ನೀಳ ಗಾಜಿನ ಕಿಟಕಿಗಳಿಂದಾಚೆಗೆ

ಕಾದಂಬರಿಗಾರ್ತಿ, ಕತೆಗಾರ್ತಿ ಆಶಾ ರಘು ಅವರು ಮೂಲತಃ ಬೆಂಗಳೂರಿನವರು. ಇವರು ಬೆಂಗಳೂರು ವಿಶ್ವವಿದ್ಯಾಲಯದಿಂದ ಕನ್ನಡ ಸ್ನಾತಕೋತ್ತರ ಪದವಿ ಪಡೆದಿರುತ್ತಾರೆ. 'ಆವರ್ತ', 'ಗತ', 'ಮಾಯೆ', 'ಆರನೇ ಬೆರಳು', 'ಬೊಗಸೆಯಲ್ಲಿ ಕಥೆಗಳು', 'ಅಪರೂಪದ ಪುರಾಣ ಕಥೆಗಳು', 'ಚೂಡಾಮಣಿ' ಹೀಗೆ ಅನೇಕ ಸಾಹಿತ್ಯ ಕೃಷಿಯನ್ನು ಮಾಡಿರುವ ಅವರ ‘ಬೊಗಸೆಯಲ್ಲಿ ಕಥೆಗಳು’ ಸಂಕಲದಿಂದ ಆಯ್ದ ‘ನೀಳ ಗಾಜಿನ ಕಿಟಕಿಗಳಿಂದಾಚೆಗೆ ’ ಅತಿ ಸಣ್ಣ ಕತೆನಿಮ್ಮ ಓದಿಗಾಗಿ...

ಸ್ಲಮ್ಮಿನ ಆ ಸಣ್ಣ ಜೋಪಡಿಯಿಂದ ತನ್ನ ಹಳೇ ಜಿಪ್ಪು ಕಿತ್ತು ಸೇಫ್ಟಿಪಿನ್ನು ಹಾಕಿದ್ದ ಕಿಟ್ಟುಬ್ಯಾಗು; ಪೌಂಡರು ಡಬ್ಬ, ಅಲ್ಲಲ್ಲಿ ಬಿಂದಿ ಮೆತ್ತಿ ಕಪ್ಪು ಕಲೆಗಳಾಗಿದ್ದ ಅಂಗೈ ಅಗಲದ ಕನ್ನಡಿ, ತುದಿ ಮುಟ್ಟಿದ್ದ ಲಿಪ್ಸ್ಟಿಕ್, ಗಾಜಿನ ಬಳೆಗಳು, ಕಾಜಲ್ ಡಬ್ಬಿ ಎಲ್ಲವನ್ನು ಸುರಿದುಕೊಂಡ ಇನ್ನೊಂದು ಚಿಕ್ಕ ಹ್ಯಾಂಡ್ ಬ್ಯಾಗು ಹಿಡಿದು ಅಪ್ಪಅಮ್ಮರ ಅಣ್ಣಂದಿರ ಕಣ್ಣು ತಪ್ಪಿಸಿ ಟ್ಯಾಕ್ಸಿಯವನ ಹಿಂದೆ ಗಿಲೀಟು ತಾಳಿ ಕಟ್ಟಿಕೊಂಡು ಹೋಗಿಬಿಟ್ಟಿದ್ದ ಹಾಲುಬಣ್ಣದ ರಮಾಬಾಯಿಗೆ ನೀಳ ಗಾಜಿನ ಕಿಟಕಿಗಳ ದೊಡ್ಡದೊಡ್ಡ ಬಿಲ್ಡಿಂಗ್‌ಗಳೊಳಗೆ ಕಾಲಿಡುವುದೇ ಮೊದಲಿಗೆ ಸಂಭ್ರಮವೆನಿಸುತ್ತಿತ್ತು.

ಗಂಡು ಎಂದು ಅವಳು ಗುರುತಿಸಿಕೊಂಡ ಆ ಟ್ಯಾಕ್ಸಿಯ ಕರಿಬಣ್ಣದ ಬಿಳುಪು ಶರಟಿನ ಆಸಾಮಿಯ ತಲೆ ಬದಲಾಗಿ ಬೇರೆಬೇರೆಯ ತೋಳು, ಬೆವರು ನಾತಗಳ ಕೂಟ ಬೆಳೆಯತೊಡಗಿದಾಗ, ಜೋಪಡಿಯ ಮೋಟು ಗೋಡೆ, ಕ್ಯಾಲೆಂಡರು, ಪ್ಲಾಸ್ಟಿಕ್ ಮೆತ್ತಿದ ತೂತು ಬಕೇಟು, ರಂಗೋಲಿಯ ಕರಟ, ಅಲ್ಯುಮಿನಿಯಂ ಬೋಸಿಗಳು ಅಕ್ಕರೆಯ ದನಿಗಳಾಗಿ ಕರೆಯತೊಡಗಿ, ನೀಳ ಗಾಜಿನ ಕಿಟಕಿಗಳಿಂದಾಚೆಗೆ ಆ ರಸ್ತೆಯಲ್ಲಿ ಎಂದಾದರೂ ಕಾಣಬಹುದಾದ ತನ್ನ ಅಪ್ಪ. ಅಣ್ಣಂದಿರಿಗಾಗಿ ಬಿಡುವಾದಾಗಲೆಲ್ಲಾ ನಿಂತು ನೋಡತೊಡಗಿದಳು.

(ಇದು ನನ್ನ 'ಬೊಗಸೆಯಲ್ಲಿ ಕಥೆಗಳು' ಸಂಕಲನದಿಂದ ಆಯ್ದ ಕಥೆ -ಆಶಾ ರಘು)