ವಿಶ್ವಪ್ರೀತಿ

ಸೆಳೆಯುತಿದೆ ಎಲ್ಲವನು
ನೋವು ನಲಿವು ಸುಖ ದುಃಖಗಳ
ಅಳೆಯುತ ಜನನ-ಮರಣಗಳ ದೂರವ
ಸಂದಿಗ್ದ ಕಾಲದ ಕತ್ತಲೆಯ ತಳ್ಳುತ
ದಿಗಂತದಾಚೆಯ ಸ್ವಪ್ನಲೋಕಕೆ ದೂಡುತ

ಎಲ್ಲೆ ಮೀರಿ, ಭಾವ ತೂರಿ, ತಾಕಲಾಟ ತಡೆ ಹಿಡಿದು
ಕುಹುಕನಗೆಗೆ ಮರುಕ ತೋರಿ,
ಅರಹುತ ಬಾಲಪಥವ, ತಲೆ ತಲೆಗೆ ಮೊಟ್ಟಿ, ಹೊಡೆದು
ಸುತ್ತಲಿನ ಸೌಂದರ್ಯವ ಮನಕೆಲ್ಲಾ ಎರಕಹೊಯ್ದ
ಕಂಗೊಳಿಸುತಿದೆ

ಸಾಗುತಿದೆ, ಹಾದಿಹಿಡಿದು ವಿಶ್ವಪಥವಿಡಿದು
ಸವರಿಸಿ ಮನಗಳ ಪ್ರೀತಿಮಳೆ ಸುರಿಸಿ
ಒಟ್ಟುಗೂಡಿಸಿ ಒಡೆದ ಮನಗಳ
ಸೋತು ಮುದುಡಿಹ ಜೀವಗಳ ಆಲಂಗಿಸಿ
ಅಪ್ಪಿಕೊಳ್ಳುತ್ತದೆ

ಆ ಲೋಕ ಈ ಲೋಕವೆಂದಲ್ಲ
ಸಮಸ್ತಲೋಕವೂ ತನ್ನದೇ
ಬ್ರಹಾಂಡದೆಲ್ಲಡೆ ಪಸರಿಸಿ, ಚರಾಚರಗಳಲ್ಲೂ
ಸ್ಪಂದನೆಯುಂಟುಮಾಡಿ, ಕರಗಿಸಿ ಕಲ್ಲ
ಸಮಸ್ತಮನಗಳಲಿ, ಪ್ರೇಮ
ಅರಳಿಸುವುದು

ಕೈಚಾಚಿ ದೂರ ದೂರಕೆ
ಅಪ್ಪಿಕೊಳ್ಳಲು ಸಕಲವ, ಒಳಗೊಳ್ಳಲು ಎಲ್ಲವ
ಆಳದೆ, ಅಳಿಸದೆ ಯಾವ ಮನವ
ನಗಿಸಿ ಜಗವ, ಪಸರಿಸಿ ಒಲವ
ಸಲುಹಿ ಸಕಲರ
ಕಾಪಿಡುವುದೇ ವಿಶ್ವಪ್ರೀತಿ!!

- ಎಂ.ವಿ.ಶಶಿಭೂಷಣ ರಾಜು