಣ: ನ್ಯಾಷನಲ್ ಆರ್ಟ್ ಸ್ಕೂಲ್, ಸಿಡ್ನಿ, ಆಸ್ಟ್ರೇಲಿಯಾ
ವಾಸ: ಸಿಡ್ನಿ, ಆಸ್ಟ್ರೇಲಿಯಾ
ಕವಲು: ಕಂಟೆಂಪೊರರಿ ಆರ್ಟ್
ವ್ಯವಸಾಯ: ಸ್ಕಲ್ಪ್ಚರ್, ಪೇಂಟಿಂಗ್, ಇನ್ಸ್ಟಾಲೇಷನ್

ಫಿಯೊನಾ ಹಾಲ್ ಅವರ ಸಿ.ವಿ.ಗಾಗಿ ಇಲ್ಲಿ ಕ್ಲಿಕ್ ಮಾಡಿ:

ಆಸ್ಟ್ರೇಲಿಯಾದ ಕಂಟೆಂಪೊರರಿ ಕಲಾವಿದರಲ್ಲಿ ಪ್ರಮುಖರೆಂದು ಗುರುತಿಸಲಾಗುವ ಫಿಯೋನಾ ಹಾಲ್ ಸಾಮಾನ್ಯ ದೈನಂದಿನ ಬಳಕೆಯ ವಸ್ತುಗಳನ್ನು ಸಮಕಾಲೀನ ಮತ್ತು ಚಾರಿತ್ರಿಕ ಹೊಳಹುಗಳಿರುವ ಜೈವಿಕ ಸ್ವರೂಪದ ಕಲಾಕೃತಿಗಳಾಗಿ ರಚಿಸುವ ಮೂಲಕ ಜಾಗತೀಕರಣ, ಕೊಳ್ಳುಬಾಕತನ, ಕೊಲೋನಿಯಲಿಸಂ ಮತ್ತು ಪರಿಸರದ ಚರ್ಚೆಗಳನ್ನು ಮುನ್ನೆಲೆಗೆ ತರುವ ಮೂಲಕ ಪ್ರಸಿದ್ಧರು. ಅವರು ತಮ್ಮ ಕಲಾಕೃತಿಗಳ ಬಗ್ಗೆ ಸಂದರ್ಶನವೊಂದರಲ್ಲಿ ಇತ್ತೀಚೆಗೆ ಹೀಗೆ ಹೇಳಿಕೊಂಡಿದ್ದರು: “I’m not someone who thinks that art necessarily changes the world. I would never have thought when I started out with my art practice that I would end up making work that was quite concertedly referencing some of these issues. But maybe as one gets older you gain a different kind of awareness, and the emphasis of your work changes.” (ದಿ ಗಾರ್ಡಿಯನ್‌ನಲ್ಲಿ ಸ್ಟೆಪ್ ಹಾರ್ಮನ್ ಅವರಿಗೆ ನೀಡಿದ ಸಂದರ್ಶನದಲ್ಲಿ. 2016,ಮೇ)

ಫಿಯೋನಾ, ಪ್ರಸಿದ್ಧ ರೇಡಿಯೊ ಫಿಸಿಕ್ಸ್ ವಿಜ್ಞಾನಿ ರೂಬಿ ಪಯ್ನ್-ಸ್ಕಾಟ್ (ತಾಯಿ) ಮತ್ತು ಟೆಲಿಫೋನ್ ತಾಂತ್ರಿಕ ಪರಿಣಿತ ವಿಲಿಯಂ ಹೋಲ್ಮನ್ ಹಾಲ್ (ತಂದೆ) ಅವರ ಮಗಳು. ಆಕೆಯ ಅಣ್ಣ ಪ್ರಸಿದ್ಧ ಸಂಖ್ಯಾಶಾಸ್ತ್ರಜ್ಞ ಪೀಟರ್ ಗಾವಿನ್ ಹಾಲ್. ಬಾಲ್ಯದಲ್ಲಿ ಹೆತ್ತವರೊಂದಿಗೆ ವಾರಾಂತ್ಯದಲ್ಲಿ ಮನೆಯಿಂದ ಹೊರಗೆ ನಡಿಗೆಗೆ ಹೋಗುತ್ತಿದ್ದಾಗ ಆದ ಪರಿಸರದ ಸಖ್ಯ ಫಿಯೋನಾ ಮೇಲೆ ಬಹಳ ಪ್ರಭಾವ ಬೀರಿತ್ತು. ಅದನ್ನು ಅವರ ಕಲಾಕೃತಿಗಳಲ್ಲಿ ಕಾಣಬಹುದು. ಕಲಿಕೆಯ ವೇಳೆ ಆರ್ಕಿಟೆಕ್ಟ್ ಆಗಬಯಸಿದ್ದ ಫಿಯೋನಾ, ಕಲೆಯಲ್ಲಿ ಮುಂದುವರಿಸಬಯಸಿದರು. ಸಿಡ್ನಿಯ ನ್ಯಾಷನಲ್ ಆರ್ಟ್ ಸ್ಕೂಲಿನಲ್ಲಿ ಕಲಿಯುವಾಗತನ್ನ ಶಿಕ್ಷಕರ ಪ್ರಭಾವದಿಂದಾಗಿ ಫೊಟೋಗ್ರಫಿ ಕಡೆ ಆಸಕ್ತಿ ಬೆಳೆಸಿಕೊಂಡರು.

