ಅಲ್ಲಿರುವುದು ನನ್ನಮನೆ – ದೊ ಹೊ ಸುಹ್ - News

ಅಲ್ಲಿರುವುದು ನನ್ನಮನೆ – ದೊ ಹೊ ಸುಹ್

Date: 03-08-2021

Location: ಬೆಂಗಳೂರು

ಹಿರಿಯ ಪತ್ರಕರ್ತ-ಲೇಖಕ ರಾಜಾರಾಂ ತಲ್ಲೂರು ಅವರು ಜಾಗತಿಕ ಸಮಕಾಲೀನ ಕಲೆ ಮತ್ತು ಕಲಾವಿದರನ್ನು ಕುರಿತು ಬರೆಯುವ ಅಂಕಣ 'ಈಚೀಚೆ, ಇತ್ತೀಚೆ'. ಪ್ರತಿ ವಾರ ಪ್ರಕಟವಾಗುವ ಈ ಸರಣಿಯಲ್ಲಿ ಈ ಬಾರಿ ಅಮೆರಿಕ ಮೂಲದ ಇನ್ಸ್ಟಾಲೇಷನ್, ಪೇಂಟಿಂಗ್ ಹಾಗೂ ಫಿಲ್ಮ್ ಕಲಾವಿದ ದೊ ಹೊ ಸುಹ್ ಅವರ ಕಲಾಬದುಕಿನ ಕುರಿತು ಬರೆದಿದ್ದಾರೆ.

ಕಲಾವಿದ: ದೊ ಹೊ ಸುಹ್ (Do Ho Suh)
ಜನನ: 1962
ಶಿಕ್ಷಣ: ಸೋಲ್ ನ್ಯಾಷನಲ್ ಯೂನಿವರ್ಸಿಟಿ, ಕೊರಿಯಾ; ರೋಡ್ಸ್ ಐಲಂಡ್ ಯೂನಿವರ್ಸಿಟಿ ಮತ್ತು ಯೇಲ್ ಯೂನಿವರ್ಸಿಟಿ, ಅಮೆರಿಕ
ವಾಸ: ನ್ಯೂಯಾರ್ಕ್, ಅಮೆರಿಕ, ಸೋಲ್, ದ. ಕೊರಿಯಾ
ಕವಲು: ಇನ್ಸ್ಟಾಲೇಷನ್
ವ್ಯವಸಾಯ: ಸ್ಕಲ್ಪ್ಚರ್, ಇನ್ಸ್ಟಾಲೇಷನ್, ಪೇಂಟಿಂಗ್, ಫಿಲ್ಮ್

ದೊ ಹೊ ಸುಹ್ ಅವರ ಸಿ.ವಿ.ಗಾಗಿ ಇಲ್ಲಿ ಕ್ಲಿಕ್ ಮಾಡಿ:

ಒಂದು ಸ್ಥಳಾವಕಾಶ ಮತ್ತು ಅದು ಒಬ್ಬ ವ್ಯಕ್ತಿಗೆ ಕಟ್ಟಿ ಕೊಡುವ ಅನುಭವಗಳನ್ನು ವೈಯಕ್ತಿಕವಾಗಿ, ಸಾಮೂಹಿಕವಾಗಿ, ಭೌತಿಕವಾಗಿ, ಮಾನಸಿಕವಾಗಿ, ಸ್ಥಿರವಾಗಿ ಮತ್ತು ಅಸ್ಥಿರವಾಗಿ ಅನ್ವೇಷಿಸುವ ದೊ ಹೊ ಸುಹ್ ಅವರ ಶಿಲ್ಪಗಳು ಜಾಗತಿಕ ನೆಲೆಯಲ್ಲಿ ಸಾಂಸ್ಕೃತಿಕವಾಗಿ ಒಬ್ಬ ವ್ಯಕ್ತಿಯ ಮತ್ತು ಒಂದು ಸಮೂಹದ ನಡುವಿನ ಸಂಬಂಧಗಳನ್ನು ಬಿಚ್ಚಿಡುತ್ತವೆ. ಸ್ವತಃ ಅಲೆಮಾರಿ ಆಗಿರುವ ಸುಹ್‌ಗೆ ತಾನು ಬದುಕಿದ ಸ್ಥಳಗಳಲ್ಲಿರುವ ಸ್ಥಾವರ “ಮನೆಗಳು” ತನ್ನೊಂದಿಗೆ ಸಂಸ್ಕೃತಿಯಾಗಿ, ಚರಿತ್ರೆಯಾಗಿ, ಜಂಗಮಗೊಂಡು ಭೌಗೋಳಿಕ ಎಲ್ಲೆಗಳನ್ನು ಮೀರಿ ಹರಿದುಬಂದ ಬಗೆಯ ಕುರಿತು ಇರುವ ಕೌತುಕವೇ ಅವರ ಕಲಾಕೃತಿಗಳು.

