ಸೃಷ್ಟಿ ಚಲನೆಯ ಚಕ್ರ

ಕನಸುಗಳು
ಕನವರಿಸುವಾಗ
ಆ ಹೆಂಗಸಿನ ಹೆರಿಗೆ ನೋವು
ಬಿಗಿಯಾಗಿತ್ತು.

ಒಳಗೆ ನಿರ್ಭಿಡೆಯಾಗಿ ಆಡುವ ಕೂಸಿಗೆ
ಹೊರಗಿನ ಕೆಂಡದ ಮೇಲಿನ ನಡಿಗೆ
ಭಯಹುಟ್ಟಿಸುತ್ತಿರಬಹುದೆ..?

ಕರೋನದ ವಾಸನೆಯ ಗಾಳಿ ಕುಡಿದ
ಆ ಎಳೆ ಹೃದಯ
ಹೊರಗೆ ಬರಲಾರದ
ಫೆನ್ಸಿಂಗ್ ಸೃಷ್ಠಿಸಿಕೊಂಡಿರಬಹುದೇ..?

ಹರಿದ ಬಟ್ಟೆಗಳ ಬಿಕ್ಕಳಿಕೆ
ಮಗುವಿನ ಕಿವಿ ತುಂಬಿ
ಕಾಲನ ಕೈಯ ಜಗ್ಗುತ್ತಿರಬಹುದೆ..?

ದೇಶವ ಆಳುವ ರಾಜನ
ಧರ್ಮಭೇದವ ಅರಿತ ಕೂಸಿನ ಕಣ್ಣು
ಸಮತೆಯ ಬೆಳಕಿನ ನೂಲನು ಹೆಣೆದು
ತರಲು ತಡವಾಯಿತೆ..?

ನಸುಕರಿದು ಬಂದರೂ
ಆ ಹೆರಿಗೆ ಬೇನೆ
ಕೆಂಡ ಮುಟ್ಟುತ್ತಲೇ ಇರುವಾಗ
ಹೂ ಮನಸಿನ ಕಂದನ ತುಟಿಗಳು
ಕಂಪಿಸದಿರಲು ಹೇಗೆ ಸಾಧ್ಯ ..?

ಭಾರತಾಂಬೆಯ ಮಡಿಲನು
ಶುದ್ಧ ಮಾಡಲು ಹೊರಟು
ಮೈಲಿಗೆಯೆಂಬ ಬಣ್ಣ ಹಚ್ಚುವ
ನಾಜೂಕಿನ ಕೈಗಳೇ
ಹಸಿಕಂದಮ್ಮನ ಬಿಳಿ ಮನಸಿನ ಮೇಲೆ
ಮುಳ್ಳುಗಳ ಸೃಷ್ಟಿಸಬ್ಯಾಡಿ

ಒಳಗೆ ಅಳುವ ಕಂದನ ಪಾದಗಳು
ಜಾತಿ ಮುಕ್ತ ಭಾರತದ ನೆಲ ತುಳಿವ ಆಸೆ
ಒಳಗಿಲ್ಲದ ನಾನೆಂಬ ಗರ್ವದ ಬಟ್ಟೆ
ಹೊರಗೆ ಬಂದರೂ ಕಾಪಿಡುವ ಇಂಗಿತ

ಈ ನೆಲದ ಕಾವಿನ ಮೇಲೆ
ಶುದ್ಧ ಸೃಷ್ಟಿ ಚಲನೆಯ ಚಕ್ರ
ಸರಾಗವಾಗಿ ತಿರುಗಲಿ...
ಒಳಗೇ ಅಳುವ ಕಂದನ ಬೆಳಕು
ಜಗವ ಅಪ್ಪಲಿ.!