ಪಿಸುಗುಡುವ ದನಿ ಆಲಿಸಬೇಕಿದೆ

ಸ್ವಲ್ಪವೇ ತಾಣ ಸಿಕ್ಕಿದ್ದರೂ ಸಾಕು ಕೊಂಬೆಗಾತು
ಭದ್ರ ಗೂಡು ಕಟ್ಟುತ್ತದೆ ಹಕ್ಕಿ

ಮಣ್ಣು ಕೊರೆಯುವ ತಾಕತ್ತಿನೊಂದಿಗೆ
ಭೂಮಿಗಿಳಿವ ಇರುವೆ ಗುಂಪು

ಚುಚ್ಚುವ ಪುಟ್ಟದೇ ಕೊಳವೆಯಿಟ್ಟುಕೊಂಡು
ವಾಸ್ತುಶಿಲ್ಪಿಯಾಗುವ ತುಡುಗು ಜೇನು

ಎಳೆ ಕಿರಣಗಳಿಗೆ ಸೋತು ಮೊಗ್ಗು ಮುಂಚಾಚಿ
ಅರಳಿಯೆ ಬಿಡುತ್ತದಲ್ಲ ಹೂವು

ಹನಿದ ಕೆಲವೇ ಹನಿಗಳಿಗೆ ಪರವಶವಾಗಿ
ಪುಳಕಿತವಾಗುತ್ತಾಳೆ ದೇಹದಿಳೆ

ಬೆಳದಿಂಗಳಾಗಿ ಬೆಳಕು ಜಾರುವ ಹೊತ್ತು
ಚಕೋರನಿಗೆ ಚಂದ್ರನದೇ ಕನವರಿಕೆ

ಬೆರಳು ಬೆಸೆದ ಕೈಗಳಲ್ಲಿ ನಿಲುಕುವ ಸ್ಪರ್ಷ
ಅದಮ್ಯ ಒಲುಮೆಯಾಗರ

ಮಂದ್ರದಲ್ಲಿಯೇ ತೇಲಿ ಕಂಠಾಭರಣವಾಗುವ
ದಿವ್ಯಾನುಭೂತಿಯ ಸಂಗೀತ

ನೋಟದಲ್ಲೆ ಮಿಂಚು ಹರಿಸಿ ಜೀವಚೈತನ್ಯಕೆ
ಮರುಳಾಗುವ ಕಣ್ಣುಮಿಟುಕು

ಪ್ರಕೃತಿಗೂ ಪ್ರೇಮಕ್ಕೂ ಇರುವ ಇಂಗಿತದ ಮಾಪನ ಮಾಡಬೇಕಿದೆ

ಬದುಕು ತನ್ನಷ್ಟಕ್ಕೆ ತಾನೆ ಪಿಸುಗುಟ್ಟುವ ವೇಳೆಯ
ನಾದವನ್ನು ಅರಿಯಬೇಕಿದೆ

- ಮಮತಾ ಅರಸೀಕೆರೆ