ಮುಖವಾಡದಾಕೆ

ಒಂದು ದಿನ ಗುಲಾಬಿಕೊಳ್ಳಲು
ಅಂಗಡಿಯೊಂದರ ಮುಂದೆ ನಿಂತೆ
ಗುಲಾಬಿ ಕೊಟ್ಟ ಅದರ ಮಾಲೀಕೆ
ಪುರಾತನ ನನ್ನ ಗೆಳತಿ
ಎಂಬುದನ್ನು ಅರಿತು ಪುಳಕಗೊಂಡೆ
ಆಕಸ್ಮಿಕವಾಗಿ ಸಿಕ್ಕ ಆಕೆ, ಹಳೆ ಪ್ರೇಮದ ಕೆದಕಿಗೆ ಅವಕಾಶಿಸದೆ
ಅದೇ ಗತ್ತಿನಲ್ಲಿ ಬೀಳ್ಕೊಟ್ಟಳು.

ಮತ್ತೊಂದು ದಿನ ಅದೆ ರಸ್ತೆಯ
ಅದೇ ತಿರುವಿನ ಮಾಲೀಕೆ
ಈಗ ಮುಖವಾಡದ ಅಂಗಡಿ ಇಟ್ಟಿದ್ದಳು.
ಕೊಳ್ಳಲು ನನಗೆ ಕಾರಣವಿರಲಿಲ್ಲ
ಆದರೂ ಹೋಗಿ
ಹನುಮಂತನ ಮುಖ ಊದಿರುವ
ಎರಡು ಮೂತಿ ಕೊಂಡೆ
ಮೀಸೆ ಬಲಿತ ನಾ..
ಅದನ್ನು ಲೆಕ್ಕಿಸದೆ ಮಕ್ಕಳಂತೆ ಮುಖಕ್ಕೆ ತೊಟ್ಟರೂ
ಒಂಚೂರು ಗೆರೆ ಕೊಂಕಿಸದ ಆಕೆ
ಚಿಲ್ಲರೆ ಕೊಟ್ಟು ಕಳುಹಿಸಿದಳು

ಮಾರನೆ ದಿನ ಆಕೆ
ಖಾಯಂ ಗಿರಾಕಿಯಾಗಿದ್ದ ನನ್ನನ್ನೇ
ಬೋಣಿಗೆಗೆಂದು ಕಾದಿದ್ದಳು.
ಈಗ ಆಕೆ ರಸಗೊಬ್ಬರದ ಅಂಗಡಿ ಇಟ್ಟಿದ್ದಳು.
ಕೃಷಿಕನಲ್ಲದ ನನಗೆ ಅವಶ್ಯಕತೆ ಇಲ್ಲವೆಂಬುದ ತಿಳಿದೂ..
ಎಳ್ಳಷ್ಟು ಅನುಕಂಪಿಸದೆ
ಕೀಟ ನಾಶಕ ಮಾರಿ ಕಳುಹಿಸಿದಳು‌

ಈಗ ಗೆಳೆಯರು ಕೇಳುತ್ತಿದ್ದಾರೆ
ಗುಲಾಬಿ, ಮುಖವಾಡ, ಕೀಟನಾಶಕ ಯಾವುದಿರಲಿ ಎಂದು.
ಅವರಿಗೆ ತಿಳಿದಿರಲಿಕ್ಕಿಲ್ಲ
ಅವಳೆದೆಯ ಗುಲಾಬಿಯೇ
ಇನ್ನು ನನ್ನನ್ನ ಗಿರಾಕಿಯಾಗಿಯೇ ಉಳಿಸಿದೆ ಎಂದು