1962ರಲ್ಲಿ ದಕ್ಷಿಣ ಕೊರಿಯಾದ ಸೋಲ್‌ನಲ್ಲಿ ಕಲಾವಿದ ಕುಟುಂಬದಲ್ಲಿ ಜನಿಸಿದ ಸುಹ್ ಅವರ ತಂದೆ ಸೆ-ಒಕ್ ಸುಹ್, 60ರ ದಶಕದಲ್ಲಿ ಕೊರಿಯಾದ ಸಾಂಪ್ರದಾಯಿಕ ಶಾಯಿಚಿತ್ರಗಳಿಗೆ ಆಧುನಿಕ ಸ್ವರೂಪ ನೀಡಿದ ಪ್ರಸಿದ್ಧ ಕಲಾವಿದರು. ಸೋಲ್ ನ್ಯಾಷನಲ್ ವಿವಿಯಲ್ಲಿ ಸಾಂಪ್ರದಾಯಿಕ ಕೊರಿಯನ್ ಕಲೆಯನ್ನು ಅಭ್ಯಾಸ ಮಾಡಿದ ಬಳಿಕ, ಕಡ್ಡಾಯ ಸೇನಾ ಸೇವೆಯ ಅವಧಿಯನ್ನು ಪೂರೈಸಿ, ಆ ಬಳಿಕ ತನ್ನ ಶಿಕ್ಷಣವನ್ನು ಮುಂದುವರಿಸಲು ಅಮೆರಿಕಕ್ಕೆ ತೆರಳಿದ ಸುಹ್, ಅಲ್ಲಿಯೇ ನೆಲೆ ನಿಲ್ಲುತ್ತಾರೆ. ಆರಂಭದಲ್ಲಿ ಮೀನುಗಳ ಬಗ್ಗೆ (ಮರೈನ್ ಬಯಾಲಜಿ) ಕಲಿಯಬೇಕೆಂದಿದ್ದ ಸುಹ್, ಸಾಕಷ್ಟು ಅಂಕಗಳು ಬರದ್ದರಿಂದ ಕಲೆಯ ಕಡೆ ತಿರುಗಿಕೊಂಡಿದ್ದರು. ಅವರ ಕಲಾವಿದ ತಂದೆಯ ಬಳಗದ ಕಲಾ ಸಂಬಂಧಿ ಚರ್ಚೆಗಳು ಅವರಲ್ಲಿದ್ದ ಕಲಾವಿದನನ್ನು ಎಚ್ಚರಿಸಿದ್ದವು.