ಕಲಿಕೆಯ ಬಳಿಕ, ಇಂಗ್ಲೆಂಡಿಗೆ ಹೋಗಿ ಸ್ವಲ್ಪ ಕಾಲ ನೆಲೆಸಿದ ಫಿಯೋನಾ, ಅಲ್ಲಿಂದ ಐರೋಪ್ಯ ದೇಶಗಳನ್ನು ಸುತ್ತಿ, ಅಲ್ಲಿ ಗ್ಯಾಲರಿಗಳಿಂದ ಪಡೆದ ಅನುಭವದ ಆಧಾರದಲ್ಲಿ ಸಮಕಾಲೀನ ಕಲೆಯಲ್ಲಿ ತನ್ನನ್ನು ತೊಡಗಿಸಿಕೊಂಡರು. 77ರಲ್ಲಿ ಲಂಡನ್‌ನಲ್ಲಿ ತನ್ನ ಮೊದಲ ಕಲಾಪ್ರದರ್ಶನ ನೀಡಿದ ಬಳಿಕ, ತಾಯಿಯ ಅನಾರೋಗ್ಯದ ಕಾರಣಕ್ಕೆ ಆಸ್ಟ್ರೇಲಿಯಾಕ್ಕೆ ಹಿಂದಿರುಗಿದ ಫಿಯೋನಾ, ಮೆಲ್ಬರ್ನ್ ನಗರದಲ್ಲಿ ತನ್ನ ಫೊಟೋಗ್ರಫಿ ಪ್ರದರ್ಶನ ನೀಡಿದರು. ಮುಂದೆ ಅಮೆರಿಕಕ್ಕೆ ತೆರಳಿ, ನ್ಯೂಯಾರ್ಕ್‌ನ ರೋಚೆಸ್ಟರ್‌ನಲ್ಲಿ ಕಲಾ ಸ್ನಾತಕ ಪದವಿ ಪಡೆದರು. 81ರಲ್ಲಿ ಅಲ್ಲಿಂದ ಹಿಂದಿರುಗಿದ ಬಳಿಕ ಅವರು ಫೊಟೋಗ್ರಫಿಯಿಂದ ಸಮಕಾಲೀನ ಕಲಾಕೃತಿಗಳಿಗೆ ಪಲ್ಲಟಗೊಂಡರು. ಅವರ ಹಲವಾರು ಪ್ರದರ್ಶನಗಳು ಆಸ್ಟ್ರೇಲಿಯಾ ಮತ್ತು ಜಗತ್ತಿನದ್ಯಂತ ನಡೆದವು. ಇಂದು ಆಸ್ಟ್ರೇಲಿಯಾದ ಹಲವು ಪ್ರಮುಖ ಮ್ಯೂಸಿಯಂಗಳಲ್ಲಿ ಅವರ ಕಲಾಕೃತಿಗಳ ಸಂಗ್ರಹ ಇದೆ.

ಅವರ ಪ್ರಮುಖ ಕಲಾಕೃತಿಗಳಲ್ಲಿ, Sardine cans ಸರಣಿ (Paradisus Terrestris), The Antipodean Suite, Morality Dolls - The Seven Deadly Sins, Illustrations to Dante's Divine Comedy, Fern Garden, A Folly for Mrs Macquarie, Wrong Way Time ಸೇರಿವೆ. ಅವರು ಹಲವು ಪ್ರಮುಖ ಜಾಗತಿಕ ಕಲಾಪ್ರದರ್ಶನಗಳಲ್ಲಿ ಪಾಲ್ಗೊಂಡಿದ್ದಾರೆ ಮತ್ತು ಆಸ್ಟ್ರೇಲಿಯಾದ ಹಲವು ಪ್ರಮುಖ ಪುರಸ್ಕಾರಗಳನ್ನು ಗಳಿಸಿಕೊಂಡಿದ್ದಾರೆ.

ತನ್ನ ಹೆಚ್ಚಿನ ಕಲಾಕೃತಿಗಳು ಬಳಸುವ ಸಾಮಗ್ರಿಗಳು ಮತ್ತು ಅದು ಕಲಾಕೃತಿಯಾಗಿ ನಿಂತು ಏನನ್ನು ವಿಷದಪಡಿಸುತ್ತವೆ ಎಂಬುದರ ನಡುವೆ ಅಂತರ ಇಲ್ಲ.ಸಾಮಗ್ರಿ ತಾನೇ ತಾನಾಗಿ ಹೊತ್ತಿರುವ ಅರ್ಥ ಮತ್ತು ಅದನ್ನು ಕಲಾಕೃತಿಯಾಗಿಸಿ ಒಂದು ಸಿದ್ಧಾಂತಕ್ಕೆ ಒಗ್ಗಿಸಿದಾಗ ಅದು ಎರಡೂ ಅಂಶಗಳು ಸಮಾನವಾಗಿ ಮುಖ್ಯ ಅನ್ನಿಸುತ್ತವೆ.

ತನ್ನ ಕಲಾಕೃತಿಗಳ ಅಂದ, ಕುಸುರಿ ಮತ್ತು ಅದರ ತಾಂತ್ರಿಕ ನಾಜೂಕುತನದಿಂದಾಗಿ ಗಮನ ಸೆಳೆಯುತ್ತವೆ. ಈ ಅಂಶಗಳು ವೀಕ್ಷಕರನ್ನು ಕಲಾಕೃತಿಯೆಡೆಗೆ ಸೆಳೆಯುವ ಅಂಶಗಳಾಗಿದ್ದು, ಕಲಾಕೃತಿಯನ್ನು ಅನುಭವಿಸುವಾಗ ನೋಡುಗ ಅದನ್ನು ಆಳವಾಗಿ ಅರ್ಥಮಾಡಿಕೊಳ್ಳಲು ಸಾಧ್ಯವಾಗುತ್ತದೆ ಎಂಬುದು ಅವರ ವಾದ.

ಫಿಯೋನಾ ಹಾಲ್ ಉಪನ್ಯಾಸ ಆರ್ಟ್ ಬಾಸೆಲ್‌ನಲ್ಲಿ: