ನೆಲದ ನಡುಗೆಯ ನುಡಿ

ಕತ್ತಲು ಕಾಣದ ಕೋಣೆಗೆ ಎತ್ತಲದೊ ಕರಿ ಮೋಡ
ಇದ್ದೊಂದ ಬಾಗಲಿಗೆ ಮೂರು ಕೊಂಡಿ ಸುತ್ತಲೂ ಕಿಟಕಿಗಳದೆ ಕಣ್ಣು
ಅಕ್ಕಪಕ್ಕದ ಗಿಡಗಳಿಗೆ ಹಸಿರೆಂಬ ಹರೆಯ ಕಳೆದು ಮುಪ್ಪೆಂಬ ಹಳದಿ ಆವರಿಸುವ
ಕಾಲವದು

ಅಟ್ಟದಮನಿ ತೊಲಬಾಗಲಿಗೆ
ಕಟ್ಟಿದ ಜೋಳದ ತೆನೆ ಗುಚ್ಛ
ಬಿಟ್ಟಿ ದುಡುಮೆಯ ಫಲವಿವು ದೋತರಕ್ಕೊಂದು ಗಟ್ಟಿ ಕಚ್ಛೆ
ಉಟ್ಟ ಅಂಗಿಗೆ ಆಕಾಶದ ಚುಕ್ಕೆಗಳ ತ್ಯಾಪೆ

ಸತ್ತು ಹೋಗಿದೆ ಸತ್ಯ ಹೊಟ್ಟೆಯ ಶಕ್ತಿ ರಟ್ಟೆಗೆ ಬರುಹೊತ್ತಿಗೆ
ಬಚ್ಚಿಟ್ಟ ಬುತ್ತಿಯ ಒಂದೊತ್ತು ಊಟ
ಕಂಕಳಲಿರಿವ ಮಕ್ಕಳಿಗೆ
ಗುಟುಕು ನೀರು ಇವರ ಜಠರಕ್ಕೆ

ಲೋಕ ಕಾಯಕದ ಪಾಪಕ್ಕೆ
ತೇಕುವ ಜೋಕುಮಾರರು
ಕುಲವೆಂಬ ಮಲಕ್ಕೆ ಹಂಟಿದ ಹುಳಗಳಿವೆ
ನೂಕಾಟ ನಾಟಕದ ಪಾತ್ರಕ್ಕೆ ತೆರೆಮೇಲೆ ಅರೆಜೀವ ಅದರ ಹಿಂದೆ ಬರಿ ದೇಹ

ಸಂದಕಿನೊಳಗಿದ್ದ ಘಳಿಗಿ ಮುರಿಯದ ಸೀರಿ ಗಂಟೆಗೊಮ್ಮೆ ಗಲಿಬಿಲಿ ಎಂದೊಮ್ಮೆ
ಬರುವದು ಬೀದಿಗೆ ನೆಲದ ನಡೆಗೆ ನುಡಿ ಬರೆವ ಋತುಮಾನವದು

ಪಿ. ನಂದಕುಮಾರ