ಆಗಿನ್ನೂ ಮುಗಿಲು
ಕೂಡಿರುವುದೇ ಇಲ್ಲ
ಥಣಾರನೇ ಕೋಲ್ಮಿಂಚು ಮಿಂಚಿ
ನೇರ ಹೃದಯಕ್ಕೆ
ಬಡಿಯುತ್ತದೆ ಸಿಡಿಲು
ಸಾವರಿಸಿಕೊಳ್ಳಲೂ
ಸಮಯ ಕೊಡದೆ
ಬವಳಿ ಬಂದು
ಇನ್ನೇನು ಬಿದ್ದೇ ಹೋದಂತೆ
ಭಾಸವಾಗುವಾಗ
ನನ್ನ ಬೆಳ್ಳನೆಯ ಮೊಗ
ಇನ್ನೂ
ಕೆಂಪಗಾಗುತ್ತದೆ
ಕಣ್ಣು ಒಮ್ಮೆಗೆ
ಹೊಳೆದು ತುಂಬಿಕೊಳ್ಳುತ್ತವೆ
ತುಟಿ ಸಣ್ಣಗೆ ಕಂಪಿಸಿ
ಹುಬ್ಬು ಇಷ್ಟಿಷ್ಟೇ ಸಂಕುಚಿಸಿ
ಎಂದೋ ಮುತ್ತು
ಪಡೆದಿದ್ದ ಪುಟ್ಟ ಹಣೆಯ
ಮೇಲೆ ಬೆವರ ಹೂಬಳ್ಳಿ
ಹಬ್ಬುತ್ತದೆ
ಕೆನ್ನೆ ನೂರು ವೋಲ್ಟಿನ
ಬಲ್ಬಾಗಿ
ಜೀವದ ಕೋಶಕೋಶವೂ
ಖಿಲ್ಲನೆ ಝಲ್ಲೆಂದು
ಹೆರಳಿನೊಂದೆಳೆಯನ್ನು
ಬೆರಳು ಹೆಣೆದೂಹೆಣೆದೂ
ಸುರುಳಿ ಬಿಡುತ್ತದೆ
ದಬ್ಬಿಕೊಂಡು ಬಂದ
ಉಸಿರು ಬೆಚ್ಚಗಿರುತ್ತದೆ
ಎಷ್ಟು ಚಂದದ ಸಾವು
ಮಾರಾಯ್ತಿ
ಇದು!!
ಹೀಗೆ
ಪ್ರೀತಿಯಲ್ಲಿ ಬೀಳುವುದು!!
…
ನೀ
ಸಕಲೇಶಪುರದ ಹೆದ್ದುರ್ಗದ ಕಾಫೀ ಬೆಳೆಗಾರ್ತಿ ನಂದಿನಿ ಹೆದ್ದುರ್ಗ ಅವರು ಕೃಷಿಕ ಮಹಿಳೆ. ತಮ್ಮ 16 ನೇ ವಯಸ್ಸಿನಲ್ಲಿಯೇ ಮದುವೆಯಾಗಿ ಬದುಕಿನ ಸುಖ ದುಃಖಗಳನ್ನು ಕಂಡುಂಡವರು. ಕಳೆದ ಕೆಲವು ವರ್ಷಗಳಿಂದ ಕಾವ್ಯ ರಚನೆಯ ಮೂಲಕ ಕಾವ್ಯ ಲೋಕ ಪ್ರವೇಶಿಸಿದ್ದಾರೆ. ಅವರ ಎರಡು ಸಂಕಲನಗಳು ಪ್ರಕಟವಾಗಿವೆ.
ಪ್ರೀತಿ ಪ್ರೇಮಗಳೇ ಇವರ ಕಾವ್ಯದ ಪ್ರಮುಖ ವಸ್ತು. ನಿರ್ಭಿಡೆಯಿಂದ ಹೆಣ್ಣಿನ ಅಂತರಂಗದ ಭಾವನೆಗಳನ್ನು ತಮ್ಮ ಕವಿತೆಗಳಲ್ಲಿ ಹೊರ ಹಾಕುವ ನಂದಿನಿ ಅವರು ಯಾವುದೇ ಮುಲಾಜಿಲ್ಲದೇ ಅಭಿವ್ಯಕ್ತಿಸುವುದು ವಿಶೇಷ.
More About Author
Concept & Creation 
©2024 Book Brahma Private Limited.
