ಸ್ವಚ್ಛ ಹಗಲಿನಲ್ಲಿ

ಜಗದ ಕಣ್ ತಪ್ಪಿಸಿ ನಾವು ಓಡಾಡಿದೆವು ಸ್ವಚ್ಛ ಹಗಲಿನಲ್ಲಿ
ಗೋಧಿ ತೆನೆಗಳ ಮರೆಯಲ್ಲಿ ಪ್ರೀತಿಸಿದೆವು ಸ್ವಚ್ಛ ಹಗಲಿನಲ್ಲಿ

ಜನ್ಮ ಜನ್ಮಾಂತರದಿಂದ ಹಂಬಲಿಸಿ ಕೂಡಿದಂಥಾ ಉತ್ಕಟತೆಯು
ಯಾರೊ ನೋಡುವರೆಂಬ ಶಂಕೆಯಲಿ ಆಡಿದೆವು ಸ್ವಚ್ಛ ಹಗಲಿನಲ್ಲಿ

ಮಧ್ಯಾಹ್ನ ಬೆಟ್ಟದ ನೆರಳಿನಲಿ ಮಿಡಿಯಿತು ಮಧುರ ಯಾತನೆಯ ಗೀತೆ
ಕಾಲವನು ಹಿಡಿದಿಡುವಂತೆ ಕೈಗಳ ಬೆಸೆದೆವು ಸ್ವಚ್ಛ ಹಗಲಿನಲ್ಲಿ

ಸಂಜೆಯ ಹೊಂಗಿರಣ ಅವನ ಮುಂಗುರುಳ ಶೃಂಗರಿಸಿ ಲಾಸ್ಯವಾಡಿತು
ವಿದಾಯ ಸನಿಹವಾದಂತೆ ಕಂಬನಿದುಂಬಿದೆವು ಸ್ವಚ್ಛ ಹಗಲಿನಲ್ಲಿ

ನಾವು ಪರಸ್ಪರ ಬೇರೆ ಬೇರೆ ಜಗತ್ತುಗಳಲ್ಲಿ ಕಳೆದುಹೋದವರು
ಈ ಕ್ಷಣವನ್ನು ಹೇಗೋ ಹಿಡಿದುಕೊಂಡಿರುವೆವು ಸ್ವಚ್ಛ ಹಗಲಿನಲ್ಲಿ

ಅಗಲುವುದೇ ಈ ಬದುಕು ನಮಗೆ ಇತ್ತ ಕ್ರೂರ ಕಾಣಿಕೆಯೇನೋ
ವಲಸೆ ಬಂದ ಹಕ್ಕಿಗಳಂತೆ ನಾವು ಅಗಲಿದೆವು ಸ್ವಚ್ಛ ಹಗಲಿನಲ್ಲಿ

- ಎಚ್.ಎಸ್. ಮುಕ್ತಾಯಕ್ಕ