ನಿನ್ನ ಒಲವಿನಲಿ 

ಇನಿತು ಮುನಿಸೇಕೆ ಗೆಳತಿ ನಸು ನಗುತ ಅವತರಿಸು
ಅನಿತು ದೂರದಲಿ ನಿಂತು ಮನ ಹರುಷ ಆಸ್ವಾದಿಸು

ನೀಳ ಕುರುಳು ನವಿರಾಗಿ ಜಾರುತಿರೆ ಇಳೆಗೆ ಮಳೆ ಸುರಿದಂತೆ
ಆಳ ಸಾಗರ ಅಲೆಯಾಗಿ ಹೊಮ್ಮುತಿರೆ ಬಾಳಿಗೆ ಭಾವ ಹರಿದಂತೆ

ಇನಿದಾದ ಸರದಲಿ ಮನವೆಲ್ಲ ಜತನದಿ ಓಡಾಡಿ ನದಿಯಾದೆ
ಸನಿಹದಿ ನವಿರಾಗಿ ಕನಸೆಲ್ಲಾ ತುಳುಕುತ ಓಲಾಡಿ ಕಲೆಯಾದೆ

ಒಂದು ಗಂಭೀರ ಮೌನ ನಿನ್ನ ವದನಕೆ ಸೊಗಸು ಸುರಿಸಿದೆ
ಅಂದದ ತಿಳಿ ನಗುವು ನಿನ್ನ ಕಣ್ಣಿಗೆ ಒಲವು ತುಂಬಿದೆ

ನಿನ್ನೊಲವಿನಲಿ ಒಯ್ದಾಡಿ ಒಡನಾಡಿ ಮನ ಮುದಗೊಂಡಿದೆ
ಕಣ್ಣಿನಾಳದಲಿ ಸೊಗಸಾಗಿ ತುಳುಕಾಡಿ ಎದೆ ಮೇರೆ ಮೀರಿದೆ

ಅಷ್ಟು ಬೆಳಕಾಯಿತು ನನ್ನ ಜಗವು ನಿನ್ನಿರುವಿಕೆಯ ದೆಸೆಯಿಂದ
ಇಷ್ಟು ಸಾಕಾಯಿತು ಬಾಳಿಗೆ ಮನ ಹಗುರವಾಯಿತು ಒಲವಿಂದ

ರಚನೆ: ಎಂ.ವಿ. ಶಶಿಭೂಷಣ ರಾಜು