ತದೇಕದ ಚಿತ್ತಕ್ಕೆ ಸಾವಿರ ಚಿಂತೆ

ಮಂಜಿನ ಹನಿಯಂತೆ
ರವಿ ಕಿರಣಕೆ ಹೊಳೆವ
ಕಣ್ಣೋಟದ ಬೆಡಗಿ
ಮುಡಿಗೆ ಶ್ಯಾವಂತಿಗೆ ಮುಡಿದವಳ
ಮೊಗ ಸಿರಿಯ ಗುಟ್ಟು
ಕೂಗಿ ಹೇಳಿದೆ

ಹರೆಯದ ಮೊಡವೆಯ ಧ್ವನಿಗೆ
ರಾಗವೊಂದು ಜೊತೆಗೂಡಿತಲ್ಲಿ
ಭಾವಗಳ ಬಂಧನವಾಗಿ

ರಾಶಿ ರಾಶಿ ಆಸೆಗಳಿಗೆ
ಪದಕೋಶ ಜಾಡಿನಲ್ಲಿ
ಪ್ರೇಮಕ್ಕೆ ಅರ್ಥ ಹುಡುಕುವುದು ಸಮಯ ವ್ಯರ್ಥ

ಉಮ್ಮಳಸಿ ಬರುವವು ಕಡಲ ತೆರೆಗಳಂತೆ
ಬಚ್ಚಿಟ್ಟ ಪ್ರೀತಿಯ ಕುರುಹುಗಳು
ಮುಗಿದಿರುವ ಕತೆಯ
ಸೂರಿಲ್ಲದ ಊರು-ಕೇರಿಗೆ
ಸಾರಿ ಹೇಳಿದಂತೆ

ರೋಷಿ ಹೋಗಿರುವ ಘೋಷವಾಕ್ಯಗಳ
ಕೂಸಿನಂತೆ ಜ್ವಾಕಿ ಮಾಡಿದರೆ
ಅನಾರೋಗ್ಯದ ಭಾಗ್ಯಗಳ ಗುಡಾಗುವುದು ಮನ

ನೆನಪೇಂಬ ರೆಪ್ಪೆ ತಡೆಯಿಲ್ಲದೆ ಮಿಟುಕಿಸಿದೆ
ಏಕಾಂಗಿತನವು ಏಕಾಂತಕ್ಕೆ ಜಾರುವ ಅರೇಘಳಿಗೆಯ
ತದೇಕದ ಚಿತ್ತಕ್ಕೆ ಸಾವಿರ ಚಿಂತೆ

ಬಲವಾದ ಒಲವಿಗೆ ನೆಲೆಯಿಲ್ಲ
ನಲ್ಲೆಯರು ನೋಡುವರು ಕುಲವ
ಸಖಾ-ಸಖಿಯರಿಗೆ ಪಕ್ವಗೊಳ್ಳಬೇಕಿದೆ ಪ್ರೇಮ ತತ್ವ.

ಪಿ. ನಂದಕುಮಾರ