ತನ್ನ ತಾಯಿಯ ಸಾಂಪ್ರದಾಯಿಕ ಹೊಲಿಗೆಯಿಂದಲೂ ಪ್ರೇರಿತರಾಗಿರುವ ಸುಹ್, ತಮ್ಮ ಕಲಾಕೃತಿಗಳಲ್ಲಿ ಮುಖ್ಯವಾಗಿ ನೈಲಾನ್ ಅಥವಾ ರೇಷ್ಮೆಯಲ್ಲಿ ಕಲಾಕೃತಿಗಳನ್ನು ಸೂಕ್ಷ್ಮವಾದ ವಿವರಗಳ ಸಹಿತವಾಗಿ ಹೊಲಿಯುತ್ತಾರೆ. ಅವರ ಮನೆಯ ಕಲಾಕೃತಿಗಳು ತಮ್ಮ ಗಾತ್ರ ಮತ್ತು ಸ್ವರೂಪದಲ್ಲಿ ವಾಸ್ತವವಾಗಿ ಮನೆಯಂತೆಯೇ ಇರುತ್ತವೆ. ಮನೆಯ ಅಡುಗೆ ಕೋಣೆಯ ಸಿಂಕ್, ಶೌಚಾಲಯದ ಕಮೋಡ್, ಮೈಕ್ರೋವೇವ್ ಒವೆನ್ ಸೇರಿದಂತೆ ಎಲ್ಲ ವಿವರಗಳನ್ನೂ ಸೂಕ್ಷ್ಮವಾಗಿ ದಾಖಲಿಸಿರುವ ಈ ಕಲಾಕೃತಿಗಳು ಅರೆಪಾರದರ್ಶಕ ಬಟ್ಟೆಯಲ್ಲಿ ಹೊಲಿಗೆಯಾಗಿ, ಪ್ರದರ್ಶನಾಂಗಣದಲ್ಲಿ ನೇತಾಡುತ್ತಿರುತ್ತವೆ. ಈ ಭಾರ ರಹಿತ ಸ್ಥಿತಿ ವೀಕ್ಷಕನಿಗೆ ಕಟ್ಟಿ ಕೊಡುವ ಕಲ್ಪನೆ-ವಾಸ್ತವಗಳ ನಡುವಿನ ಒಂದು ವಿಶಿಷ್ಠ ಅನುಭೂತಿ ಆ ಕಟ್ಟಡದ ಮಾನಸಿಕವಾದ ಒಳಾಂಗಣವನ್ನೂ ಭೌತಿಕವಾದ ಹೊರಾಂಗಣವನ್ನೂ ಏಕಕಾಲಕ್ಕೆ ತೆರೆದಿರಿಸುತ್ತದೆ. ಈ ಕಲಾಕೃತಿಗಳನ್ನು ಸುಲಭವಾಗಿ ಮಡಿಚಿ ಸೂಟ್‌ಕೇಸ್‌ನ ಒಳಗಿರಿಸಿಕೊಂಡು ಇನ್ನೊಂದು ಜಾಗಕ್ಕೆ ಕೊಂಡೊಯ್ಯಬಹುದು. ಅವರು ಪ್ರತೀ ಬಾರಿ ಸ್ಥಲ ಬದಲಿಸಿದಾಗಲೂ ಹೊಸದೊಂದು ಸ್ಥಳ ಆ ಕಲಾಕೃತಿಗೆ ಸೇರ್ಪಡೆಗೊಳ್ಳುತ್ತದೆ. ಮನೆಯೊಳಗೆ ಮನೆಯೊಳಗೆ ಮನೆ ಕಟ್ಟಿ ಇರಿಸುವ ಈ ಕಲಾಕೃತಿ ಇನ್ನೂ ಸಂಪೂರ್ಣಗೊಂಡಿಲ್ಲ. ಅದಕ್ಕವರು ಹೀಗೆ ಹೆಸರಿಟ್ಟಿದ್ದಾರೆ: Seoul Home/L.A. Home/New York Home/Baltimore Home/London Home/Seattle Home… (1999)

ಸೋಲ್‍ನಿಂದ ಅವರ ಅಮೆರಿಕ ವಲಸೆಯನ್ನು ಬಿಂಬಿಸುವ Blue Green Bridge (2000), ಗುಂಪಿನ ಮತ್ತು ಏಕಾಂಗಿತನದ ನಡುವಿನ ಸಂಬಂಧಗಳನ್ನು ವಿಶ್ಲೇಷಿಸುವ Who Am We? (2000) ಇಂತಹ ಕಲಾಕೃತಿಗಳಲ್ಲಿ ಟ್ರಾನ್ಸಿಷನ್ ಸ್ಥಿತಿಯನ್ನು ಬಿಂಬಿಸುವ ಅವರ ಹೆಚ್ಚಿನ ಕಲಾಕೃತಿಗಳು ಅವರ ಅಲೆಮಾರಿತನದ ಟ್ರಾನ್ಸಿಷನ್‍ಗಳ ವೇಳೆಯಲ್ಲಿ ಅವರು ಮುಖಾಮುಖಿಯಾಗುವ ಕಾರಿಡಾರ್‌ಗಳು, ಮೆಟ್ಟಿಲುಗಳು, ಸೇತುವೆಗಳು, ಹೆಬ್ಬಾಗಿಲುಗಳ ಮೂಲಕ ವ್ಯಕ್ತಗೊಳ್ಳುತ್ತವೆ.

ಸುಹ್ ತನ್ನ ಕಲಾಭ್ಯಾಸದ ಬಗ್ಗೆ ಹೀಗೆ ಹೇಳುತ್ತಾರೆ: I have two studios, one in New York and one near seoul.that is where I make my work, where I give form to my work. The conceptualization part happens in-between places, when in transit, like in an airport, on the airplane or on the train – those in-between places. I think I have more inspiration when I don’t actually make something. In the beginning, I didn’t like traveling too much. but now it’s part of my job. I have to travel a lot and I sort of developed a habit to use that time for more creative things. For example, instead of reading, I actually do a lot of sketching during a flight. (2008ರಲ್ಲಿ ಡಿಸೈನ್ ಬೂಮ್ ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ)

ದೊ ಹೊ ಸುಹ್ ಅವರ ಸಂದರ್ಶನ: