ಸುಟ್ಟ ಮಣ್ಣು

ಯುದ್ಧದ ಗುಂಡು
ಬಾನಿನೆದೆಯ ಗೂಡಿಗೆ ತಗುಲಿ
ದ್ವೇಷದ ಸೋಂಕು ಹರಡುತಲಿದೆ

ಮಂಜಿನನಿಯು ಎಲೆಗಳ ಮೇಲೆ
ದುಂಡಾಗಿ ಬೆಂಡಾಗಿ ಮಾಯಾವಾಗಿವೆ
ಹುಲ್ಲಿನೆಸಳು ಗಾಳಿ ಬೀಸಲು ಹೆದರಿ
ಮುದುಡಿ ಮರೆಯಾಗಿವೆ

ಮನದ ಮೇರೆಯೇ ಪಲ್ಲಟ
ಸಾಯುವ ಚಿಟಪಟ
ಸುಟ್ಟ ಮಣ್ಣಿನ ಮೇಲೆ
ಚಿಗುರುವ ಅಕ್ಷರದ ಹಠ

ಅಲ್ಲಲ್ಲಿ ಕಟ್ಟಿದ್ದ ಬೆಸುಗೆ ಸೇತುವೆ ಗಳಿಗೆ
ಬಾಂಬುಗಳಾಕಿ ಕೆಡವಲಾಗುತ್ತಿದೆ
ಅಲ್ಲಲ್ಲಿ ನೆರವಿಗಾಗಿ ನಿಂತ ಜನರಿಗೆ
ಬೆದರಿಕೆ ಹಾಕಿ ನೋಯಿಸಲಾಗುತ್ತಿದೆ

ಬೆಂದ ಮನವ ಹೊಸಕಲು
ತಯಾರಿ ನಡೆಸಿದ್ದಾರೆ!
ತಮ್ಮಾಸೆಗಳನು ದವಡೆಯಲಿ ಬಚ್ಚಿಟ್ಟಿದ್ದಾರೆ
ಅವರು ಮನುಜರೆ ಅಲ್ಲವಾ?!

ಈಗಾಗಲೇ ಮದ್ದು ಗುಂಡುಗಳು
ಎಷ್ಟೊ ಮಂದಿಯ ನೆಲಕ್ಕುರುಳಿಸಿವೆ
ಕನಸುಗಳಂತೆ ಎತ್ತರದಲ್ಲಿದ್ದ ಎಷ್ಟೊ ಕಟ್ಟಡಗಳು
ನೆಲ ಕೆದರಿ ಗುಂಡಿ ಮಾಡಿ ಹೆಣ ಹೂತಿವೆ

ದ್ವೇಷದ ಊಹೆಯ ಭಾವನೆಗಳು
ಎಷ್ಟೊ ಮಂದಿಯ ಹೃದಯದಲಿ
ಪ್ರೇಮದ ವಿದ್ಯುತ್ ಕಾಂತಿಯ
ಹರಿಸುವುದ ನಿಲ್ಲಿಸಿಬಿಟ್ಟಿದೆಯಾ?

ಈಗೆಲ್ಲ ಭೂಮಿಗೆ ವಿಪರೀತ ಜ್ವರ ಬಂದು
ತನ್ನದೇ ಚಿಕಿತ್ಸಾ ವಿಧಾನವನ್ನ ಬದಲಿಸಿದೆ
ನೆಲಕ್ಕಪ್ಪಳಿಸಿ ಬಿದ್ದ ಮಳೆ ಹನಿಯೆಲ್ಲ
ಒಪ್ಪೊತ್ತಿನ ಜೋಳವ ನೆನೆಯಿಸಿವೆ

ಮನದ ಶೋಕ ಮಾತುಗಳೇ
ನಿದ್ದೆಗೆ ಶಕುನವಾಗಿ ಕಾಡುತ್ತಿವೆ

ಆಸೆಗಳಿಗೆ ಸಾಲ ಕೊಟ್ಟವರು
ಬಾಯಿ ಉಣ್ಣು ಮಾಡಿಕೊಂಡಿದ್ದಾರೆ
ಉಸಿರ ನೀಡಬೇಕಾಗಿದ್ದ ದವಾಖಾನೆಗಳು
ಸೊರಗಿ ಕಾಯುತ್ತಿವೆ ಕಣ್ಣೀರ ಹೊಸಕಿ

ಯಾರೂ ಯಾಕಾಗಿ ಚೀರಾಡಿ ಹೋರಾಡಿ
ಮನುಜನ ಪ್ರೇಮವನು ಕೊಲ್ಲಲು ಹವಣಿಸುವುದು?!

~ಶ್ರೀಧರ ಜಿ ಯರವರಹಳ್ಳಿ